ކޮންމެވެސް ރަށެއްގައި ދެމަފިރިއަކު ވަރަށް ލޯބިން ރީތި ގެޔެއްގައި ބަލާ ބޮޑުކުރި ފިރިހެން ކުއްޖަކު އުޅުނެވެ.ކުއްޖާއަށް ދަތިވާ އެއްވެސް ކަމެއް އޮތަނުދީ އެދެމަފިރިން ދަރިފުޅު ގެންގުޅެމުން އައީ ވަރަށް ރަނގަޅަށެވެ.
ދުވަސްތައް ފާއިތުވަމުންގޮސް ކުއްޖާ ކިޔެވުން ފުރިހަމަ ކޮށް މީހަކާ އިނދެ ދަރިއަކު ލިބުނުތަނާ، ބައްޕަ ވަރަށް ބޮޑަށް ބަލިވެގެން އޮތުމަށް ފަހު މަރުވެއްޖެ އެވެ.
ބައްޕަ މަރުވުމުން ޖަނާޒާގެ ކަންތައް ނިންމުމަށްފަހު ފިރިހެން ކުއްޖާ ނިންމީ މަންމަ ގެންގޮސް މުސްކުޅިން ބަލާ ތަނަކަށް ލުމަށެވެ. ގޭގައި ބައިންދަންވެސް ބޭނުމެއް ނުވިއެވެ. މުސްކުޅިން ބަލާ ހޯމް އަކަށް މަންމަ ގެންގޮސް ލުމަށްފަހު އޭނާ ގެޔާ މުދަލުގެ މައްޗަށް ވެރިވެގަނެ އުފަލާ އަރާމުގައި އުޅެމުން ގެންދިޔައެވެ. މަންމަގެ ހާލު ދެކިލަން ދަނީވެސް ވަރަށް މަދުންނެވެ. މަންމަ އިނީ ކައިގެންތޯ، ގަދަވެތޯ އަދި އުފަލުންތޯ އޭނަބަލާކަށް ބޭނުމެއް ނުވިއެވެ.
މިގޮތުގައި އަހަރުތައް ކުރިޔަށް ގޮސް މަންމަވެސް މަރުބަލީގައި ޖެހިއްޖެ އެވެ. އެހެން ކަމުން މަންމަ ބަލަހައްޓަމުން އައި ތަނުގެ ފަރާތުން އޭނާގެ ދަރިފުޅަށް ގުޅާ އައުމަށް އެދުނެވެ. ދެންވެސް އޭނާބެލީ ނުގޮސް ފޯންކޯލް އަކުން ފަރުޖައްސާލެވޭތޯއެވެ. ނަމަވެސް އޯލްޑްއޭޖްހޯމް ގެ ވެރިން ގެއަމުރަށް އޭނާޔަށް ޖެހުނީ ދާށެވެ.
އޭނާއަށް މަންމަ ފެނުނުއިރު މަންމަ ވަނީ ވަރަށް ވެސް ހާލު ދެރަވެފައެވެ. މީހާ ހިކިކަމުން ހީވަނީ ކަށިގަނޑެއްހެންނެވެ.ނޭވާވެސް ލެވެނީ ވަރަށް ހާލުންނެވެ. ދެން މާގިނަ އިރަކު ނޯންނާނެކަން އިނގެއެވެ.ފިރިހެން ކުއްޖާ ވަރަށް ދެރަވެއްޖެއެވެ. މިފަދަ ހާލަކަށް މަންމަ ދިޔައިރު އަހަރެންނަށް ނޭންގީ ކީއްވެގެން ހެއްޔެވެ؟އޭނާގެ ދެލޮލުން ކަރުނަ އޮހިގެންފިއެވެ. ނަމަވެސް ހިއްވަރު ކޮށްފައި ބުންޏެވެ.“މަންމާއެވެ.އަހަރެން މިއައީއެވެ.މަންމަޔަށް އަހަރެން ކޮށްދޭންވީ ކޮންކަމެއް ހެއްޔެވެ.“ މިހެން ބުނުމުން މަންމަ ވަރަށް ހިއްވަރުން ބުންޏެވެ.“މިތަނުގައި ދެތިން ފަންކާ ހަރުކޮށްދޭށެވެ. އަދި މިތަނަށް ރަގަޅު އައިސްއަލަމާރިއެއް ގެނެސްދޭށެވެ.“ މިހެން ބުނުމުން އެޒުވާނާ ހައިރާންވިއެވެ.އަދި ބުންޏެވެ.“މަންމަ ދެން މިތާކު ނޫޅޭނެ ނޫން ހެއްޔެވެ.ދެން މިތާ ފަންކާ ހަރުކޮށް އައިސްއަލަމާރި ގެންނަންވީ ކީއްކުރަން ހެއްޔެވެ.“
މިހެން ބުނުމުން މަންމަ އަނެއްކާވެސް ވަރަށް ހިއްވަރު ކޮށްފައި ބުންޏެވެ. ”އާއެކެވެ. މަންމަ ފަންކާއެއް އޭސީ އެއް ނެތް ތަނެއްގަ އެތައްއަހަރެއްވަންދެން ކެތް ކުރީމެވެ.އަދި ކުނިވާން ފަށާފަ ހުން ކާއެއްޗެތިވެސް ކާންޖެހޭ ފަހަރު މަދެއް ނޫނެވެ.އެކަމަކު ދަރިފުޅަށް ހޫނުގަ ނުނިދޭނެކަން މަންމަޔަށް އިނގެއެވެ.އަދި ދަރިފުޅު ކުނިވާންދާ ކާއެއްޗެތި ކާކަށް މަންމަ ބޭނުމެއް ނޫނެވެ. ފަންކާ ހަރުކޮށްދީ އައިސްއަލަމާރި ގެނައުމުން ދަރިފުޅުގެ ކުދިން ދަރިފުޅު މިތަނަށް ފޮނުވާ ދުވަހު މަންމަ އުޅުނު ހާލުގައި ދަރިފުޅު އުޅޭކަށް ނުޖެހޭނެއެވެ.މިކަންތައް ކޮށްދޭންވީ އެހެން ވެގެންނެވެ“
މިވާހަކަތައް އަޑުއަހާފަ މަންމަގެ ގައިމައްޗަށް ވެއްޓިގަނެ ފިރިހެން ކުއްޖާ ބާރަށް ރޯން ފެށިއެވެ. އަދި ރޮމުންރޮމުން ބުންޏެވެ.“މަންމާ އަހަރެންނަށް މައާފް ކުރާށެވެ. އަހަރެން މަންމަ މިތަނުން ގެންދާނަމެވެ. އަދި ދެން އުޅޭނީ އަހަރެންނާއެކީ ގޭގައެވެ.“ ނަމަވެސް އޭރު ވަގުތު ފާއިތުވެއްޖެ އެވެ.އޭނާދެއްކި އެއްވެސް ވާހަކައެއް މަންމަ އަކަށް ނީވެއެވެ.މަންމަގެ ފުރާނަ ގޮއްސިއެވެ.
އަޅުގަނޑުމެން ދުނިޔޭގަ އުޅުމަށް ލިބިފައިވާ މިކުޑަ މުއްދަތުގައި ހިތުހުރިހައި ގޮތަކަށް އަމަލުތައް ބަހައްޓައިގެން ނުވާނެއެވެ.ކޮންމެ ނުރަގަޅު އަމަލެއް އަޅުގަނޑުމެންނާ ބައްދަލް ކުރާނެކަން ހަނދާން ކުރަންވާނެއެވެ.
އަޅުގަނޑުމެންގެ ދަރިން އަޅުގަނޑުމެނާމެދު ހެޔޮކޮން ހިތާނީ އަޅުގަނޑުމެން،އަޅުގަނޑުމެންގެ މައިންބަފައިންނަށް ހެޔޮކޮން ހިތި މިންވަރަކަށެވެ.
