ސީރިއާގެ މައްސަލައިގެ ތެރެއަށްވަދެ އެ ގައުމުގައި ފިތުނަ ފަސާދަ އުފައްދަން މަސައްކަތް ނުކުރުމަށް މިހާރުގެ ޚާރިޖީ ވަޒީރު އަސަދު ހަސަން ޝިބާނީ އީރާނަށް އަންގައިފިކަމަށް ރޮއިޓާރސް ގާހިރާއާއި އަދި ދުބާއި އިން ރޭގައި ޚަބަރުދީފިއެވެ.    

ސީރިއާގެ މިނިވަންކަމާއި އިސްތިގްލާލް ރައްކާތެރިކޮށް އަދި ރައްޔިތުންގެ ރައްކާތެރިކަން ކަށަވަރުކޮށްދިނުމަކީ ސީރިއާ ސަރުކާރުގެ މަސްއޫލިއްޔަތެކެވެ. ޚާރިޖީ ވަޒީރު ޝިބާނީ އެކްސް މެދުވެރިކޮށް ހާމަކޮށްފައިވެއެވެ. އަދި އިރާނުން ސީރިއާގެ ކަންތައްތަކުގެ ތެރެއަށްވަދެ ފިތުނަ އުފައްދަން މަސައްކަތްނުކުރުމަށާއި އެފަދަ ކޮންމެ ހަރަކާތަކަށް ޖަވާބުދާރީ ކުރުވާނެ ކަމަށްވެސް ޚާރިޖީ ވަޒީރުގެ ޕޯސްޓުގައި ބުނެފައި ވެއެވެ. އެހެންނަމަވެސް އޭގެ ތަފްސީލު ހާމަކޮށްފައެއް ނުވެއެވެ.

 ޚާރިޖީ ވަޒީރު ޝިބާނީ ރައްދު ދެއްވާފައި އެވަނީ މިދިޔަ އާދީއްތަ ދުވަހު ޓެލެވިޒަން މެދުވެރި ކުރައްވައި ސީރިއާގެ ޒުވާނުންނާ މުޚާތަބްކޮށް އީރާނުގެ ސުޕްރީމް ލީޑަރ އާޔަތު ﷲ އަލީ ޚާމަނާއި “ ސީރިއާގެ ސަލާމަތާ ރައްކާތެރިކަން ނަގާލައި މި ބަދަލު ގެނައިމީހުންނާ ދެކޮޅަށް ފިސާރި ގަދަ ހިތްވަރަކާއެކު ކޮޅަށް ތެދުވަން ޖެހޭނެކަމަށާއި އަދި ސީރިއާގެ ފަޚްރުވެރި ޒުވާނުންގެ ކޮނޑުގައި ހުޅަނގުގެ ނުފޫޒުން ސީރިއާ އަލުން މިނިވަންކުރަން އެޅިފައިމިވާ ޒިންމާ އޭގެ އެންމެ ފުރިހަމަ ގޮތުގައި އަދާކޮށް ނިންމާނެ ކަމަށް ޔަގީން ކުރައްވާކަމަށް “ ވިދާޅުވުމުން ކަމުގައި ބެލެވެއެވެ. ސީރިއާގެ ޒުވާނުންގެ ކުރިމަގެއް މިހާރަކު ނެތެވެ. މަގުތަކާއި ގެ ދޮރާއި ސްކޫލްތަކާއި ޔުނިވަރސިޓީތަކުގައިވެސް ރައްކާތެރިކަމެއް ނެތެވެ. ޚާމަނާއިގެ ވާހަކަފުޅުގައި އިތުރަށް ފާހަގަ ކުރެއްވިއެވެ.    

ސީރިއާގެ ކުރީގެ ރައީސް ބައްޝާރުލަ އަސަދުގެ 13 އަހަރުވީ ރިޔާސަތުގައި އީރާނާއެކު ވަރަށް ގާތް ގުޅުމެއް ގެންގުޅުއްވިއެވެ. އަދި ސީރިއާގެ މިލިޓްރީގެ ގާބިލުކަން ދެމެހެއްޓުމަށް ޓަކައި އީރާނުން ވަނީ ވަރަށް ބޮޑަށް ހޭދަ ކުރަމުންވެސް ގެންގޮސްފައެވެ. އަސަދުގެ ރިޔާސަތު ވެއްޓުމަކީ އީރާނަށާއި އީރާނުން މިލިޓްރީ އެހީތެރިކަން ފޯރުކޮށްދެމުންގެންދާ އެކްސިސް އޮފް ރެޒިސްޓޭންސް އިން މެދުއިރުމަތީގައި އެމެރިކާއާއި އިސްރާއީލުގެ ބާރު ފެތުރިގެން ދިޔަ ނުދިނުމަށް ކުރަމުން ގެންދާ މަސައްކަތަށް ލިބުނު ހީނަރުކަމެއް ކަމުގައި ބެލެވެއެވެ.         

ބައެއް މީޑިއާތަކުން ބުނެފައިވާ ގޮތުގައި ބައްޝާރުލް އަސަދު އާއިލާއާއެކު ގައުމު ދޫކުރައްވައި ފިއްލެވުމުގެ ކުރިން ސީރިއާގެ މިލިޓްރީއާބެހޭ ސިއްރު މައުލޫމާތުތަކެއް އިސްރާއީލާއެކު ވަނީ ހިއްސާ ކުރައްވާފައެވެ.