ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ފަސް ލެޕްޓޮޕް ވަގަށް ނަގައިފިއެވެ.
ފުލުހުން މިރޭ ބުނީ ފަރުކޮޅުފުށީގައި ހުންނަ އެ ކުންފުނީގެ އޮފީސް މީގެ ތިން ދުވަސް ކުރިން ފަޅާލައި ފަސް ލެޕްޓޮޕް ވަގަށް ނަގާފައިވާ ކަމުގެ ރިޕޯޓް މިއަދު ލިބިފައިވާ ކަމަށެވެ.
އެގޮތުން ލެޕްޓޮޕް ވަގަށް ނެގިކަމުގެ ތުހުމަތު ކުރެވޭ މީހާ މިހާރު ހޯދާފައިވާ ކަމަށާއި އޭނާ ހުރީ މަސްތުވާތަކެއްޗާ ގުޅޭ މައްސަލައެއްގައި ޖަލަށް ލާފައި ކަމަށް ފުލުހުން ހާމަކުރެއެވެ.
މިހާތަނަށް ކުރި މަސައްކަތުން ލެޕްޓޮޕްތައް އަދި ފެނިފައި ނުވާ ކަމަށާއި މި މައްސަލައިގައި ތުހުމަތުކުރެވޭ މީހާ ދަނީ ފުލުހުންނަށް އެއްބާރުލުން ދެމުން ކަމަށް ފުލުހުން ބުނެފައި ވެއެވެ.
އެޗްޑީސީގެ އޮފީހެއް ފަޅާލައި ފަސް ލެޕްޓޮޕް ވަގަށް ނަގާފައި މި ވަނީ އެ ކުންފުންޏާގުޅޭ ކަރަޕްޝަނުގެ ބޮޑެތި މައްސަލަތަކެއް ތަހުގީގު ކުރަމުން ދަނިކޮށެވެ.
