ރާއްޖޭގައި އިސްލާމިކް ޑިޖިޓަލް އެސެޓް ސެންޓަރެއް ގާއިމުކުރަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނިންމައިފިއެވެ.

އެމްއެމްއޭ އިން ކުރި އިއުލާނެއްގައި ވަނީ ރާއްޖޭގައި އިސްލާމިކް ޑިޖިޓަލް އެސެޓް ސެންޓަރެއް ގާއިމުކުރުމަށް ދިރާސާއެއް ކޮށްދޭނެ ބަޔަކު ހޯދަން އިއުލާނުކޮށްފައެވެ. އެމްއެމްއޭއިން ބުނީ މި ފަދަ ސެންޓަރެއް ގާއިމުކުރުމުގެ މަގުސަދުތަކުގެ ތެރޭގައި އިސްލާމީ ޝަރީއާ އާއި އެއްގޮތް ހައްލުތައް ގެނެސް މާލީ ބައިވެރިވުން އިތުރުކުރުން ހިމެނޭ ކަމަށެވެ.

ހަމައެހެންމެ ބޭރުގެ އިންވެސްޓަރުންގެ ޝައުގުވެރިކަން ސަރަހައްދީ ގޮތުންނާއި ތަންފީޒީ ގޮތުން އިތުރު ކުރުމާއި އިސްލާމީ ފިންޓެކް ދާއިރާ ކުރިއެރުވުމަކީވެސް މި ސެންޓަރު ގާއިމުކުރުމުގެ މަގުސަދެއް ކަމަށް އެމްއެމްއޭއިން ބުނެފައި ވެއެވެ.

އެހެންކަމުން މި ސެންޓަރު ތަރައްޤީ ކުރުމަށް ދިރާސާކުރުމާއި ގުޅޭ މައުލޫމާތު މި މަހުގެ 24 ވަނަ ދުވަހުގެ 11:00 ގެ ކުރިން ސާފުކޮށް މި މަހުގެ 29 ވަނަ ދުވަހުގެ 11:00 އަށް އަންދާސީ ހިސާބު ހުށަހަޅަން އެމްއެމްއޭއިން ވަނީ އެދިފައެވެ.