މާލެއަކީ ރާއްޖޭގެ ވެރިކަން ކުރާ ރަށެވެ. މިރަށުގެ ވަށައިގެންއޮންނަ ކަނޑުތޮށީގެ އެތެރެ ހިއްކާ ނިމި އެ ހިއްކާނިމުނު ބައިވެސް ވަނީ ގޯތިގެދޮރާ ޝޮޕިންގ ސެންޓަރު ތަކާ ރެސްޓްރާންޓް ތަކުން ފުރިފައެވެ. އެހެނަސް ރާއްޖޭގެ ވެރިކަމަށް ވަޑައިގަންނަވާ ގިނަބޭފުޅުންގެ ވިސްނުންފުޅުގައި ޒުވާނުން ކުޅިވަރު ކުޅޭނެ ހުސްބިންތަކާއި ނުވަތަ ދަނޑުތައް ހުންނަންޖެހޭނެ ކަމުގެ ޚިޔާލާތެއް ނެތެވެ.

މާލެ ފުރި ދެން ހަދާނެ ގޮތް ހުސްވުމާއެކު މާލެ ކައިރީގައި ހުރި ފަޅުތައް ހިއްކަން ފެށުނެވެ. އެ ފަޅުތަކުން ދިހަވަރަކަށް މާލެ ވަނީ ހިއްކިފައެވެ. ކަން މިހެން ހުރިނަމަވެސް މިދެންނެވި ބިންތަކުގައިވެސް ޒުވާނުން ކުޅޭނެ ބިންތަކެއް ނުވަތަ ދަނޑުތަކެއް ހަދާނުދެއެވެ. މިދެންނެވި ބޮޑުވަމުން ތޮއްޖެހެމުން އަންނަ މާލޭގެ ސަރަޙައްދުގައި ޒުވާނުންވެސް އަންނަނީ އިތުރުވަމުންނެވެ.އެކި ރޮނގުތަކުން ޒުވާނުނެ ބިނާކުރެވޭނެ މަގުތައް ތަނަވަސް ކޮށް ދިނުމަކީ ސަރުކާރުގެ މައްސޫލިއްޔަތެއްކަން ވެރިކަން ކުރައްވާ ބޭފުޅުންނަކަށް އެނގިވަޑައި ގަންނަވާ ހެނެއް ހީއެއް ނުވެއެވެ.ހުޅުމާލެއަކީ ހައެއްކަ އަކަކިލޯމީޓަރުގެ ބޮޑުމިން އެކުލެވިފައިވާ ރަށެކެވެ. އެރަށުގެ އާބާދީވެސް އަންނަނީ ހީވެސް ނުކުރާހާ މިންވަރަށް އިތުރުވަމުންނެވެ. އެ ރަށުގައި ދެލައްކައާއި ގާތްކުރާ މިންވަރަކަށް އާބާދީ އިތުރުވެފައިވާއިރު ގިނަ ޢަދަދެއްގެ ޒުވާނުންވެސް އެރަށުގައި ދިރިއުޅެމުން އެބަދެއެވެ. ޖަމާޢަތުގެ ތެރޭގައި އެކި ރޮނގުތަކުން ޒުވާނުން ބިނާކުރެވޭނެ މަގުތައް ތަނަވަސްކޮށް ދޭންޖެހޭ މިންވަރަށް އެ މަގުތައް ސަރުކާރުން ތަނަވަސްކޮށް ނުދިނުމުގެ ސަބަބުން ޖުމްލަކޮށް މާލޭގެ ސަރަޙައްދުގައި ދިރިއުޅޭ އެތައްހާސް ޒުވާނުން ވަނީ މަގުން ކައްސާލާ މުޖުތަމަޢުން ބާކީވެފައެވެ.

ހުޅުމާލެ ޕްލޭން ކުރެވިފައިވާއިރު އާބާދީގައި ހިމެނޭ ޒުވާނުން ކުޅޭނެ ދަނޑުތައް އިންތިހާއަށް މަދެވެ. މާލޭގައި ސަރުކާރުން އަޅާފައިވާ ދަނޑުތަކަކީ ކުލަބުތަކަށް ވިއްކާގޮތަށް ހަމަޖައްސާފައިވާ ދަނޑުތަކެކެވެ. އޭގެ ސަބަބުން ބައެއް ކުލަބުތަކުގައި ހިމެނޭ ޒުވާނުންނަށް ކުޅިވަރު ކުޅެވޭނެ ގޮތެއް ނެތެވެ. އެހެން ކަމާއެކު ހުޅުމާލެ ސިޓީގައި ހެދިފައިވާ ހައެއްކަ ދަނޑުގެ ބާރު ވަރަށް ބޮޑެވެ. ހުޅުމާލެ ސިޓީގެ ދަނޑުތައް ކުލަބު ތަކަށް ނުވިއްކި ނަމަވެސް އެ ސިޓީގައި ހިމެނޭ މަދު ދަނޑުތަކުގައި ކުޅެލެވެނީ އެ ސިޓީގެ ކުޅިވަރު އެކުވެނީގައި ރޭގަނޑު ހަތަރުދަމު ކިޔޫގައި ތިބެގެންނެވެ.
ހުޅުމާލެ ސިޓީގެ ދަނޑުތައް ދޫކުރަނީ ކޮންމެ ހަފުތާއެއްގެ ބުރާސްފަތި ދުވަހުގެ ހެނދުނު 8.30 ގައެވެ. ކުލަބަކަށް ކުޅެން ލިބެނީ ހަފުތާއަކު ދެ ދުވަހު އެއްގަޑި އިރެވެ. ހުޅުމާލެ ކުޅިވަރު އެކުވެނީގައި ކިޔޫގައި ތިބެގެން ބައެއްދުވަސް ދުވަހު ދަނޑު ނުލިބޭ ކްލަބުތައްވެސް މަދެއް ނޫނެވެ. އަނެއްކޮޅުން ގިނަފަހަރު ދަނޑުތައް އޮންނަނީ އެކި މުބާރާތްތަކަށް ދޫކޮށްފައެވެ. އެހެން ކަމުން މުބާރާތެއް ފަށާފައިވާ ދަނޑުތަކުގައި ޕްރެކްޓިސް ކޮށްލާނެ ވަގުތު އޮންނަނީ ނުލިބިފައެވެ.
ޒުވާނުންނަކީ ގައުމުގެ ކުރިމަގު ކަމަށް އަޑަށް ބާރުލާފައި ބުނުމަކުން އެ މަގުޞަދު ޙާޞިލެއް ނުވެއެވެ. ޒުވާނުންނަކީ ގައުމު އާރާސްތުކުރާ ބަޔަކަށް ހެދޭނީ ޒުވާނުން ކުރިއަށް ދާން ބޭނުންވާ ދޮރުތައް ހުޅުވައިދީ އަދި އެ ދޮރުތަކުން ޒުވާނުން ވައްދައި ޒުވާނުން އެކި އެކި ފަންނުތަކަށް އަހުލުވެރި ކޮށްގެންނެވެ. ނަމަވެސް ސަރުކާރަކަށްފަހު ސަރުކާރެއް ވުޖޫދު ވަމުން އަންނައިރު އެެއްވެސް ސަރުކާރަކުން ދިވެހި ޒުވާނުން ބައްޓަންވަމުން އަންނަނީ ކިހިނެއް ކޮން ގޮތަކަށް ކަން ދެނެގަނެވޭނެ މެކެނިޒަމެއް ގާއިމް ކުރައްވާފައެއް ނުވެއެވެ.

އެހެން ކަމާއެކު ގައުމުގެ % 60 އިންސައްތަ އަށްވުރެ މަދުނޫން ޢަދަދެއްގެ ޒުވާނުން ވަނީ މަގުން ކައްސާލައި މުޖުތަމަޢުގެ ނުރައްކަލަކަށް ވެފައެވެ.

ފާހަގަ ކޮށްލެވޭ އެއްކަމަކީ ކުޅިވަރުގެ ދާއިރާއިން ކުރިއަށް ދާން ބޭނުންވާ އެތައްސަތޭކަ ޒުވާނުންނަށް އެ ރޮގުން ފުރުޞަތު ލިބިފައިނުވާކަމެވެ. ހުޅުމާލެ ސިޓީގައި އަޅާފައި ހުރި އެކި ދަނޑުތަކުގައި އެކި ކުޅިވަރު ފަރިތަކުރަން ބޭނުންވާ ގިނަ ޒުވާނުންނަށް އެފުރުޞަތު ނުލިބޭ ކަމަށް ބައެެއްޒުވާނުން ބުނެއެވެ.ކުލަބުތަކަށް ހުޅުމާލޭގެ ދަނޑުތައް ދޫކުރަނީ ހިލޭއެވެ. އެހެނަސް މާލޭ ސަރަޙައްދުގައި އުފެދިފައިވާ ކުލަބުތައް ގިނަކަމާއެކު އެކުލަބުތަކުގައި ޙަރަކާތްތެރިވާ ޒުވާނުންނަށް ކިއޫގައި ރޭގަނޑު ހަތަރުދަމު ތިބެގެންވެސް އޮންނަނީ ދަނޑުތަކުގެ ބާރު ބޮޑުކަމުންނާއި އަދި ދަނޑުތަކުގައި ބާއްވަނުން ގެންދާ މުބާރާތައް ގިނަކަމުން ފަރިތަކޮށްލަން ދަނޑުތައް ނުލިބިފައެވެ. އެހެން ކަމާއެކު ސަރުކާރުން އެކަމަށް އިސްކަން ދީގެން ޒުވާނުން ކުޅިވަރުގެ ދާއިރާއަށް އަހުލުވެރި ކުރުވަން އިތުރު ދަނޑުތައް ތައްޔާރުކޮށް ޒުވާނުންނަށް ކުޅިވަރު ކުޅެވޭނޭ ގޮތްތައް ތަނަވަސްކޮށް ދޭން ޖެހެއެވެ.