ބޮލީވުޑްގެ ބަތަލާ އަދި ނެށުންތެރިޔާ މަލައިކާ އަރޯރާގެ ކުރީގެ ފިރިމީހާ އަރްބާޒް ޚާން ކައިރިން ވަރިވިއިރު ފައިސާގެ ބޮޑު އަދަދެއް އަރްބާޒްގެ އަތުން ނެގި ކަމަށް ގިނަ ބަޔަކު ތުހުމަތުކުރި ކަމަށް އޭނާ ބުނެފިއެވެ.
އަރްބާޒްއާއި މަލައިކާ ވަރިވެފައި ވަނީ 2017 ވަނަ އަހަރުގެ މެއި މަހުއެވެ. އޭރު އެ ދެ މީހުންގެ ކައިވެންޏަށް ވަނީ ފިރިހެން ދަރިއަކުވެސް ލިބިފައެވެ. އެއީ މިހާރު އުމުރުން 21 އަހަރުގެ އަރްހާން ޚާން އެވެ. ސަތާރަ އަހަރުގެ ދިގު ކައިވެނި ނިމުމަކަށް ގެންނަން ނިންމުމުން ނަފްރަތާ ކުރިމަތިވެ އޭނާއަށް ވުރެ މާ ޒުވާން އަރްޖުން ކަޕޫރާ ރައްޓެހިވުމުގެ ސަބަބުން މަލައިކާއަށް ވަނީ މިދިޔަ ދުވަސްތަކުގައި ގިނަ ބައެއްގެ ބޮޑެތި ފާޑުކިޔުންތަކެއް އަމާޒުވެފައެވެ. އެހެންކަމުން އެ ފާޑުކިޔުންތަކާ ފުރައްސާރައިގެ ސަބަބުން މަލައިކާ ވަނީ ވަރަށް ގިނަ ކަންތައްތަކެއް ތަހައްމަލުކޮށްފައެވެ.
ޕިންކްވިލާއަށް ދިން އިންޓަވިއުއެއްގައި މަލައިކާ ބުނީ އޭރު އިންޑަސްޓްރީގެ ގިނަ އަންހެނުން ވަރި ނުވާކަމަށެވެ. ނަމަވެސް އޭނާގެ ދަރިފުޅު އަރްހާން އަށްޓަކައި ވަރިވާން ނިންމީ ކަމަށް މަލައިކާ ބުނެފައި ވެއެވެ. މަލައިކާ ޔަޤީންކުރީ އޭނާ ހިތްހަމަ ނުޖެހިއްޖެނަމަ އެއްވެސް މީހަކު އުފާ ނުކުރެވޭނެ ކަމަށާއި ހާއްސަކޮށް ދަރިފުޅު އަރްހާން އުފަލުގައި ބަހައްޓަން އުނދަގޫވާނެ ކަމަށް އޭނާ ނިންމި ކަމަށް ބުނެފައި ވެއެވެ. އެހެންކަމުން އަރްބާޒް ކައިރިން ވަރިވިކަން ހާމަކޮށް މަލައިކާ ބުނީ މީހުން އެ ދުވަސްވަރު އޭނާއަށް ޖަޖުކޮށްފައި ވަނީ އަރްބާޒްގެ އަތުން ގިނަ އަދަދެއްގެ ފައިސާ ނެގި ކަމަށެވެ.
އެގޮތުން އެ އިންޓަވިއުގައި މަލައިކާ ވަނީ އެ ދުވަސްވަރު ކޮންމެސް މީހަކު ޝާއިއު ކުރި ލިޔުމެއްގައި އޭނާ ލައިގެން ހުރި ހެދުމަކާ ބެހޭ ގޮތުން މަލާމާތްކޮށް ހަގީގަތާ ހިލާފު ވާހަކަތަކެއް ލިޔުނުކަން ހަނދާންކޮށްފައެވެ. އެގޮތުން މަލައިކާ ލައިގެން ހުރި ހެދުމަކީ އަގުބޮޑު ހެދުމެއް ކަމަށްބުނެ ”ސާފުކޮށް އެނގޭ ގޮތުގައި“ އެ ހެދުން ގަނެވޭނީ ވަރިވަމުން އަރްބާޒްގެ އަތުން ގިނަ އަދަދެއްގެ ފައިސާ ނެގުމުން ކަމަށް އެ މީހަކު ތުހުމަތުކޮށްފައިވާ ކަމަށް މަލައިކާ ބުނެފައި ވެއެވެ.
އެ ވާހަކަ ދައްކަމުން މަލައިކާ ބުނީ އެ ލިޔުން ކިޔުމުން ދިރިއުޅުމުގައި ނިންމި ބޮޑެތި ކަންކަމުގެ މާނައެއް ނެތްކަން އިހުސާސުވެ، ސިހިގެން ދިޔަ ކަމަށެވެ.
1998 ވަނަ އަހަރު ކައިވެނި ކުރި މަލައިކާ އާއި އަރްބާޒް ވަނީ އެ ދެމީހުން ވަކިވުމަށްފަހު މިހާރު ”މޫވް އޮން“ކޮށްފައެވެ.
އެގޮތުން ޑިސެމްބަރު 24، 2023 ގައި އަރްބާޒް ޚާން ވަނީ ބޮލީވުޑްގެ މޭކަޕް އާޓިސްޓް ޝޫރާ ޚާން އާއި ކައިވެނި ކޮށްފައެވެ. މަލައިކާ 2018 ވަނަ އަހަރުން ފެށިގެން ދާދި ފަހަކާއި ޖެހެންދެން އުޅުނީ އަރްޖުން ކަޕޫރާއި ގުޅުން ރައްޓެހިވެގެންނެވެ. އެދެމީހުން އެކުގައި ގިނަ ދުވަސްތަކެއް ވަންދެން އުޅުމަށްފަހު މި އަހަރު ވަނީ ރުޅި ވެފައެވެ.
ބައެއް ރިޕޯޓްތައް ބުނާ ގޮތުގައި އަރްޖުން އާއި މަލައިކާ ވަކިވީ އެތަނުން އެކަކު ކައިވެނި ކުރަން ބޭނުންވި އިރު، އަނެކަކު ކައިވެނި ކުރަން ބޭނުން ނުވާތީ އެވެ.
