އިސްރާއީލުން ފާއިތުވި ދެ ދުވަސްތެރޭގައި ސީރިއާއަށް 480 ހަމަލާ ދީފިއެވެ.
އިސްރާއީލުގެ އަސްކަރިއްޔާއިން އަންގާރަ ދުވަހު ނެރުނު ބަޔާނެއްގައި ބުނީ ފާއިތުވި 48 ގަޑިއިރުގެ ތެރޭގައި ސީރިއާގެ ސްޓްރެޓެޖިކް އަސްކަރީ އަމާޒުތަކަށް ގާތްގަނޑަކަށް 480 ހަމަލާ ދީފައިވާ ކަމަށެވެ.
އިސްރާއީލުގެ އަސްކަރިއްޔާއާ ހަވާލާދީ މީޑިއާ ރިޕޯޓުތައްބުނާގޮތުން އެ އަސްކަރިއްޔާއިން ހަމަލާދިން ފެސިލިޓީތަކުގައި ގިނަ ސްޓްރެޓެޖިކް ހަތިޔާރުތަކެއް ވަނީ ރައްކާކޮށްފައެވެ.
އެގޮތުން ކަނޑުގެ ސިފައިންގެ 15 އުޅަނދާއި އެންޓި އެއާކްރާފްޓް ބެޓެރީ އާއި ހަތިޔާރު އުފައްދާ ތަންތަން ހިމެނެއެވެ.
އަދި ހަމައެހެންމެ ހަތިޔާރު ގުދަންތަކާއި ކަނޑުގެ ސިފައިންގެ އުޅަނދުފަހަރާއި ރިސާޗް ސެންޓަރެއް ވެސް ވަނީ ނައްތާލާފައި ކަމަށް ރިޕޯޓްތައް ބުނެއެވެ.
އިސްރާއީލުން ސީރިއާއަށް ދޭ ހަމަލާތަކަކީ ސީރިއާގެ ޑިފެންސް ބޭސްތައް ނައްތާލުމަށް އަމާޒުކޮށް ދެމުން އަންނަ ހަމަލާއެއްކަމަށް އަލްޖަޒީރާއިން ރިޕޯޓްކޮށްފައި ވެއެވެ. އިސްރާއީލުން ހަމަލާދީފައި ވަނީ ހުމްސް، ޤާމިޝްލީ، އަދި ދިމިޝްޤުގެ އެއާޕޯޓްތަކުގެ އިތުރުން ހަތިޔާރު ގުދަންތަކާއި އެހެނިހެން ސްޓްރެޓެޖިކް އަސްކަރީ ތަންތަނަށް ކަމަށް މީޑިއާ ރިޕޯޓުތައް ބުނެއެވެ.
އިސްރާއީލުން ސީރިއާއަށް ވަރުގަދައަށް ހަމަލާދޭން ފަށާފައި މި ވަނީ ރައީސް ބައްޝާރުލް އަސަދު ވެރިކަމާއި ގައުމުދޫކޮށް ފުރާވަޑައިގެންފައި ވަނިކޮށެވެ.
