އެޗްޑީސީގެ ފަރާތުން ފިޔަވައްޗަށް“ގޭމް ރޫމް“އެއް ހަދިޔާކޮށްފިއެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ފަރާތުން އެ ”ގޭމް ރޫމް“ ފިޔަވައްޗަށް ހަދިޔާކޮށްފައި ވަނީ ފިޔަވަތީގެ އަހަރީދުވަހުގެ ހަފްލާގެ ތެރެއިންނެވެ.
އިޖުތިމާއީ އަދި އާއިލީ ތަރައްޤީއާ ބެހޭ ވުޒާރާއިން ބުނީ މި ”ގޭމް ރޫމް“ އަކީ ދައުލަތުގެ ބެލުމުގެ ދަށުގައި ފިޔަވަތީގައި ތިބޭ ކުދިންނަށް އެ ތަނަކީ އުފާވެރި، އަދި ހިތްފަސޭހަ ތަނަކަށް ހެދުމާއެކު، ތަފާތު ކުޅިވަރުތައް އެކުދިންނަށް ކުޅެވޭނެ ގޮތަށް މަގުފަހިކޮށްދިނުމަށް އެޗްޑީސީގެ ފަރާތުން ވަރަށް ފުރިހަމައަށް ތައްޔާރުކޮށްފައިވާ ތަނެއް ކަމަށެވެ.
އެ ކުދިންނަށްޓަކައި މިހާ ފުރިހަމައަށް ”ގޭމް ރޫމް“ ތައްޔާރުކޮށްދިނުމުގައި އެޗްޑީސީގެ މުވައްޒަފުންނާއި މެނޭޖްމަންޓުން ފޯރުކޮށްދެއްވި ދީލަތި އެހީ ފާހަގަކޮށް އެ ވުޒާރާގެ ފަރާތުން އެޗްޑީސީގެ ޓީމަށް ވަނީ ޝުކުރުއަދާކޮށްފައެވެ.
