މުސްލިމުން އުޅެންވާގޮތް ހަތްއުޑުމަތިން ﷲ ސުބުޙާނަހޫ ވަތަޢާލާވަނީ އަންގަވާދެއްވާފައެވެ. ދިވެހި އިސްލާމީ މި އުންމަތަކީ ސައްތައިން ސައްތަ އިސްލާމީ އުންމަތެއް ކަމަށް ދިވެހި ޖުމްހޫރިއްޔާގެ ގާނޫނު އަސާސީގައި ކަޅާހުން ލިޔެފައި އޮވެއެެވެ. ގާނޫނުއަސާސީ ގައި ރާއްޖޭގެ ދީނަކީ އިސްލާމްދީން ކަމުގައި ލިޔެފައި ވީނަމަވެސް ރާއްޖޭގެ ރައްޔިތުންގެ ތެރެއިން ގިނަޢަދަދެއްގެ މީހުން އެކަން ހަނދާނެއް ނުހުރެއެވެ. އަދި ރައްޔިތުމީހާއަކީ މުސްލިމެއް ކަމުގައިވީ ނަމަވެސް ޙަރާމް ކުރައްވާފައިވާ ގިނަގުނަ ކަންކަން ކުރުމަކީ ދިވެހި ރައްޔިތުމީހާގެ ކުރިމަތީގައި މާބޮޑުކަމެއްނޫނެވެ.
ރާއްޖޭގެ ގިނަ ރައްޔިތުންގެ ހިތްތަކުގައި ރިޝްވަތުނެގުން އާދަވެފައިވަނީ ސަރުކާރުގެ މުވައްޒަފުންގެ ތެރެއިންނެވެ. ސަރުކާރުގެ މަތީ މަގާމު ފުރުއްވާ މުވައްޒަފު ރިޝްވަތު ނެގުމަށްޓަކާ ޢާންމު ރައްޔިތުންގެތެރެއިން އޭޖެންޓުން ކަނޑައަޅައި އެ އޭޖެންޓް މެދުވެރިކޮށް ސަރުކާރުގެ އެ މުވައްޒަފު ރިޝްވަތު ނަގަނީ އޭޖެންޓަށްވެސް ބައެއްއަޅާގޮތަށެވެ. އަދި މިދެންނެވި އޭޖެންޓާއި ގުޅިފައިވާ އެތަކެއް މުސްލިމް ރައްޔިތުން ވެސް ތިބެއެވެ. އެހެންކަމުން މުސްލިމް އުންމަތުގެތެރޭގައި ރިޝްވަތުގެ ވަބާފެތުރެމުންގޮސް އެކަންވަނީ ޢާންމުވެ ޙައްދުން ނައްޓާލާފައެވެ.
މިކަންކަން ހުއްޓުވާނޭ ފަރާތެއް ނެތެވެ. ރާއްޖޭގެ ތަޙުގީގީ އިދާރާތަކުގެ ބައެއް މުވައްޒަފުންނާއި ޢަދުލުއިންޞާފުގެ ދާއިރާގައި ހިމެނޭ ބައެއް ފަނޑިޔާރުންނާއި އަދި ސަރުކާރުގެ އޮފީސްތަކުގެ ތެރެެއިން ކިޔޫޖެހިގެން ރައްޔިތުން ޚިދުމަތްހޯދާ ބައެއް އިދާރާތަކުގައި ވަނީ ރިޝްވަތުގެ ބޮޑެތި ހާލިތައް އުފެދިފައެވެ. މީގެ އިތުރުން މުއްސަނދި ވުމަށްޓަކާ ރައްޔިތުންގެ ފައިސާއަށް ޚިޔާނާތްތެރިވާ ބައިގަނޑެއްވެސް ސަރުކާރުގެ ތެރެއިންނާއި އަދި ބައެއް މަހުޖަނުންނާއި ގުޅިފައިވާ އެތަކެއް ރައްޔިތުން މި އިސްލާމީ ދިވެހި އުންމަތުގެ ތެރޭގައި ވަނީ ހައްދެއްނެތް މިންވަރަށް އުފެދި އިތުރުވެފައެވެ.
ރިޝްވަތަށް ދިވެހިން ކިޔާ އުޅޭ ނަމަކީ ސައެވެ. ސައެއްނުދީ ސަރުކާރުގެ އޮފީހަކުންވިޔަސް އަދި ރައްޔިތުންނަށް އެކި އެކި ޚިދުމަތް ފޯރުކޮށްދޭ ފަރާތަކުންވިޔަސް އަވަސް ރަޙުމަތެއްގައި އެއްވެސް ކަމެއް ޙަޞިލެއް ނުކުރެވެއެވެ. އަނެއްކޮޅުން ދޮގުބުނުމަކީވެސް މި އިސްލާމީ އުންމަތުގައި ޝާމިލްވާ ގިނަބައެއްގެ އާދައަކަށް އެވަނީ ވެފައެވެ. ރާއްޖޭގެ ރައްޔިތުންގެ ތެރޭގައި އެއްޖިންސުން ގުޅުން ހިންގުމާއި ހަށިވިއްކުމާއި ޒުވާން އަންހެން ކުދީންނަށް ފައިސާ ޓްރާސްފަރ ކޮށްގެން އެ ކުދީންގެ ބަރަހަނާ މަޒަރުތައް ވީޑިއޯ ކޯލްމެދުވެރިކޮށް ބަލަމުން ދިއުމަކީވެސް ޢާންމު ވެފައިވާ ކަމެކެވެ.
މިފަދަ ޙަރާމް އެތަކެއް ޖަރީމާ ހިންގުމަކީ މި އިސްލާމީ އުންމަތުގެ ތެރޭގައި ޢާންމުވެފައިވާ ކަން ކަމެވެ.
އަދި ވައްކަން ކުރުމަކީ ވެސް ސަރުކާރުގެ އެންމެ މަތިން ފެށިގެން އެންމެ އާދައިގެ މުވައްޒަފާ ހަމައަށް ޢާންމު ވެފައިވާކަމެކެވެ. ސައްތައިން ސައްތަ އިސްލާމީ ގައުމެއް ކަމަށް ފޮތެއްގައި ލިޔެފައި ވީ ނަމަވެސް މިރާއްޖޭގެ ރައްޔިތުންގެ ތެރެމޭގައި ހިމެނޭ ގިނަމީހުންނަކީ ﷲ ހަރާމްކުރައްވާފައިވާ ބޮޑެތި ފާފަތަކަށް އުފަލާއެކު އަރައިގަންނަ މީހުންނެވެ.
އިސްލާމީ އުންމަތެއްގެ ސިފަ ގެއްލިފައިވާ ދިވެހިރާޖޭގެ ގިނަ މުސްލިމުންވަނީ އިސްލާމްދީނުގެ ޢިއްޒަތާ ކަރާމަތަށް ނުބަލާއިރު އަދި ﷲ ގެ ކުރިފުޅުމަތީގައި ތިމާހުއްޓި ކޮޅަށް ހުންނަންޖެހޭ ދުވަސްމަތިންވެސް ޣާފިލްވެފައިވާބައެކެވެ. އަނބިން ދަރީންނާއި އަދި ތިމާ ޙަރާމްތަކެތި ކައިބޮެއި އެތަކެތީން އޮނޮއޮރިޔާން ނިވާކޮށް ޙަރާންފައިސާއިން ފުލެޓާއި ގެދޮރުގަނެ އެތަންތާގައި ދިރިއުޅެމުންދާއިރު އެ އުޅެވެނީ އަލިފާނުގައި އަލިފާން ކައިބޮއި އަލިފާނުގެ ފޭރާން ލައިގެން ކަން ނޭގޭ މީހުން މުސްލިމުންނަށް ވާނެ ހެއްޔެވެ.
މި ސައްތައިން ސައްތަ ގައުމުގައި ފަސްލައްކަ މީހުން ހަމަނުވާއިރު މި މަދުމީސްކޮޅުގެ ތެރޭފައި ﷲ ނަހީކުރެއްވިހާ ނުބައިކަމެއް ޢާންމުވެ އެދަނީ ވަލިއްޔުލް އަމްރުގެ ނާގާބިލްކަމާއި އަދި ވަލިއްޔުލްއަމުރުގެ ޒިންމާއާއި މައްސޫލިއްޔަތަށް އިހުމާލު ވުމުގެ ސަބަބުންނެވެ. ގިޔާމަތް ދުވަސް އަންނާނެއެވެ. މިދުނިޔެ މަތީގައި ޙަރާމް މުދަލާއި ފައިސާއިން ލައްޒަތާ އަރާމް ހޯދައިގެން މިއަދު އުޅެވުނަސް އެދުވަހު އެ އަރާމް ލިބެނިވި ގޯއްޗަކީ ނަރަކަ ކަން ތިމާއަކީ މުސްލިމެއް ކަމުގައިވާނަމަ އެނގޭނެއެވެ.
ރާއްޖޭގެ މާދަމާގެ މުސްތަގްބަލް ކަމުގައިވާ ޒުވާން ޖީލު އުފެދި ބޮޑެތިވަމުން އެ އަންނަނީ ސީދާމަގު ދޫކޮށް ކަތިމަގުތަކުންނެވެ.ގައުމެއްގެ ޒުވާނުން ﷲ ގެ މަގުގައި ތަރުބިއްޔަތުެ ނުލިބި އިބިލީހުގެ ފަހަތުން ހިނގަމުންދާނަމަ އެގައުމެއްގައި އިސްލާމުންނެއް ނުތިބޭނެއެވެ. މަންމަވެސް އަދި ބައްޕަވެސް ބޭނުމީ ދަރިފުޅުގެ އަތުން ބޮޑެތި ޢަދަދު ތަކުން ފައިސާއެވެ. އެއީ ކޮންމެ ގޮތަކަށް ހޯދި ފައިސާއެއް ކަމުގައި ވިޔަސް ހަމަ އޯކޭއެވެ. މިހެން އޮތް ގައުމެއްގެ ރައްޔިތުންނަކީ ސައްތައިން ސައްތަ އިސްލާމުން ކަމަށް ފޮތުގައި ލިއުނު މީހުން ފާފަވެރި ނުވާނެ ކަމަށް ހީނުކުރާށެވެ.
.
