އަލިމަސް ކާނިވަލުގެ ސްޓޭޖު ތަޅާލައި، އެތަނުގައި އާ ސްޓޭޖެއް އަޅައިދޭނެ ބަޔަކު ހޯދަން އިއުލާންކޮށްފިއެވެ.
އަލިމަސް ކާނިވަލުގެ ސްޓޭޖް ތަޅާލުމަށް ފަހު، އެތަނުގައި އާ ސްޓޭޖެއް އަޅައިދިނުމުގެ މަސައްކަތް އަމިއްލަ ތަކެތީގައި ކޮށްދޭނެ ފަރާތެއް ހޯދަން ބޭނުންވާ ކަން ހާމަކޮށްފައި ވަނީ މާލެ ސިޓީ ކައުންސިލުން އިއްޔެ ކުރި އިއުލާނެއްގައެވެ.
ސިޓީ ކައުންސިލުން ބުނީ އެ މަސައްކަތަށް ޝައުގުވެރިވާ ފަރާތްތަކުން މި މަހު 16 ގެ ކުރިން ބީލަން ހުށަހަޅަން ޖެހޭނެ ކަމަށާއި ބީލަން ހުޅުވުން ވެސް އޮންނާނީ ހަމަ އެ ދުވަހު، ސިޓީ ކައުންސިލްގެ އިދާރާގައި ކަމަށެވެ.
އެގޮތުން މި މަސައްކަތާ ހަވާލުވާ ފަރާތުން ކާނިވާގައި މިހާރު ހުރި ސްޓޭޖު ތަޅާލައި، އާ ސްޓޭޖުގެ ކޮންސެޕްޓް ޑިވެލޮޕްކޮށް، އިންޖީނިއަރިންނާއި ޑްރޯވިންގްސް ތައްޔާރުކޮށް ހުއްދަތައް ހޯދަންޖެހޭނެ ކަމަށާއި އާ ސްޓޭޖުގެ ސްޓްރަކްޗާ ހަދައި ފިނިޝިންގެ ހުރިހާ މަސައްކަތަކާއި އެ ސްޓޭޖުގެ އިލެކްޓްރިކް އަދި ޕްލަމްބިންގެ ހުރިހާ މަސައްކަތެއް ވެސް ކޮށްދޭން ޖެހޭނެ ކަމަށް ސިޓީ ކައުންސިލުގެ އިއުލާނުގައި ބުނެފައި ވެއެވެ.
މި މަސައްކަތަށް ބީލަން ހުށަހެޅޭނީ ވިޔަފާރި ކުރުމުގެ ހުއްދަ ލިބިފައިވާ ދިވެހި ކުންފުނިތަކަށެވެ.
ކާނިވާ ސަރަހައްދަކީ ރާއްޖޭގައި ހިންގާ ބޮޑެތި ސިޔާސީ ހަރަކާތްތައް ހިންގާ މައިދާނެކެވެ. މިގޮތުން ރިޔާސީ ކެންޑިޑޭޓުންނަށް ރިޔާސީ ޓިކެޓު އެރުވުމާއި، ބޮޑެތި މުޒާހަރާތައް އެ ސަރަހައްދުގައި ބާއްވައެވެ.
