ނ. ހޮޅުދޫގައި ޒަހަމްތަކަކާ އެކު މަރުވެފައި އޮއްވާ ފެނުނު އެ ރަށު، މާރަނގަ، ޒަކިއްޔާ މޫސާ50އ މަރުވާން ދިމާވި ސަބަބެއްގެ ގޮތުގައި ޑޮކްޓަރުން ފާހަގަކޮށްފައި ވަނީ ކަރަށް ލިބިފައިވާ ޒަޚަމްތަކުގެ ސަބަބުން ކަމަށާއި މީހަކު އޭނާ މަރާލި ކަމުގެ ހެއްކެއް މިހާތަނަށް ލިބިފައިނެތް ކަމަށް ފުލުހުން މިއަދު ބުނެފިއެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ޗީފް އިންސްޕެކްޓާ އޮފް ޕޮލިސް މުހައްމަދު ސާމިހު ވިދާޅުވީ ޑޮކްޓަރުގެ ބަހުން ޒަކިއްޔާ މަރުވާން ދިމާވި ސަބަބެއްގެ ގޮތުގައި ފާހަގަކޮށްފައި ވަނީ ކަރަށް ލިބިފައިވާ ޒަޚަމްތަކުގެ ސަބަބުން ކަމަށެވެ. އަދި ފުލުހުންގެ ތަހުގީގަށް މިހާތަނަށް އޭނާ މަރާލިކަމުގެ އެއްވެސް ހެއްކެއް ފާހަގަކުރެވިފައި ނެތް ކަމަށް ސާމިހު ވިދާޅުވެފައި ވެއެވެ.
ހަމައެހެންމެ ޒަކިއްޔާގެ ހަށިގަނޑު ބެލި ބެލުމުން ތޫނު އެއްޗަކުން އޭނާގެ ކަރުގެ ކަނާތްފަރާތާއި ވައަތް ފަރާތަށް ފުންކޮށް ގިނަ ޒަޚަމްތަކެއް ލިބިފައި ހުރި ކަމަށާއި ކަރުގައި މެދާއި ހިސާބުގައި ތިލަކޮށް އެއް ޒަޚަމް ލިބިފައި ހުރި ކަމަށް ސާމިހު ވިދާޅުވެފައި ވެއެވެ.
މީގެ އިތުރުން މިހާތަނަށް ތަހުގީގަށް ފާހަގަވެފައިވާ ގޮތުން ޒަކިއްޔާގެ މަރުގައި އިތުރު އެއްވެސް ފަރާތެއްގެ ބައިވެރިވުން ހިމެނޭ އެއްވެސް ހެއްކެއް ފެންނަން ނެތުމާއެކު އެ މައްސަލާގައި އިތުރު މީހެއްގެ ބައިވެރިވުމެއް އޮތްކަން މިހާތަނަށް ތަހުގީގަށް ފާހަގަކުރެވިފައި ނުވާކަމަށް ފުލުހުން ވަނީ ހާމަކޮށްފައެވެ.
ޒަކިއްޔާގެ މަރަށް ދެ މަހަށްވުރެ ގިނަ ދުވަސްވެފައިވާއިރު އެ މަރުގެ ހަގީގަތް ދެނެގަނެވިފައި ނުވާތީ އެ ރަށު ރައްޔިތުން ވަނީ ދާދިފަހުން ކަންބޮޑުވުން ފާޅުކޮށް މައްސަލަ ތަހުގީގު ކުރުމަށް ގޮވާލައި އިހުތިޖާޖުވެސް ކޮށްފައެވެ.
