ހުޅުމާލޭގެ ބީޗް ސައިޑާއި ބީޗް ފްރަންޓުން ދިރިއުޅުމަށް ބީލަން އުސޫލުން 10 ބިން ވިއްކަން ނިންމައިފިއެވެ.
އެޗްޑީސީން ކުރި އިއުލާނެއްގައި ބުނީ އެ ކުންފުނިން ދިރިއުޅުމަށް ބީލަން އުސޫލުން ހުޅުމާލޭން 10 ބިމެއް ވިއްކުމަށް ހަމަޖެހިފައިވާ ކަމަށެވެ.މި ބިންތަކަށް އުމުރުން 18 އަހަރުވެފައިވާ ކޮންމެ ދިވެރި ރައްޔިތަކަށްވެސް ބީލަން ހުށަހެޅޭނެ ކަމަށް އެޗްޑީސީން ހާމަކުރެއެވެ.
އެގޮތުން ވިއްކަންހަމަޖެހިފައިވާ މި 10 ބިމުގެ ތެރޭގައި ހިމެނެނީ ބީޗް ފްރަންޓުން ވިއްކާ ތިން ބިމާއި ބީޗް ސައިޑުން ވިއްކާ ހަތް ބިމެކެވެ.
އެޗްޑީސީން ބުނީ ބީޗް ފްރަންޓުން 1559 އަކަފޫޓާއި 3250 އަކަފޫޓާ ދެމެދުގެ ބިންތަކެއް ވިއްކަން ހުޅުވާލާފައި ވާއިރު ބީޗް ސައިޑުން ވިއްކަން ހުޅުވާލާފައި ވަނީ 1230 އަކަފޫޓާއި 1534 އަކަފޫޓާ ދެމެދުގެ ބިންތަކެކެވެ.
މީގެ އިތުރުން އެޗްޑީސީން ބުނީ ބީޗް ފްރަންޓް ބިންތަކުގެ ބީލަން ފެށޭ އަގަކީ 4500 ރުފިޔާ ކަމަށާއި ބީޗް ސައިޑުން ވިއްކާ ބިންތަކުގެ ބީލަން ފެށޭ އަގަކީ 4000 ރުފިޔާ ކަމަށެވެ.
