މާލޭގެ އެއްވެސް ތަނެއްގައި ހުއްދަނެތި ޕޯސްޓަރު ނުހިއްޕޭގޮތް ހެދުމުގެ މަސައްކަތް ކުރަމުން އަންނަ ކަމަށް މާލެ ސިޓީ ކައުންސިލުން ބުނެފިއެވެ.
މިކަންހާމަކުރައްވާފައި ވަނީ ސްޓެލްކޯއިން ކަރަންޓު ބޯޑުތައް ސާފުކުރުމަށް ފެށި ”ޗާލުވެށި މަގޭ ޒިންމާ“ މަޝްރޫއު އިފުތިތާހުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން މާލެ ސިޓީ ކައުންސިލްގެ މޭޔަރު އާދަމް އާޒިމްއެވެ.
އެގޮތުން އާޒިމް ވަނީ މާލޭގެ މަގުމަތީގައި ހުރި ކަރަންޓު ފޮށިތަކުގައި ސިޔާސީ ގިނަ ބައެއްގެ ފޮޓޯތައް ހިއްޕާފައި ހުރިކަން ފާހަގަކޮށް އަނެއްކާވެސް ކޮންމެވެސް އެހެން ކެމްޕެއިނެއްގެ ތެރޭގައި ވެސް ސިޔާސީ މީހުންގެ ފޮޓޯތައް ފެނިގެންދާނެކަން ހާމަކޮށްފައެވެ.
އެހެންކަމުން އާޒިމް ވަނީ ހުރިހާ ސިޔާސީ ފަރާތްތަކުންވެސް އަދި އެހެން ފަރާތްތަކުންވެސް އެއްގޮތަކަށްވެސް ސްޓެލްކޯގެ ފޮށިތަކުގައި އެއްްވެސް އެއްޗެއް ނުހިއްޕުމަށް އިލްތިމާސް ކުރައްވާފައެވެ.
މީގެ އިތުރުން މާލޭގެ އެއްވެސް ތަނެއްގައި ޕޯސްޓަރު ނުހިއްޕޭ ގޮތަށް ހަދަން މަސައްކަތްތަކެއް ކުރަމުން އަންނަ ކަމަށާއި އޭގެ ބަދަލުގައި ޕޯސްޓަރު ހިއްޕޭނެ ވަކި ތަންތަން ފާހަގަކޮށް އެކަމަށް ވަކި ޕްރޮޖެކްޓެއްގެ ގޮތުގައި ހިންގުމުގެ މަސައްކަތް ކުރަމުން އަންނަ ކަމަށް އާޒިމް ވަނީ ހާމަކުރައްވާފައެވެ.
