ދަރުމަވަންތަ ހޮސްޕިޓަލާ ދިމާލު ބޭރުން މޫދުން ޒަހަމްތަކަކާއެކު ފެނުނު މީހާ ނިޔާވެއްޖެއެވެ.
ޒަހަމްތަކަކާއެކު މިއަދު މޫދުން ނެގީ 51 އަހަރުގެ ދިވެހި ފިރިހެނެކެވެ.
ފުލުހުން މިއަދު ބުނީ ދަރުމަވަންތަ ހޮސްޕިޓަލާ ދިމާލު ބޭރު ތޮށިގަނޑާ ދިމާލުން މޫދުގައި އަނިޔާތަކަކާއެކު އޮތް ދިވެހި ފިރިހެނަކު ފެނިގެން އައިޖީއެމްއެޗަށް ގެންގޮސްފައިވާ ކަމަށެވެ. އެގޮތުން އައިޖީއެމްއެޗްގެ ޑޮކްޓަރުންނާ ހަވާލާދީ ފުލުހުން ބުނީ މޫދުން ފެނުނު މީހާގެ ބޮލަށް އަނިޔާވެފައިވާ ކަމަށެވެ.ފުލުހުން ބުނީ އޭނާއަށް އަނިޔާވެފައި ވަނީ އުޅަނދެއްގައި ޖެހިގެން ކަމަށެވެ.
ފުލުހުން މިރޭ ބުނީ ޒަހަމްވެފައި އޮއްވާ މޫދުން މިއަދު ނެގި މީހާއަށް އައިޖީއެމްއެޗްގައި ފަރުވާދެމުން ދަނިކޮށް، އެ މީހާ މަރުވެފައިވާ ކަމަށެވެ.
ފުލުހުން ދަނީ މި މައްސަލަ ތަހުގީގު ކުރަމުންނެވެ.
