މި މަހު ކުރީކޮޅު އޮތް އެމެރިކާގެ ރިޔާސީ އިންތިޚާބު ޑޮނަލްޑް ޓްރަމްޕް ކާމިޔާބު ކުރެއްވުމުގެ އުފާފާޅުކުރަމުން އިންޑިޔާގެ އެންމެ މުއްސަނދި އެއް މަހުޖަނު ކަމަށްވާ ގޯތަމް އަޑާނީ ވަނީ އެމެރިކާގެ އެނާރޖީ އަދި އުމްރާނީ ޕްރޮޖެކްޓުތަކެއްގައި 10 ބިލިއަން ޑޮލަރު އިންވެސްޓް ކުރާނެކަން އިއުލާނުކޮށްފައެވެ.

ނަމަވެސް އެމެރިކާއިން މިހާރު މިވަނީ އަޑާނީއާ ދެކޮޅަށް ކޮރަޕްޝަންގެ ބޮޑު ދައުވާއެއް އުފުލާފައެވެ. އެމެރިކާގެ ފެޑެރަލް ޕްރޮސެކިއުޓަރުން ދައުވާ ކުރާ ގޮތުގައި 250 މިލިއަން ޑޮލަރުގެ ރިޝްވަތުގެ ”ސްކީމެއް“ އަޑާނީ ވަނީ ފަށާފައެވެ. އެއީ ދެ ބިލިއަން ޑޮލަރުގެ ފައިދާއެއް ލިބޭނެ ޕްރޮޖެކްޓުތަކެއް ހޯދުމަށެވެ. ނަމަވެސް އަޑާނީ ގްރޫޕުން ވަނީ މިކަން ދޮގު ކޮށްފައެވެ.

އުމުރުން 62 އަހަރުގެ ބިލިއަނަރު، އަދި ބޮޑުވަޒީރު ނަރެންދުރަ މޯދީއާ ގާތް ގުޅުމެއް އޮންނަ ގޯތަމް އަޑާނީގެ ވިޔަފާރީގެ ޖުމްލަ އަގު 169 ބިލިއަން ޑޮލަރަށް އަރައެވެ. މައިގަނޑު ގޮތެއްގައި ޕޯޓުތައް ހެދުމާއި ރިނިއުއަބަލް އެނާޖީ ޕްރޮޖެކްޓް ތަކުގައި އިންވެސްޓް ކޮށްފައިވާ އަޑާނީ ގްރޫޕްގެ ވިޔަފާރިއަށާ ޖުމްލަ ކޮށް މުޅި އިންޑިޔާގެ އިގްތިސާދަށް،އެމެރިކާގައި އުފުލުނު ދައުވާގެ ސަބަބުން ވަރަށް ބޮޑަށް ނޭދެވޭ އަސަރު ކުރާނެއެވެ.

ބުރާސްފަތި ދުވަހު އެކަނިވެސް އަޑާނީ ގްރޫޕްގެ ކުންފުނިތަކަށް ވަނީ 34 ބިލިއަން ޑޮލަރުގެ މާކެޓް ވެލިއު ގެއްލުންވެފައެވެ.
އަނެއްކޮޅުން އިންޑިޔާގެ މުޅި އިގުތިސާދު ވެސް ވަނީ އަޑާނީއާއި ގުޅިލާމެހިފައި ކަމަށްވެއެވެ. މިގޮތުން 30 އިންސައްތަ ހިއްސާއާއެކު 13 ޕޯޓެއް އަޑާނީ ގްރޫޕުން ހިންގާއިރު، 23 އިންސައްތަ ”ޕެސެންޖާ ޓްރެފިކް“ ގެ ފައިދާ ލިބޭ ގޮތަށް 7 އެއާޕޯޓެއް ހިންގައެވެ. މީގެއިތުރުން އިންޑިޔާގެ ދެވަނަޔަށް އެންމެ ބޮޑު ސިމެންތި ވިޔަފާރީގެ 20 އިންސައްތަވެސް އަޑާނީ އަށް ނިސްބަތްވެއެވެ.

ކޯލް ނުވަތަ ބޯޓުދެލި ބޭނުންކޮށްގެން ހިންގާ ހަ އިންޖީނުގެ އަޑާނީގެ ވިޔަފާރިއަށް ނިސްބަތްވާއިރު އެއީ މުޅި އިންޑިޔާއަށް ހަކަތަ ފޯރުކޮށްދޭ އެންމެ ބޮޑު އަމިއްލަ ކުންފުންޏެވެ. ގުދުރަތީ ގޭސް ފޯރުކޮށްދިނުމަށް ހާސް ކިލޯމީޓަރުގެ ޕައިޕްލައިން ނެޓްވާކެއް އެފަރާތުން އޮޕަރޭޓް ކުރާއިރު، އިންޑިޔާގައި މިހާތަނަށް ހެދޭ އެންމެ ދިގު ”އެކްސްޕްރެސްވޭ“ ނުވަތަ ހައިސްޕީޑް މަގުވެސް ހަދަމުން ގެންދަނީ އަޑާނީ ގްރޫޕުންނެވެ.

މީގެއިތުރުން އިންޑިޔާގެ އެންމެ ބޮޑު ސްލަމް ނުވަތަ ފަގީރު ސަރަހައްދު ތަރައްގީ ކުރުމުގެ މަސައްކަތްވެސް ވަނީ އަޑާނީ ގްރޫޕާ ހަވާލުކޮށް އެމަސައްކަތްވެސް ވަނީ ފަށާފައެވެ.
އަޑާނީ ގްރޫޕްގެ ދަށުން ހިންގާ ކުންފުނި ތަކުގައި 45,000 މީހުން ވަޒީފާ އަދާކުރަމުން ގެންދެއެވެ.

އެމެރިކާއިން ދައުވާކޮށްފައިވަނީ އަޑާނީ އާއި އޭނާއާއި ގާތް ބައެއް ފަރާތްތަކުން އިންޑިޔާގެ އޮފިޝަލުން ނަށް ރިޝްވަތު ދިން ކަމުގެ ތުހުމަތުގައެވެ. ނުވަތަ ރިޝްވަތު ދިނުމަށް ހުށަހެޅިކަމުގެ ތުހުމަތުގައެވެ. މިއީ މިކަން ކުރެވޭނެ ގޮތެއް ހެއްޔެވެ؟

ގުޅިލާމެހިފައިވާ މިއަދުގެ ދުނިޔޭގައި އެހެން ގައުމެއްގައި ކަންތައް ކުރާގޮތަކުން އެމެރިކާގެ މާކެޓަށް ނުވަތަ އިންވެސްޓަރުންނަށް ނޭދެވޭ އަސަރު ކުރާނަމަ އެމެރިކާއަށް ފިޔަވަޅު އެޅޭ ކަމަށް ވެއެވެ. ޚާއްސަކޮށް އެވިޔަފާރިއަކުން އެމެރިކާގެ ހިއްސާގެ ބާޒާރުގައި އިންވެސްޓްކޮށް، އެމެރިކާގައި އޮޕަރޭޝަން ތައް ހިންގާ، ބޮންޑް އަދި ލޯން ފަދަ މުއާމަލާތު ތަކުގެ ތެރެއިން އެމެރިކާގެ އިގްތިސާދަށް އަސަރު ކުރާނެ ފަދަ ކަންތައް ތަކެއް ހިންގާނަމަ އެކަން ސަރުކާރުން ބަލާނެއެވެ.

އަޑާނީގެ މައްޗަށް ދައުވާ އުފުލުނީ އެތައް އިދާރާތަކެއް ގުޅިގެން އަހަރެއްހާ ދުވަހު ބެލުންތަކެއް ބެލުމަށްފަހުއެވެ. މިގޮތުން ސެކިއުރިޓީސް އެންޑް އެކްސްޗޭންޖް ކޮމިޝަނުން ވެސް ވަނީ ބެލުން ތަކެއް ބަލާފައެވެ. މިގޮތުން ބަލާފައިވާ އެއް މައްސަލައިގައި، އަޑާނީގެ ސޯލާ ޕަވާ ކުންފުނި ”އެޒުއާ ޕަވާ“ އަކީ ޑެލްހީގައި ގާއިމް ކުރެވުނު ކުންފުންޏެއްނަމަވެސް ނިއުޔޯކް ސްޓޮކް އެކްސްޗޭނަޖް ގައި އިންވެސްކޮށް ކުންފުނީގެ ކެޕިޓަލް އިތުރުކޮށްފައި ވެއެވެ. އަދި އަޑާނީގެ ވިޔަފާރިއަށް ކުރާ ނޭދެވޭ އަސަރު ނިއުޔޯކް ސްޓޮކް އެކްސްޗޭންޖަށް އައީ ކުރަމުންކަން އެފަރާތުން ފާހަގަކޮށްފައިވެއެވެ.

އެމެރިކާގެ ދައުވާގައި ވަނީ އަޑާނީގެ ރިނިއުއަބަލް އެނާޖީ ދެކުންފުނީގެ ވެރިން މަލްޓިބިލިއަން ޑޮލަރުގެ އަގުހުރި ދެޕްރޮޖެކްޓަކުން ނާޖާއިޒު ފައިދާ ނަގަން އުޅުމުގެ ކުށުގައެވެ.
މިދައުވާއާއި ގުޅިގެން އަޑާނީގްރޫޕުން ދަނީ މަތީ ފެންވަރުގެ ލީގަލް ޑިފެންސް ޓީމެއް އެކުލަވާލަމުންނެވެ.