މަޝްހޫރު ސީރީޒް “ދަ ވެމްޕަޔަރ ޑައިރީސް” ގައި “އެންޒޯ” ގެ ރޯލުން މަޝްހޫރުވި އިނގިރޭސި އެމެރިކާގެ އެކްޓަރު މައިކަލް މަލާކީ ސްޓޭޖުގައި ސްޓާބަކްސް ކޮފީ ބޯން ދެކޮޅު ހަދާ ވީޑިއޯ ކްލިޕެއް ސޯޝަލް މީޑިއާގައި ޢާއްމުވެއްޖެއެވެ. މި ގޮތަށް ސްޓާބަކްސް ކޮފީ ބޯން އިންކާރު ކުރިއިރު މި އިވެންޓް ސްޕޮންސަރ ކޮށްފައިވަނީވެސް ސްޓާބަކްސްއިންނެވެ.

އުމުރުން 41 އަހަރުގެ މަލާކީ ބުނިގޮތުގައި އޭނާ ސްޓާބަކްސް ކޮފީއަށް ދެކޮޅުހެދީ މިއީ ޣައްޒާގައި އިސްރާއީލުން ކުރަމުންދާ ލާއިންސާނީ ޢަމަލުތަކަށް ތާއީދު ކުރާ މަޝްހޫރު ކެފޭ ޗެއިންއަކަށްވާތީ އެތަން ބޮއިކޮޓްކުރުމަށް ބާރުއެޅުމުގެ ގޮތުން ކަމަށެވެ.
2023 ވަނަ އަހަރުގެ އޮކްޓޯބަރު މަހުގެ 7 ފެށިގެން އިސްރާއީލުން އަންނަނީ ޣައްޒާގައި ފަލަސްޠީނުގެ ނަސްލު ނައްތާލުމުގެ ރަޙުމެއްނެތް ޖަރީމާތައް ހިންގަމުންނެވެ.
އެ ވީޑިއޯ ކްލިޕްގައި މަލާކީ ވަނީ ފަލަސްތީނަށް ތާއީދުކޮށް ސްޓޭންޑެއް ނަގަން ޖެހޭކަން ފާހަގަކޮށް އެމެރިކާގެ ކޮފީ ޗެއިން ބޮއިކޮޓް ކުރުމަށްއެދި ސްޓޭޖް ޝޯ ބަލަންތިބި ފަރާތްތަކަށް ގޮވާލާފައެވެ.
މީގެ އިތުރުން މަލާކީ ވަނީ ފަލަސްތީނުގެ މަސައްކަތަށް ތާއީދު ކުރުމަށް ސޯޝަލް މީޑިއާގައި އޭނާގެ ތަފާތު މަނައްސާތަކުގައިވާ އެކައުންޓްތައް ބޭނުންކުރަންފަށާފައެވެ. އޮގޮތުން އޭނާގެ ފޮލޯވަރުން ފަލަސްތީނަށް ތާއީދުކުރާ ޓީޝާޓް ގަތުމަށް ގޮވާލާ ޕޯސްޓްތައް ވެސް ޙިއްސާކޮށްފައެވެ. އަދި ފަލަސްތީނުގެ ދިދަ ޖަހާފައިވާ ޓީޝާޓެއްގައި ”އައި ލަވް ޔޫ، މައި ފެމިލީ“ މިހެން ލިޔެފައިވާ ފޮޓޯއެއް ވެސް އޭނާ ވަނީ އާންމުކޮށްފަ އެވެ.
މަލާކީގެ މި ސްޓޭންޑަށް ސޯޝަލް މީޑިއާ ޕްލެޓްފޯމްތަކުގައި އޭނާގެ ފޭނުންގެ ފަރާތުން ވަރަށް ބޮޑަށް ތައުރީފު ލިބުނުއިރު، އެމީހުން ވަނީ އޭނާ ގޮވާލާފައިވާ ސްޓޭންޑަށް ތާއީދުކުރާކަން ހާމަކޮށްފައެވެ.
ބައެއް އޮބްޒާވަރުން ދެކޭގޮތުގައި އޭނާގެ މި ސްޓޭންޑަކީ ފަލަސްޠީނު މައްސަލައަށް ދުނިޔޭގެ ތާއީދުއޮތްކަން ދޭހަކޮށްދޭ ހެއްކެކެވެ. ޚާއްޞަކޮށް މިފަދަ މަޝްހޫރު އިންޓަރނޭޝަނަލް ޝަޚްޞިއްޔަތުތައް މެދުވެރިކޮށެވެ.
އިސްރާއީލަށް ތާއީދުކުރާ ބައިނަލްއަގްވާމީ ގިނަ ކުންފުނިތައް ބޮއިކޮޓްކުރުމުގެ ކެމްޕޭން ކުރިއަށްދާއިރު، އޭގެ ސަބަބުން ބޮޑެތި ގެއްލުންތަކެއް އެކުންފުނިތަކަށް ލިބެމުން އެބަދެއެވެ. މެދުއިރުމައްޗާއި އެފްރިކާ ބައްރުގެ ދެކުނުގެ ޤައުމުތަކުގައި ދިރިއުޅޭ މީހުންގެ ތެރެއިން އެ ކުންފުނިތަކުގެ ކަސްޓަމަރުންގެ ގޮތުގައި 500 މިލިއަނަށްވުރެ ގިނަ މީހުން އުޅެއެވެ.
ނޫސް ރިޕޯޓްތައް ބުނާ ގޮތުގައި ސްޓާބަކްސް ޗެއިން އަކީ މެކްޑޮނަލްޑްސްގެ އިތުރުން މަޝްހޫރު ބޮއިކޮޓް ކެމްޕޭންގެ ސަބަބުން ވިޔަފާރި ވަރަށް ބޮޑަށް ދަށްވި އެންމެ ފާހަގަކޮށްލެވޭ އެއް ކުންފުންޏެވެ. 2024 ވަނަ އަހަރުގެ ދެވަނަ ކުއާޓަރުގައި ސްޓާބަކްސްގެ ދުނިޔޭގެ ވިޔަފާރި މިދިޔަ އަހަރާ އަޅާބަލާއިރު %7 ދަށްވެފައިވާކަން ކުންފުނީގެ ހިސާބުތަކުން ދައްކައެވެ.
މަލާކީ އާއި ފަލަސްތީނަށް ތާއީދުކުރާ އެހެން މަޝްހޫރު ފަރާތްތަކުގެ މި ސްޓޭންޑަކީ 2023 ވަނަ އަހަރުގެ އޮކްޓޯބަރު މަހުން ފެށިގެން އިސްރާއީލުން ޣައްޒާއާ ދެކޮޅަށް ކުރަމުންދާ އަނިޔާތަކަށް ދުނިޔޭގެ ކަންކޮޅުތަކުގައި ނަފްރަތު އޮތްމިންވަރު ހާމަކޮށްދޭކަމެކެވެ.
މި އަނިޔާވެރިކަމުގެ ސަބަބުން ޝަހީދުވެފައިވާ މީހުންނާއި ބޮޑެތި އަނިޔާތައް ލިބުނު މީހުން ޢަދަދު 148,000 (އެއްލައްކަ ސާޅީސް އަށްހާސް) އަށްވުރެ ގިނައެވެ. އޭގެ ތެރެއިން ގިނައީ ކުޑަކުދިންނާއި އަންހެނުން ކަމަށްވާއިރު، 10,000 އަށް ވުރެ ގިނަ މީހުން އަދިވެސް ވަނީ ވީނުވީއެއް ނޭނގި ގެއްލިފައެވެ.
އިޒްރޭލުގެ މި ލާއިންސާނީ ޖަރީމާތަކުގެ ސަބަބުން ބޮޑެތި ނުއްކާތެރި ކާރިސާތަކާ ކުރިމަތިލާން ޖެހިފައިވާއިރު، ބަނޑުހައި ހޫނުކަމުގައި އެތައްސަތޭކަ ކުޑަކުދިންނާއި މުސްކުޅިން ފަނާވެގެން ދިޔައެވެ. މިކަން ވެފައިވަނީ މިހާތަނަށް ދުނިޔެ ދުށް އެންމެ ނުރައްކާތެރި އިންސާނީ ކާރިސާތަކުގެ ތެރެއިން އެއް ކާރިސާއަށެވެ.