އާ ނިއުކްލިއާ ޑޮކްޓްރިންއަކާއެކު އެމެރިކާއަށް ރަޝިއާގެ ރައީސް ވްލަޑިމިއަ ޕޫޓިން އިންޒާރު ދެއްވައިފިއެވެ.

މީޑިއާ ރިޕޯޓުތައް ބުނާ ގޮތުން އާ ނިއުކްލިއާ ޑޮކްޓްރިންއަށް ރަޝިޔާގެ ރައީސް ވްލަޑިމިއަ ޕޫޓިން ވަނީ ރުހުން ދެއްވާފައެވެ.
ކްރެމްލިން ބުނާ ގޮތުގައި މިއީ ހުޅަނގަށް ދޭ އިންޒާރެކެވެ.

މީގެ ކުރިން 2020 ވަނަ އަހަރު ނެރުނު ގަރާރެއްގައި ބަޔާންކޮށްފައިވާ ކުރީގެ ޑޮކްޓްރިންގައި ބުނެފައި ވަނީ ދުޝްމަނެއްގެ ނިއުކްލިއާ ހަމަލާއެއް ނުވަތަ ދައުލަތް ދެމިއޮތުމަށް ނުރައްކާވާ ފަދަ ކޮންވެންޝަނަލް ހަމަލާއެއް ދީފިނަމަ ރަޝިއާއިން ނިއުކްލިއާ ހަތިޔާރު ބޭނުން ކުރެވިދާނެ ކަމަށެވެ.

ނަމަވެސް ޕޫޓިން އިއްޔެ ރުހުންދެއްވި ޑޮކްޓްރިންގައި ބުނެފައި ވަނީ ނިއުކްލިއާ ބާރަކަށް ތާއީދުކުރާ ނިއުކްލިއާ ނޫން ބާރަކުން ދޭ ކޮންމެ ހަމަލާއަކީ ގުޅިގެން ދޭ ހަމަލާއެއް ކަމަށް ބެލެވޭނެ ކަމަށާއި އަސްކަރީ ބްލޮކެއްގެ އެއް މެމްބަރަކު ދޭ ކޮންމެ ހަމަލާއަކީ މުޅި އިއްތިހާދުން ދޭ ހަމަލާއެއް ކަމަށް ބެލެވޭނެ ކަމަށެވެ.

ޕޫޓިން މި ބަދަލަށް ރުހުން ދެއްވާފައި މި ވަނީ ޔޫކްރޭނުން ރަޝިޔާއަށް ހަމަލާދިނުމަށް އެމެރިކާގެ ހަތިޔާރު ބޭނުން ކުރުމުގެ ހުއްދަ ޔޫކްރެއިނަށް އެމެރިކާއިން ދިން ކަމަށް ބުނިތާ ދެތިން ދުވަސް ފަހުންނެވެ.

ދުނިޔޭގެ ނިއުކްލިއާ ހަތިޔާރުގެ 88 އިންސައްތަ ކޮންޓްރޯލް ކުރަނީ ރަޝިޔާ އާއި އެމެރިކާ ގުޅިގެންނެވެ.

ޕޫޓިން އަކީ ރަޝިއާގެ ނިއުކްލިއާ ހަތިޔާރު ބޭނުންކުރުމާ ގުޅޭ ގޮތުން އެންމެ އިސް ކޮށް ގޮތް ނިންމަވާނެ ފަރާތެވެ.
ޔޫކްރެއިންއަށް ރަޝިއާއަށް ހަމަލާދިނުމަށް އެމެރިކާގެ ހަތިޔާރު ބޭނުންކުރުމުގެ ހުއްދަ އެމެރިކާއިން ދިނުމާއި ޕޫޓިންގެ މި ގަރާރު ޝާއިއުކުރުމާ ގުޅިފައިވޭތޯ މީޑިއާތަކުން ސުވާލު ކުރުމުން ކްރެމްލިންގެ ތަރުޖަމާނު ޑިމިޓްރީ ޕެސްކޯވް ވިދާޅުވީ އެ ޑޮކްޓްރިން ޝާއިއުކޮށްފައި ވަނީ ”ވަގުތުން“ ކަމަށެވެ.

ހަމައެހެންމެ ނިއުކްލިއާ ޑިޓެރެންސްގެ މަގްސަދަކީ ރަޝިއާ ފެޑެރޭޝަނާއި އެ ޤައުމުގެ ބައިވެރިންނާ ދެކޮޅަށް ހަރުކަށި ފިޔަވަޅެއް އަޅައިފި ނަމަ ބަދަލު ހިފާނެކަން އިދިކޮޅު ފަރާތްތަކަށް ވިސްނޭނެކަން ކަށަވަރު ކުރުން ކަމަށް ޕެސްކޯވް ވިދާޅުވި އެވެ.