އިސްރާއީލުގެ ހަމަލާތަކުގެ ތެރޭގައި ކުޑަކުދިންގެ ގަބުރުސްތާނަކަށް ގައްޒާ ވެފައިވާ ކަމަށް އީރާނުގެ ފޮރިން މިނިސްޓްރީގެ ތަރުޖަމާނު އެސްމައިލް ބަޣާއީ ވިދާޅުވެއްޖެ އެވެ.
އެސްމާއިލް ބަޣާއީ މިހެން ވިދާޅުވެފައި ވަނީ ދުނިޔޭގެ ކުޑަކުދިންގެ ދުވަހުގެ މުނާސަބަތުގައި އޭނާގެ އެކްސް އެކައުންޓުގައި ކުރެއްވި ޕޯސްޓެއްގައެވެ.
އެގޮތުން ބަޣާއީ ވިދާޅުވީ، ބައިނަލްއަގްވާމީ ކުޑަކުދިންގެ ދުވަސް ނޮވެމްބަރު 20، ވަނަ ދުވަސް ހުރިހާ ކުދިންނަށް ވެސް އަމާން ކަމާއެކު އުޅުމުގެ ހައްގު ހަނދާންކޮށްދޭ ކަމަށެވެ. އަދި މި މުނާސަބަތަކީ ޣައްޒާގެ ކުޑަކުދިންގެ ތަކުލީފުތައް ހަނދާނުގައި ބަހަށްޓަން ޖެހޭ ކަމަށެވެ.
އިސްރާއީލުގެ ޙަމަލާތަކުގެ ސަބަބުން ޣައްޒާއަކީ ކުޑަކުދިންގެ ސަހަރާއަކަށް ވެފައިވާކަން ފާހަގަކުރައްވައި އޭނާ ވިދާޅުވީ، އަހަރެއްގެ ތެރޭގައި ފަލަސްތީނުގެ 17،000 އަށް ވުރެ ގިނަ ކުދިން ޝަހީދުކޮށްލާ، އެތައް ހާސް ކުދިން ގެއްލި، ދިހަހާސް ކުޑަކުދިންނަށް އަނިޔާވެ، އެތައް ސަތޭކަ ކުދިންނެއް ޒަޚަމްވެފައިވާ ކަމަށެވެ.
ހަމައެހެންމެ 35،000 އަށް ވުރެ ގިނަ ކުދިން ޔަތީމު ވެފައިވާއިރު، އޭގެ ތެރެއިން ގިނަ ކުދިންގެ އާއިލާގެ ހުރިހާ މެންބަރުން ގެއްލިފައިވާ ކަމަށެވެ. އަދި ގާތްގަނޑަކަށް 4،000 ކުދިން ބަނޑުހައިހޫނުކަމުގެ ސަބަބުން މަރުވެފައިވާއިރު، ބަނޑުހައިހޫނުކަމާއި، ބަލިމަޑުކަމާއި، ގެދޮރު ދޫކޮށް ދިއުމާއި، އަސާސީ ތަކެތި ލިބުނަ ނުދީ ހިފެހެއްޓުމުގެ ސަބަބުން އިތުރު ބައެއް ކުދިންނަށް ބަްށްޖެހި މަރުވާނެ ކަމުގެ ނުރައްކާ އެބައޮތް ކަމަށް އޭނާ ވަނީ ވިދާޅުވެފައެވެ.
މީގެ އިތުރުން މިއީ ފަލަސްތީނުގެ ކުށެއް ނެތް ކުޑަކުދިންނާ ދެކޮޅަށް ހިންގާ ބޮޑެތި ޖަރީމާތައް ހިންގާ ފަރާތް ތަކަށް އަދަބު ތަންފީޒުކުރަންވީ ވަގުތު ކަމަށް ބަޣާއީ ވިދާޅުވި އެވެ.
