ރައްޔިތުން ލޯބޯ ފިއްސައިގެން ކުރާ ބުރަ މަސައްކަތުން
ލިބޭ މަދު ލާރިކޮޅު ވާރުގެ ގޮތުގައި ދައުލަތަށް ނަގަނީ ކީއްކުރަން
ކޮންބޭނުމަކުތޯއެވެ. މިއީ ރައްޔިތުންގެ ހިތްތަކުގައި އުފެދެމުން އަންނަ ސުވާލެކެވެ. އެހެނަސް ރައްޔިތުން ދައުލަތަށް ވާރު ދައްކަނީ ރައްޔިތުންގެ އަސާސީ ބޭނުންތައް ފުއްދުމަށާއި، ދުޅަހެޔޮ ފުދުންތެރި އަދި ރައްކާތެރި އަމާން މާހައުލެއް ބިނާކޮށް ރައްޔިތުންގެ ޒަރޫރީ ބޭނުންތައް ފުއްދުމަށް ކަމަށް ރައްޔިތުން ބުނެއެވެ.

ރާއްޖެއަކީ އާބާދީގައި ފަސްލައްކަ މީހުން ހަމަނުވާ ގައުމަކަށް ވީއިރު އަދި ކޮންމެ އަހަރަކު ވާރުގެ ގޮތުގައި ރައްޔިތުން ހަ ބިލިއަނަށްވުރެ ގިނަ ރުފިޔާ ދައުލަތަށް ދައްކަމުން ދާއިރު ސަރުކާރުން ރައްޔިތުންގެ ބޭނުންތައް ފުއްދާ ދޭތަނެއް ނުފެނެއެވެ.

ކަން މިހެން އޮތްއިރު ރައްޔިތުން ނުކައި ނުބޮއި އުނު އޮރިޔާން ނިވައިނުކޮށް ރައްޔިތުން ތިބިއިރު ދައުލަތަށް ރައްޔިތުންގެ އަތުން ނަގާ ވާރު އެދަނީ ދުވަހެއް ދުވަހެއް އިތުރު ކުރަމުންނެވެ. ރާއްޖޭގެ އާބާދީގެ ނިސްބަތަށް ބަލާއިރު އާބާދީ ބޮޑު ފުދުންތެރި ގައުމުތަކުގެ ރައްޔިތުންގެ އަތުން ނުނަގާ މިންވަރަށް ރާއްޖޭގެ ރައްޔިތުންގެ އަތުން ދައުލަތަށް ވާރު އެބަނަގައެވެ.

މިސާލަކަށް މި ސަރަހައްދުގެ ފުދުންތެރި ގައުމުތަކުގެ ތެރޭގައި ހިމެނޭ ސިންގަޕޯރ ދުބާއީ ފަދަ އެތައް ގައުމެއްގެ ރައްޔިތުންގެ އަތުން މި ރާއްޖެއިން އެ ނަގާ ވަރަށް ވާރު ނުނަގާކަން ފާހަގަކުރަމެވެ. އެހެނަސް މި ގައުމުގައި ތަރައްގީވަމުން އަންނަނީ ދައުލަތުގެ ވެރިންނާ މަހުޖަނުންގެ ޖީބުތަކެވެ. ރައްޔިތު މީހާ ތަރައްގީ ކުރާނެ ކަމަށް މި ސަރުކާރުން ވަޢުދުވެފައި ވީ ނަމަވެސް ރައްޔިތުންނަށް ސަރުކާރުން ދައްކަނީ އަވާމެންދުރެވެ. ނޫންނަމަ ރިޒުގު ލޯވަޅެވެ. ރައްޔިތުންގެ އަތުން ދައުލަތަށް ވާރުގެ ނަމުގައި ރުފިޔާ އަތުލަމުން އެ ދަނީ ހިތަށް ކުޅަދާނަ ނުވާ މިންވަރަށެވެ.

މިއީ ކޮން ބޭނުމަކު ރައްޔިތުން އެކުލަވައިލި ސަރުކާރެއް ހެއްޔެވެ. ރާއްޖެއަކީ އާބާދީގެ އިންސައްތައަށް ބަލާއިރު ތަނަވަސް ފުދުންތެރި ގައުމެކެވެ. އެހެނަސް އާބާދީގެ ކޮންމެ ދިހަ މީހުންގެ ތެރެއިން އެކަކު ހުރީ ނުކައި ނުބޮއި އޮނު އޮރިޔާން ނިވައި ނުކޮށެވެ. ރައްޔިތުންނަށް ދުޅަހެޔޮ ސިއްހަތެއް ލިބޭނެ ގޮތެއް ނެތް ހިނދު ތިންއިރު ކާން ނުލިބޭ މީހުންގެ ލިސްޓް ހައްތާވަނީ ދިގެވެ.

ދުންފަތް ކޮންޓްރޯލް ކުރުމަށްޓަކާ ރައްޔިތުންގެ މަޖިލީހުން ވަނީ މަޑުމަޑުން ލަސްލަހުން ތަންފީޒުކުރެވޭ ގޮތަށް ދުންފަތުގެ އިސްތިޢުމާލުކުރާ އާބާދީ މަދުކުރުގެ ގޮތުން ގާނޫނުތަކާއި ގަވާއިދުތަކެއް އުފަންކޮށްފައިވާއިރު އެ ގާނޫނުތަކައީ ގަވާޢިދުތައް އެފެންނަން އެހުރީ މަތާރަންފިލާގެ މަތީގައި ހިރަފުސް ބުރަން ބަހައްޓާފައިވާ ތަނެވެ. އެކަމަކު ސަރުކާރުގެ ކަމާބެހޭ އިސްވެރީންނާއި ސިނގިރޭޓް އެތެރެކުރާ މީހުންގެ ޖީބުތައް ފުރާލާނޭ އެކްޝަން ޕްލޭނެއް ފާސް ކޮށްގެން އެދަނީ ތަންފީޒު ކުރަމުން ރައްޔިތުން ފެލަމުންނެވެ. މާފުކުރައްވާށެވެ. އެންމެ ކުޑަކުއްޖާއަށް ވެސް ގަބޫލު ކުރެވޭނެ މިންވަރަށް ދުންފަތް ކޮންޓްރޯލްކުރުމުގެ ނަމުގައި ސިނގިރޭޓް ޑިއުޓީ ބޮޑުކޮށް ރައްޔިތުންނަށް ގެއްލުންވިޔަސް އެކަމަށް ފަރުވާލެއް ނުބަހައްޓާ ވަކި ބަޔަކު އެ ގެންދަނީ ނާތަހުޒީބު އަދި ނާޖާއިޒު މަންފާ ނަގަމުންނެވެ.

ކޮންމެ ފެށުމަކަށް ވެސް ނިމުން އަންނަ ފަދައިން ސަރުކާރުގެ ކަމާބެހޭ އިސްވެރިން ރައްޔިތުންނާމެދު ވިސްނާލުމެއްނެތި އެ ނިންމުމުގެ ހިތި ނަތީޖާ އެވެރިންނަށް ފެންނާނެ ކަމީ ޝައްކެއް ނެތް މިންވަރަށް ޔަގީންވާ ކަމެކެވެ. ރައްޔިތުންގެ މަޖިލީހުގެ އެ ނިންމުމުން އެނގިގެން ދަނީ 20 ވަނަ ރައްޔިތުންގެ މަޖިލީހުގައި ރައްޔިތުންނަށް ހެޔޮއެދޭ މެންބަރުން މަދުކަމެވެ. ސަރުކާރުން ރައްޔިތުން އިރަށް ދޮންކުރަން އެދުނަސް މަޖިލީހުގެ މެޖޯރިޓީ އެކަން ކުރާނެކަން ރައްޔިތުން ވަރަށް ސާފެވެ.

ނިމިދިޔަ ސަރުކާރުން ފަށްޓާފައި ހުރި ގިނަ މަޝްރޫޢުތައް އެ ހުރީ ހުއްޓިފައެވެ. އެހެނަސް ރައްޔިތުންގެ އަތުން ނަގާ ޓެކްސް ވަނީ އިތުރެވެ. މި ހިނގާ އަހަރަށް ފާސްކުރި ދައުލަތުގެ ބަޖެޓް ވެގެން ދިޔައީ ހުދުކާފޫރަށެވެ. އެ ބަޖެޓުން ސަރުކާރުން ޚަރަދު ކުރިކަމަށް އެއްބަސް ވަނީ އަށާރަ ބިލިއަން ރުފިޔާއެވެ. ބާކީ ފައިސާ ހުދުކާފޫރަށް ވެގެން ދިޔައިރު އެކަން ދެނެހުރި މީހަކު ނެތެވެ. ހޭކުނީ ދަތުގައި ކަމެއް ނުވަތަ އަތުގައި ކަމެއް ދެނެވޮޑިގެން ވަނީ މާތްރަސްކަލާނގެއެވެ. ކޮންމެއަކަސް ރައްޔިތުންނަށް ދަތިވާ ކަންކަން ކޮށްގެން ސަރުކާރަށް ވާނީ ގެއްލުމެވެ. އަދި ރައްޔިތުންގެ ނަފުރަތާ ރުޅިވެރިކަން ސަރުކާރަށް އަމާޒު ނުވެއެއް ނުދާނެއެވެ.

ދުންފަތަކީ މަސްތުވާ އެއްޗެސް ވެސް މެއެވެ. އެހެންކަމުން އެފަދަ ކޮންމެ އެއްޗަކީ އޭގެ ބޭނުންކުރާ ފަރާތްތަކަށް އެއާނުލާ ނޫޅެވޭ ވަރަށް ދެވިހިފާ ބާވަތެކެވެ. އެހެނަސް ދުއިސައްތަ ފަންސާސް ރުފިޔާ އަށް ވިއްކާ ސިނގިރޭޓް ފޮށްޓެއް ގަނެވޭނީ މަދު މީހަކަށެވެ. އެހެންކަމާއެކު އެންމެ އަގުބޮޑުކޮށް އެ ވިއްކާ ސިނގިރޭޓް ބުއިން ހުއްޓާލައިފިނަމަ ގެއްލުންވާނީ އެ ސިނގިރޭޓް ގެންނަ ބަޔަކަށެވެ. އަގުބޮޑުކޮށް ސިނގިރޭޓް ވިއްކައިގެން މާމޮޅުތަކެއްވާނެ ކަމަށް ހީނުކުރާށެވެ.

ސިންގަޕޯރއަކީ ތަރައްގީވެ ކުރިއަރާފައިވާ ގައުމެކެވެ. އަދި ރައްޔިތުންނާ ވިޔާފާރިތައް ވެސް ވަނީ އެތައް ތަނަކުން ކުރިއަރާފައެވެ. ހަމައެހެންމެ ދުބާއީ އަކީ ވެސް އެ ފެންވަރުގެ ގައުމެކެވެ. އަދި އާބާދީގެ ގޮތުން ވެސް މި ދެންނެވި ގައުމުތަކަކީ ނުހަނު ކުރީގައި އުޅޭ ގައުމުތަކެއް ވެސް މެއެވެ. އެކަމަކު އާބާދީގައި ފަސްލައްކަ މީހުން ހަމަނުވާ ދިވެހިރާއްޖޭގެ ރައްޔިތުންގެ އަތުން ދިވެހި ދައުލަތަށް ނަގާ ޓެކުސް ފައިސާ މި ސަރަޙައްދުގެ ގައުމުތަކާ ނުބައްދަލެވެ. އަނެއްކޮޅުން ނިމިދިޔަ ސަރުކާރު ވެރިކަމަށް އައުމާއެކު މުޅި ދުނިޔެ ތަހައްމަލު ކުރި ކޯވިޑް 19 ގެ ބަލިމަޑުކަން ރާއްޖެ ވެސް ވަނީ ތަހައްމަލު ކޮށްފައެވެ. އެކަމު އެފަދަ ނާޒުކު ދަނޑިވަޅުގައިވެސް ރާއްޖޭގެ ރައްޔިތުން ފެލާ ނުލައި އަދި ރާއްޖޭގެ މަސްވެރިންވެސް އިނދަޖައްސާ ނުލައި ސަރުކާރު ހިންގިއެވެ.

އެހެނަސް މި ސަރުކާރު ވެރިކަމަށް އައިސް އެކި ގައުމުތަކުން އެހީގެ ފެހި ސިގުނަލްތައް ލިބެމުންދިޔަ ކަމުގެ އުފާވެރި ޚަބަރުތައް ރައްޔިތުންނަށް ދީ ރައްޔިތުން އެދޭ ކޮންމެކަމަކަށް ސަރުކާރުގެ ދުލުން ދިޔައީ މަރުޙަބާ ކިޔަމުންނެވެ. އެހެނަސް އެއީ ޙަގީގަތެއް ނޫންކަން ރައްޔިތުންނަށް ރޭކާލީއިރު ދައުލަތް އޮތީ މަޅާލާފައެވެ. މާފުކުރައްވާށެވެ. މިހެން ދަންނަވަން ޖެހުނީ ރައްޔިތުންނަށް ކަންކަން ކޮށްދިނުމުގެ ބަހަނާގައި އެކި ނަންނަމުގައި ރައްޔިތުންގެ އަތުން ޓެކްސް ނަގަމުންގޮސް ސަރުކާރަށް އަހަރެއްވެސް ނުވަނީސް އަހަރަކަށް ފާސްކުރި ދައުލަތުގެ ބަޖެޓުވަނީ ފެންފޮދަކާ ވެސް ނުލާ ދިރުވައި ނިންމާލާފައެވެ. ހެދި ނެހެދިއެއް ރައްޔިތުންނަކަށް ރޭކާވެސް ނުލައެވެ.

އަނެއްކާ އެ ފާސްކުރީ ސަޕްލިމެންޓްރި ބަޖެޓެކެވެ. މިކަން މިގޮތަށް ނިމިގެންދިޔައީ ރައްޔިތުން ސަރުކާރަށް ދިން މަޖިލީހުގެ މެޖޯރިޓީގެ ބޭނުން ނަހަމަގޮތުގައި ހިފައިގެންނެވެ. އެހެންކަމާއެކު އެއްވެސް ސަރުކާރަކަށް މަޖިލީހުގެ މެޖޯރިޓީ ދިނުމަކީ ރައްޔިތުން ނިކަމެތިވުމަށް ދެވުނު ވޯޓެއް ކަމަށް މެނުވީ ނުވިއެވެ. ދެންވެސް ރައްޔިތުން ހޭލާކަށް ނުވޭ ހެއްޔެވެ. ރައްޔިތުން މުންޑު އައްސާ ސޯރުފޮތިކޮޅަށް ދަންދެން ވާރަށް ނަގަން ފެށުމުން ވިސްނާންވެއްޖެ ނޫން ހެއްޔެވެ.