ބްރެޒިލްގެ ރިއޯ ޑި ޖެނީރޯގައި ބޭއްވި ޖީ20 ސަމިޓްގައި ބައިވެރިވެވަޑައިގަންނަވަނިކޮށް ޕެރަގުއޭގެ ރައީސް ސަންޓިއާގޯ ޕެނާ ހޯމަ ދުވަހު ހޮސްޕިޓަލުގައި އެޑްމިޓްކުރައްވައިފިއެވެ.
އެ ސަމިޓްގައި ބައިވެރިވެވަޑައިގަންނަވަނިކޮށް ބްރެޒިލްގެ ސަމަރިޓަނޯ ހޮސްޕިޓަލުގައި ޕެނާ އެޑްމިޓް ކުރައްވާފައި ވަނީ ކުޑަ އާލާސްކަންފުޅެއް ޖެހިގެން ކަމަށް އެ މަނިކުފާނުގެ އޮފީހުން ހާމަކުރެއެވެ.
މިވަގުތު ޕެނާ ގެންދަވަނީ އެކަމާއި ގުޅިގެން މެޑިކަލް ޗެކަޕްތައް ފުރިހަމަ ކުރައްވަމުން ކަމަށާއި ހާލު ރަނގަޅު ކަމަށާއި ކުރިއަށް އޮތް ދެތިން ގަޑިއިރުގެ ތެރޭގައި ހޮސްޕިޓަލުން މެޑިކަލް ރިޕޯޓެއް ނެރޭނެ ކަމަށް ޕެނާގެ އޮފީހުން ނެރުނު ބަޔާނެއްގައިވެއެވެ.
ބްރެޒިލްގެ ރިއޯ ޑި ޖެނެރިއޯގައި މިހާރު ކުރިއަށްދާ ޖީ20 ސަމިޓްގައި ފަގީރުކަމާއި މޫސުމީ ފައިނޭންސިން އަށް އަލިއަޅުވާލާފައި ވެއެވެ.
ޕެރަގުއޭ އަކީ ޖީ20 ގައުމުތަކުގެ ބައެއް ނޫން ނަމަވެސް، ބްރެޒިލް ސަރުކާރުން ނެރުނު ނޫސް ބަޔާނެއްގައި ބުނީ ޕެނާއަށް ބްރެޒިލް އިން ދައުވަތު ދިނީ ތަރައްގީވަމުން އަންނަ ގައުމުތަކާއި ޚާއްސަކޮށް މެރްކޯސޫރުގެ ބައިވެރިންގެ ތަމްސީލީ ނަޒަރިއްޔާތެއް ކުރިއެރުވުމުގެ ރޫހުގަ އެވެ.
