މި ސަރުކާރަކީ އުންމީދު ގެނެސްދޭނެ ސަރުކާރެއް ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.
ނައިބު ރައީސް މިހެން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް އެއް އަހަރު ފުރުމާ ގުޅިގެން ޕީ.އެސް.އެމް ނިއުސްއަށް ދެއްވި ބަސްދީގަތުމެއްގައެވެ.
ކުރިއަށްއޮތް ތަނުގައި ދިވެހީންގެ ރާއްޖެ މެނިފެސްޓޯ ތަންފީޒުވަމުންދާ މަންޒަރު ފެނިގެންދާނެ ކަމަށާއި ބަޖެޓުގެ ބޮޑު ބައެއް ގެދޮރުވެރިކަމާއި ބޯހިޔާވަހިކަމަށް ޚާއްޞަކޮށް، ބޯހިޔާވަހިކަމުގެ މަޝްރޫޢުތައް ފެށިގެންދާނޭ ކަމަށް ނައިބު ރައީސް ވިދާޅުވިއެވެ.
ހަމައެހެންމެ ބޭރުގެ ފަރާތްތަކުން ލިބޭ އެހީތަކާއި ޤައުމުގެ އުފެއްދުންތެރިކަމުން ލިބޭ އާމްދަނީގެ އެހީގައި ކުރިއަށްއޮތް ހަތަރު އަހަރުގެ އުންމީދުތައް ޙާޞިލުވެގެންދާނެ ކަމަށްވެސް ނައިބު ރައީސް ވިދާޅުވިއެވެ.
މިއަދު ދުނިޔެއިން ރައީސުލްޖުމްހޫރިއްޔާގެ ސިޔާސަތުތައް ބަލައިގެންފައިވާކަމަށާއި ފައިސާ ޗާފުކުރުން ހުއްޓާލުމާއި، ސަބްސިޑީގެ އުޞޫލަށް ބަދަލުގެނައުން ފަދަ ބޮޑެތި، އުނދަގޫ ނިންމުންތަކުގައި ރައްޔިތުން ދެއްވި އެއްބާރުލެއްވުމާއި ދެއްކެވި ކެތްތެރިކަމާއެކު، އެ ގޮންޖެހުންތަކުން އަރައިގަތުމުގައި ކުރިއެރުންތައް ލިބިވަޑައިގެންފައިވާކަން ނައިބު ރައީސް ފާހަގަކުރެއްވިއެވެ.
މިގޮތުން ބައިނަލްއަޤުވާމީ ޖަމުޢިއްޔާތަކާއި، އަވަށްޓެރި ޤައުމުތަކާއި، ޢަރަބި ޤައުމުތަކާއި ހުޅަނގުންވެސް ރާއްޖޭގެ ތަރައްޤީއަށް ކުރާ މަސައްކަތްތަކުގައި އެއްބާރުލުން ދިނުމަށް ތައްޔާރަށް ތިބި ކަމަށްވެސް ނައިބު ރައީސް ވިދާޅުވިއެވެ.
