އިން ވިޓްރޯ ފާޓިލައިޒޭޝަން (އައިވީއެފް) އަދި އިންޓްރަޔުޓްރައިން އިންސެމިނޭޝަން (އައިޔޫއައި) ހެދުމުގެ ފުރުސަތު 64 މީހަކަށް ދޭން ނިންމާފައިވާ ކަމަށް އެންސްޕާއިން މިރޭ ނެރުނު ލިސްޓުގައި ބުނެފިއެވެ.
އެންސްޕާއިން މީގެ ކުރިން ބުނީ އައިވީއެފްގެ ފަރުވާގެ ޚަރަދު އަމިއްލައަށް ކުރުމަށް ދަތިވާ ފަރާތްތަކަށް ދަޢުލަތުގެ އެހީއަށް އެދުމުގެ ފުރުޞަތުގެ ދެވަނަ ބުރަށް ހުޅުވާލި ފުރުސަތުގައި ޖުމްލަ 215 މީހުން އައިވީއެފް އެހީއަށް އެދިފައިވާ ކަމަށެވެ.
ހަމައެހެންމެ އެ ފުރުސަތަށް ކުރިމަތިލި ފަރާތްތަކުގެ ތެރެއިން 63 ފަރާތެއް ހޮވިފައިވާއިރު އެ ފުރުސަތަށް ކުރިމަތިލި ފަރާތްތަކުގެ މެދުގައި ޝަކުވާ ހުށަހެޅުމަށް ހުޅުވާލި ފުރުސަތުގައި ފޯމުތައް އަލުން ރިވިއުކުރުމަށްފަހު އެންސްޕާއިން މިރޭ ނެރުނު ލިސްޓުގައި ދެވަނަ ބުރުގައި 64 މީހަކަށް ވަނީ އެ ޙިދުމަތް ސަރުކާރުގެ ޚަރަދުގައި ހޯދުމަށް ފުރުސަތު ދީފައެވެ.
މީގެ އިތުރުން އެންސްޕާއިން ބުނީ މި މަހުގެ 30 ވަނަ ދުވަހުގެ ކުރިން އެހީ ހަމަޖެހިފައިވާ ފަރާތްތަކަށް ފަރުވާ ގެންދާނެ ގޮތުގެ ޕްލޭން ހިއްސާ ކުރުމާ ގުޅޭގޮތުން މައުލޫމާތު ފޯރުކޮށްދޭނެ ކަމަށެވެ.
ދަރިމައިވުމަށް ހޯދާ ފަރުވާ ނުވަތަ އައިވީއެފްގެ ފަރުވާ މި އަހަރު 100 ދެމަފިރިއަކަށް ދިނުމަށް ސަރުކާރުން ނިންމާފައިވާއިރު، އައިވީއެފް ހެދުމަށް ހުޅުވާލި ފުރަތަމަ ބުރުގައި ސަރުކާރުން ވަނީ 37 މީހަކަށް އެހީ ފޯރުކޮށްދީފައެވެ.
