ޑިޕްލޮމެޓިކް އަދި އޮފިޝަލް ޕާސްޕޯޓް ބޭނުންް ކުރާ ދިވެހިންނަށް ވިސާއާ ނުލައި 90 ދުވަހު އަޒަރުބައިޖާންގައި ހުރެވޭނެ އިންތިޒާމު ހަމަޖައްސައިފިއެެވެ.
މިގޮތަށް އެއްބަސްވެފައި ވަނީ އަޒަރުބައިޖާންގެ ވެރިރަށް ބާކޫގައި ކުރިއަށްދާ ކޮންފެރެންސް އޮފް ދަ ޕާރޓީސް އޮފް ދަ ޔޫއެންއެފްސީސީސީގެ ހަވާސާގައި ރާއްޖޭގެ ފޮރިން މިނިސްޓަރު ޑރ. އަބްދުﷲ ހަލީލްއާއި އަޒަރުބައިޖާންގެ ހާރިޖީ ވަޒީރު ޖޭހުން ބައިރަމޯލް އާއެކު ބޭއްވި ބައްދަލު ކުރެއްވުމަށްފަހުއެވެ.
ދެ ޤައުމުގެ މެދުގައި އެކުލަވާލެވުނު މި އެއްބަސްވުމުގައި ރާއްޖެއާއި އަޒަރުބައިޖާންގެ ރައްޔިތުންނަށް ދަތުރުފަތުރު ކުރުމުގައި ލުއިފަސޭހަގޮތްތަކެއް ހޯދައިދިނުމުގެ މަގްސަދުގައި މިނިސްޓަރު ހަލީލް އަދި ވަޒީރު ޖޭހުން ބައިރަމޯލް ވަނީ ސޮއި ކުރައްވާފައެވެ.
މި އެއްބަސްވުމުގެ ދަށުން ރާއްޖޭގެ ޑިޕްލޮމެޓިކް އަދި އޮފިޝަލް ޕާސްޕޯޓް ބޭނުންކުރާ ފަރާތްތަކަށް ވިސާ އާއި ނުލައި އަޒަރުބައިޖާން އެތެރެވުމާއި، ޓްރާންސިޓްވުމާއި 90 ދުވަހުގެ މުއްދަތަކަށް އެ ގައުމުގައި ހުރުމުގެ ހުއްދަ ލިބޭނެއެވެ.
މީގެ އިތުރުން މި އެއްބަސްވުމަކީ ދިވެހިރައްޔިތުންނަށް ވިސާއަކާ ނުލައި ދަތުރުކުރެވޭނެ ގޮތް މަގުފަހިކޮށްދިނުމަށްޓަކައި ކުރެވޭ މަސައްކަތަށް އެޅުނު މުހިއްމު ފިޔަވަޅެއް ކަމަށް ފޮރިން މިނިސްޓްރީން ހާމަކުރެއެވެ.
