އުތުރު ކޮރެއާއިން ނިއުކްލިއަރ ހަތިޔާރު ހުއްޓުވަން ބާރުއެޅުމުގެގޮތުން ޔުނައިޓެޑް ނޭޝަންސްގެ ސެކިއުރިޓީ ކައުންސިލްގެ ބައްދަލުވުމެއް މިދިޔަ ހޯމަ ދުވަހު ބާއްވައިފިއެވެ. އެ ބައްދަލުވުމުގައި ވާހަކަ ދައްކަވަމުން އުތުރު ކޮރެއާއިން ނިއުކްލިއަރ ހަތިޔާރު އުފެއްދުން ހުއްޓާ ނުލާނެކަމަށާއި އަދި މިހާރު ކުރިއަށްވުރެން ވެސް ބާރު ދުވެލީގައި އެކަން ކުރިޔަށް އެބަ ގެންދާކަމަށް އުތުރު ކޮރެއާއިން ޔޫ އެން އަށް ކަނޑައަޅާފައި ހުންނަ ސަފީރު ކިމް ސޯންގް ވިދާޅުވެއްޖެކަމަށް ބިޒްނަސް އިންސައިޑަރުން ޚަބަރު ދީފިއެވެ.
އެމަނިކުފާނުގެ ވާހަކަފުޅު ކުރިއަށް ގެންދަވަމުން ވިދާޅުވީ އެހެން ބައެއްގެ ބޮލަށް ކިތަންމެ އުދަނގޫ ވިޔަސް އުތުރު ކޮރެއާއިން ނިއުކްލިއަރ ހަތިޔާރު އުފެއްދުން ހުއްޓާލުމުގެ ވިސްނުމެއް ނުގެންގުޅޭ ކަމަށާއި އަދި އެއީ ދުވަހަކުވެސް ބަދަލުކުރާނެ ވިސްނުމެއް ނޫން ކަމަށެވެ. ސެކިއުރިޓީ ކައުންސިލްގެ ބައްދަލުވުން ބޭއްވުނު ސަބަބެއްކަމުގައި ބެލެވެނީ އުތުރު ކޮރެއާއިން އުދުއްސާލި ކުރު ރާސްތާ ބެލިސްޓިކް މިސައިލްތަކުގެ ތެރެއިން މަދުވެގެން 7 މިސައިލް ޖަޕާނުގެ ކަނޑުގެ ސަރަހައްދަށް ވެއްޓުމުންނެވެ.
އުތުރު ކޮރެއާއިން ޖަވާބުގައި ބުނެފައިވަނީ އެ މިސައިލްތައް ޖަޕާނުގެ ކަނޑުގެ ސަރަހައްދަށް ފޯރާގޮތަށް އުދުއްސާލުމުގެ ބޭނުމަކީ ދާދި މިދާކަށްދުވަހު ދުރު ރާސްތާ ބޮންއަޅާބޯޓުފަހަރު ބޭނުންކޮށްގެން އެމެރިކާއާއި ޖަޕާނާއި އަދި ދެކުނު ކޮރެއާއިން ބޭއްވި މިލިޓްރީ ތަމްރީނުތައް ފެނިއްޖެކަން އަންގާލުމުގެ ގޮތުންނެވެ. އެމެރިކާއާއި ޖަޕާނާއި އަދި ދެކުނު ކޮރެއާ ގުޅިގެން ބޭއްވި މިލިޓްރީ ތަމްރީނު ތަކަކީ އުތުރު ކޮރެއާއަށް ދިން ފިލާވަޅެކޭ ބުނާތި ސޮލިޑް ފިއުލް ބޭނުންކޮށްގެން އުފައްދާފައިވާ “ ވާސޮންގް-19 “ މަރުކާގެ ބެލިސްޓިކް މިސައިލް ޖަޕާނު ކަނޑު ތެރެއަށް ފޮނުވާލީ ކަމަށް ސަފީރު ވިދާޅުވިއެވެ.
ވާސޮންގް-19 އަކީ މިހާތަނަށް އުތުރުކޮރެއާއިން ޓެސްޓްކުރި އެންމެ ދުރަށް ދަތުރުކުރާ މިސައިލެވެ. އެ މިސައިލް 4780 މޭލަށް ދަތުރުކުރާނެ ކަމަށް ބެލެވެއެވެ.
އުތުރު ކޮރެއާއިން ސޮލިޑް-ފިއުލް ބޭނުންކޮށްގެން އުފެއްދި ވާސޮންގް-19 މަރުކާގެ ބެލިސްޓިކް މިސައިލް ޓެސްޓްކުރުން އެމެރިކާއާއި ޖަޕާނާއި އަދި ދެކުނު ކޮރެއާއިން ވަނީ ކުށްވެރިކޮށްފައެވެ.
ސެކިއުރިޓީ ކައުންސިލްގައި ވާހަކަދައްކަވަމުން އުތުރު ކޮރެއާގެ ސަފީރު ވިދާޅުވީ ވާސޮންގް-19 ގެ ސަބަބުން އަވަށްޓެރި އެއްވެސް ގައުމަކަށް ނުރަނގަޅު އަސަރެއް ނުކުރާނެ ކަމަށެވެ. އެކަމަކު މިއަދު އެމެރިކާއިން އުތުރު ކޮރެއާއަށް ދެމުންގެންދާ ނިއުކްލިއަރ އިންޒާރުތަކާހުރެ އަހަރެމެން ނިއުކްލިއަރ ހަތިޔާރު އުފެއްދުން މާބޮޑަށް އަވަސް ކުރަން ޖެހިއްޖެއެވެ.
އެ ބައްދަލު ވުމުގައިވެސް އެމެރިކާއިން ގެންދިޔައީ އުތުރު ކޮރެއާ ހިމާޔަތް ކުރަން އުޅޭ ކަމަށްބުނެ ރަޝިޔާއާއި ޗައިނާއަށް އިނގިލި ދިއްކުރަމުންނެވެ. އެމެރިކާއިން އ ދ އަށް ކަނޑައަޅާފައި ހުންނަ ޑެޕިއުޓީ އެމްބަސެޑަރ ރޮބާރޓް ވުޑްސް ބުނެފައިވަނީ ޣައިރު ގާނޫނީ ގޮތުން އުތުރު ކޮރެއާ އިން ނިއުކްލިއަރ ހަތިޔާރު އުފައްދަން ރަޝިޔާއާއި ޗައިނާއިން އެހީތެރިކަން ފޯރުކޮށްދޭ ކަމަށެވެ.
