ފަނަރަ ވަނަ ބޮޑީ ބިލްޑިންގް މުބާރާތް ބޭއްވުމަށްފަހު ބޮޑީބިލްޑިން އެސޯސިއޭޝަން އޮފް މޯލްޑިވްސް (ބީބީއެމް) އިން ދިވެހި ރައްޔިތުންނާއި ރައީސުލްޖުމްހޫރިއްޔާ ޑރ.މުހައްމަދު މުޢިއްޒުގެ ފަރާތުން މާފަށް އެދިއްޖެއެވެ.
ބީބީއެމް އިން ނެރުނު ބަޔާނެއްގައި ބުނީ މިހާރު ކެނެރީފް މޯލްޑިވްސް ރިސޯޓުގައި ކުރިއަށް ގެންދާ 15 ވަނަ ވޯލްޑް ބޮޑީ ބިލްޑިން މުބާރާތާ ބެހޭ ގޮތުން އަމާޒުވެފައިވާ ފާޑުކިޔުންތަކާއި ގުޅިގެން ދިވެހި ރައްޔިތުންނާއި ރައީސް ޑރ. މުހައްމަދު މުއިއްޒުގެ ފަރާތުން މާފަށް އެދޭ ކަމަށެވެ.
އެގޮތުން މި މުބާރާތް ބޭއްވުމަށް ކޮންޓްރެކްޓް ހެދުމަށް ފަހު، މުބާރާތް ރާއްޖޭގައި ނުބޭއްވި ނަމަ، ރާއްޖޭގެ ކުޅިވަރު އެސޯސިއޭޝަންތަކަށާއި މާލީ ގޮތުންނާއި އެހެން ގޮތް ގޮތުން ރާއްޖެއަށް ގެއްލުން ލިބިދާނެތީ މުބާރާތް ކުރިއަށް ގެންދަން ނިންމީ ކަމަށް ވެސް އެ އެސޯސިއޭޝަނުން ނެރުނު ބަޔާނުގައި ބުނެފައި ވެއެވެ.
ހަމައެހެންމެ އެ އެސޯސިއޭޝަންގެ ފަރާތުން މިފަދަ ބައިނަލްއަގުވާމީ މުބާރާތެއް ހޯސްޓު ކުރުމަށް މަސައްކަތް ކޮށްފައިވަނީ ރާއްޖޭގެ ޕްރޮފައިލްއާއި ބައިނަލްއަގުވާމީ ކުޅިވަރުގެ ދުނިޔޭގައި ރާއްޖެ ވަރުގަދަ ތަނަކަށް ހަދާ ރާއްޖޭގެ އިގްތިޞާދަށާއި ޓުއަރިޒަމްއަށް ލިބޭނެ ކުރިއެރުމަށް ވިސްނާފައިކަމުގައި ވެސް އެ އެސޯސިއޭޝަނުން ބުނެފައިވެއެވެ.
މީގެ އިތުރުން މި މުބާރާތް ބޭއްވީ އާންމުން ދިރިނޫޅޭ ފަތުރުވެރިން އެމީހުންގެ ވައްޓަފާޅިއާ އެއްގޮތަށް އުޅެވޭ ގޮތަށް ހަދާފައިވާ ރިސޯޓެއްގައި .ކަންވެސް އެ އެސޯސިއޭޝަނުން ވަނީ ފާހަގަކޮށްފައެވެ. އަދިކުރިއަށްއޮތް މުސްތަގުބަލުގައި މިފަދަ ކަމެއް ތަކުރާރު ނުވާނެ ކަމުގެ ފުރިހަމަ ޔަގީންކަންވެސް އެ އެސޯސިއޭޝަނުން ވަނީ ދީފައެވެ.
|
