އިންޑިޔާގެ މަގުމަތީގައި ކާއެއްޗެތި ވިއްކާ ފަރާތްތަކުން އެތަކެއްޗަށް ކުޅުޖަހާ ތަޣައްޔަރު ކުރާ މައްސަލަ ބޮޑުވެގެންގޮސް އެކަން ހުއްޓުވުމަށް ގާނޫނު ހަދާ ހިސާބަށް ހިނގައްޖެ ކަމަށް ޚަބަރު ލިބެއެވެ.މިކަން އެންމެ ބޮޑުވެފައިވަނީ ވެރިކަންކުރާ ބީޖޭޕީގެ ވެރިކަން އޮންނަ އުތުރުގެ ސްޓޭޓް ތަކުގައި ކަމަށް ވެއެވެ.

ސޯޝަލް މީޑިއާގައި އާންމުވެފައިވާ ވީޑިއޯ ތަކާ ހަވާލާދީ ލިބޭ ޚަބަރުތައް ބުނާ ގޮތުން އެފަދަ ބައެއް ތަންތަނުގައި ކާއެއްޗިއްސަށް ކުޅުޖެހުމާއި، ވެލި އެޅުމާއި އަދި ބައެއް ފަހަރު ކުޑަކަމުދާ އެއްޗެތިވެސް އަޅާކަމަށް ވެއެވެ.

މިކަމާގުޅިގެން އުއްތަރަޚާންދް ސްޓޭޓްގައި މިހާރުވަނީ މިފަދަ ކަމެއް ކުރިމީހަކު ހިފިއްޖެ ނަމަ އެއްލައްކަ ރުޕީސް އިން ޖޫރިމަނާކުރާގޮތަށް ނިންމާފައެވެ. އަދި ޖެހިގެން އޮންނަ އުއްތަރަ ޕްރަދޭޝް އާއި އެހެން ބައެއް ސްޓޭޓް ތަކުގައިވެސް މިކަން ހައްލު ކުރުމަށް ހަރުކަށި ގާނޫނު ހަދަމުން ދާކަމަށް ވެއެވެ.

މިކަމަކީވެސް މުސްލިމުންނާ ހިންދޫންނާ ދެމެދު ކުރިޔަށްދާ ”ހަނގުރާމައިގެ“ ބައެއް ކަމަށް ވެއެވެ.

މުސްލިމް ފިރިހެނުން ހިންދީ އަންހެނުންނާއި އިދެ، އެމީހުން މުސްލިމް ކުރަމުން ގެންދާތީ ހިނދޫ ފިރިހެނުން ވަރަށް ރުޅި އާދެއެވެ.އަދި މިކަމަށް ދީފައިވާ ނަމަކީ ”ލަވް ޖިހާދެވެ.“ ހިންދޫ ބައެއް ފަރާތްތަކުން ގަބޫލު ކުރާ ގޮތުގައި މިގޮތަށް ކުޅު ޖަހާ ތަޣައްޔަރު ކުރަނީ މުސްލިމުން ހިންދޫން ނަށް ހަދާދޭ ކާއެއްޗިއްސެވެ.އަދި މިއީ ”ތޫކް ޖިހާދު“ ނުވަތަ ކުޅު ޖިހާދު ކަމަށް އެމީހުން ބުނާ ކަމަށް ވެއެވެ.

މުސްލިމުން ބުނަނީ މިކަމަކީ މުސްލިމުންގެ ބޮޅުގައި އިލްޒާމެއް އެޅުވުމަށް ހިންދޫން އަމިއްލަޔަށް ކުރަމުން ގެންދާ ކަމެއް ކަމުގައެވެ. ކާއެއްޗަކަށް ކުޑަކަމުދާ އެއްޗެތި އެޅިކަމަށް ބުނާ އަންހެންމީހާ އަކީވެސް މުސްލިމް އަންހެނެއްކަމަށް ފުރަތަމަ އަޑުއެރުވިއެވެ. ނަމަވެސް ފުލުހުންވެސް ފަހުން ބުނެފައިވަނީ އެއަންހެން މީހާއަކީ ހިންދޫއެއް ކަމުގައެވެ.

ކޮވިޑް ދުވަސް ވަރުވެސް އިންޑިޔާގައި މުސްލިމުންނާ ދެކޮޅަށް މިދަ ކެމްޕެއިންތައް ވަނީ ހިންގާފައެވެ. އަދި މިކަމުގެ ސަބަބުން ދީނީ ބައިބައިބައިވުން ވަނީ އިތުރަށް ބޮޑުވެގެން ގޮސްފައެވެ.

ކާއެއްޗިއްސަށް ކުޅުޖަހާ މައްސަލަ ބޮޑުވެގެންގޮސް ސަރުކާރުން މިހާރު ވަނީ ގަވާއިދު ތަކެއް އާންމު ކޮށްފައެވެ. މިގޮތުން ކޮންމެ ފުޑް އައުޓްލެޓެއްގައި ވެރިޔާގެ ނަމާއި ނަމްބަރު ބޮޑުކޮށް ޖެހުމަށް އަންގާފައި ވެއެވެ. އަދި ކާއެއްޗެތި ތައްޔާރު ކުރާމީހުން އަންގިލައްވާ، މާސްކް އަޅައިގެން ތިބުމާއި އެމީހެއްގެ ނަން ފެންނަ ގޮތަށް ޖަހާފައި ބެހެއްޓުމަށް ވަނީ އަންގާފައެވެ.އަދި ހުރިހާ ހޮޓާތަކާ ރެސްޓޯރަންޓް ތަކުގައި ސީސީޓީވީ ކެމެރާ ހަރުކުރުމަށް ވަނީ އަންގާފައެވެ.

ނުސާފު ކާބޯތަކެތީގެ ސަބަބުން އިންޑިޔާގައި އަހަރަކު ހަސަތޭކަ މިލިއަން މީހުން އިންފެކްޝަންގެ ސަބަބުން ބަލިވެއެވެ.އޭގެތެރެއިން 400މިލިއަން މީހުން މަރުވެއެވެ. މިހެން ދިމާވަނީ ކާބޯތަކެތީގެ ރައްކާތެރިކަމަށް ހެދިފައިވާ ގަވާއިދު ތަކަށް އަމަލު ނުކުރާތީއެވެ. ނުވަތަ އެކަމުގެ ހޭލުންތެރިކަން ކުޑަވީމައެވެ. ސާފު ނުކޮށް ހުންނަ ތެލި ތަށިބޭނުން ކުރުމާއި ނުސާފު ފެން ބޭނުން ކުރުމާއި ކާބޯތަކެތި އެއްތަނުން އަނެއްތަނަށް އުފުލުމާއި ރައްކާކުރުމުގައި ދޭންވާ ސަލާލުކަން ނުދޭތީ ފުޑް ޕޮއިޒަން ގެ މައްސަލަ ތަކާއި އިންފެކްޝަންގެ މައްސަލަ ތައް ބޮޑުވެއެވެ.

މައުލޫމާތު : ބީބީސީ