އެމެރިކާގެ ރިޔާސީ އިންތިހާބަށް ވަގުތު ކުޑަތަން ވަމުން އަންނަ އިރު މިހާރު އުފެދޭ އެއް ސުވާލަކީ ރިޕަބްލިކަން ޕާޓީން ވާދަ ކުރައްވާ ކުރީގެ ރައީސް ޑޮނަލްޑް ޓްރަމްޕް އަށް ވެރިކަން ލިބިވަޑައިގެންފިނަމަ އިޒްރޭލުގެ ބޮޑުވަޒީރު ނަތަންޔާހޫ އަށް ފައިދާވާނެ ބަދަލުތަކެއް ގެންނަވާނެތޯ މިސުވާލެވެ.
ކުރީ ފަހަރުވެސް ޓްރަމްޕް ގެ ވެރިކަމުގައި އެޅުއްވި ބައެއްފިޔަވަޅު ތަކުގެ ސަބަބުން ވަނީ ނަތަންޔާހޫއަށް އަމިއްލަ ގައުމުގައި އޭނާއަށް އޮތް ތާއީދު އިތުރު ވެގެން ގޮސްފައެވެ.އަދި ފަލަސްތީނާއި އަދި އަރަބި އެހެން ގައުމުތަކާ މެދު އެމެރިކާ އިން ޒަމާނުއްސުރެ ގެންގުޅެމުން އައި ޕޮލިސީ ތައް ވަނީ ބަދަލު ކުރައްވާފައެވެ.

ނޮވެމްބަރު 5ގައި ވޯޓުލުން އޮންނަ އިރު މިފަހަރުގެ ކެމްޕެއިންގައި ޓްރަމްޕް ދެއްވަމުން ގެންދަވަނީ ”މިކްސް“ މެސެޖް ތަކެއް ކަމަށް ވެއެވެ. މިގޮތުން އެއްކޮޅުން އީރާނުގެ ނިއުކްލިއަރ ފެސިލިޓީ ތަކަށް ބޮންއަޅަން ނަތަންޔާހޫ އަށް ޓްރަމްޕް ހިއްވަރު ދެއްވި އިރު،އޭނާ ވެރިކަމުގައި ހުންނެވިނަމަ އިޒްރޭލްގެ ހަމަލާތައް ހުއްޓާލަން ނަތަންޔާހޫ އަށް ޕްރެޝަރު ކުރައްވާނެ ކަމަށާ،އޮކްޓޯބަރު 7 ގެ ހަމަލާތައް ދޭންޖެހޭ ހަމަޔަށް ކަންތައް ގޯސް ނުވީސް ކަމަށް ކެމްޕެއިން ތެރޭގައި ޓްރަމްޕް ވިދާޅުވެފައި ވެއެވެ.
އެނަލިސްޓން ބުނާގޮތުގައި މިފަދަ ”މިކްސް“ މެސެޖްތަކާއި އެކުވެސް ޓްރަމްޕް ގެންގުޅުއްވާ ”މޭކް އެމެރިކާ ގްރޭޓް އަގެއިން“ ސްލޯގަންގެ ސަބަބުން ނަތަންޔާހޫއަށް އުންމީދުތަކެއް ލިބިވަޑައިގަންނަވައެވެ.
ޓްރަމްޕަކީ ކަންކަމާ ނުބެހުމުގެ އުސޫލެއް ގެންގުޅުއްވާ ބޭފުޅެއްކަމުން ގައްޒާ އަދި ލުބްނާން، އީރާންފަދަ ގައުމުތަކާ ދެކޮޅަށް ނަތަންޔާހޫ ބޭނުން ގޮތަކަށް ބޭނުން ކަމެއް ކުރެއްވުމުގެ ފުރުސަތު،ޓަރަމްޕް ވަޑައިގެންފިނަމަ ފުޅާވެގެންދާނެ ކަމަށް ވެއެވެ.
ހީބްރޫޔުނިވަސިޓީ ގެ ޕްރޮފެސަރަކު ވިދާޅުވެފައިވާ ގޮތުގައި ޓްރަމްޕަށް އިންތިޚާބް ކާމިޔާބް ވާނެ ކަމަށް ނަތަންޔާހޫ އުންމީދު ކުރައްވާނެއެވެ.އެއީ އޭރުން ބޭނުން ކަމެއް ބޭނުން އިރަކު ކުރެއްވުމުގެ ފުރުސަތު ބޮޑުވެގެން ދާނެތީއެވެ.
ނަތަންޔާހޫގެ ކުރީގެ ޗީފް އޮފް ސްޓާފެއް ވެސް ވަނީ މިމޭރުމުން ވާހަކަ ދައްކާފައެވެ.އޭނާވެސް ބުނެފައިވާގޮތުގައި މިހާތަނަށްވެސް ނަތަންޔާހޫ އާއި ރިޕަބްލިކަން ޕާޓީ އާއެކު އޮތް ގުޅުން ތައް،ޑިމޮކްރެޓުން ނާއެކު އޮތް ގުޅުމަށް ވުރެ މާރަގަޅެވެ.އަދި ޑިމޮކްރެޓުންގެ ޕޮލޮސީތައް ނަތަންޔާހޫއާއިމެދު މާ ”ޓަފް“ ކަމަށް އޭނާ ބުނެފައި ވެއެވެ.
ނަތަންޔާހޫ ބޮޑުވަޒީރުކަން ކުރައްވާފައިވާ 17 އަހަރުވެސް ދިމާވީ އެންމެ ރިޕަބްލިކަން ވެރިކަމަކާއެވެ. އެއީ ޓްރަމްޕް ގެ ވެރިކަމެވެ.
ޓްރަމްޕްގެ ވެރިކަމުގައި އެމެރިކާގެ އެމްބަސީ ވަނީ،އެތަނެއްގެ މިލްކިއްޔާތާމެދު އިޒްރޭލް އަދި ފަލަސްތީނުން ދައުވާ ކުރަމުންގެންދާ ޖެރޫސަލަމް އަށް ބަދަލު ކޮށްފައެވެ. މީގެ އިތުރުން ގޯލާން ހައިޓްސް ގެ މައްޗަށް އިޒްރޭލުގެ ނުފޫޒު ފުރިހަމަޔަށް ހިގަންޖެހޭނެ ކަމަށް ނިންމާފައިވެއެވެ. އަދި އަރަބި ތިން ގައުމަކުން އިޒްރޭލާއެކު ގުޅުން ގާއިމް ކުރުމަށް އެއްބާރުލުންދީ އެކަން ކުރުވާފައި ވެއެވެ.
މީގެ އިތުރުން އެމެރިކާއިން އީރާނާއެކު ހަދާފައިއޮތް މުހިންމު ނިއުކްލިއަރ އެއްބަސްވުމަކުން ޓްރަމްޕްގެ ވެރިކަމުގައި ވަނީ އެމެރިކާ ވަކިވެފައެވެ.އަދި އީރާނާ ދެކޮޅަށް ވަނީ ދަތިކުރުމުގެ ހަރުކަށިފިޔަވަޅު ތަކެއް އަޅާފައެވެ.
މިހާރުގެ ރައީސް ޖޯބައިޑަން އަކީ ޑިމޮކްރެޓް ރައީސެއް ނަމަވެސް އިޒްރޭލާއެކު ގެންދަވަނީ ”ޒާތެއްގެ“ ގުޅުންތަކެއް ބާއްވަވަމުންނެވެ.ހަމަ މިއާއެކު ބައިޑަން ވަނީ އީރާންގެ ތެޔޮ އަދި ނިއުކްލިއަރ ފެސިލިޓީ ތަކަށް ހަމަލާ ނުދިނުމަށް އަންގަވާ ނަތަންޔާހޫ އަށް އިންޒާރު ދެއްވާފައެވެ.
ޓްރަމްޕް އާއި ނަތަންޔާހޫ އާދެމެދު ގާތް ޒާތީ ގުޅުމެއް އޮންނަކަމަށް ވެއެވެ. ނަތަންޔާހޫ އާ އާންމުކޮށް ފޯނުން ގުޅުއްވާކަމަށާ ދެބޭފުޅުން ދެމެދު ގާތް ގުޅުމެއް އޮންނަކަމަށް ޓްރަމްޕް މިހަފްތާގަވެސް ވިދާޅުވެފައި ވެއެވެ. އަދި (ވެރިކަންލިބިއްޖެ ނަމަ) އިޒްރޭލާއެކު ގާތުން މަސައްކަތް ކުރައްވާނެ ކަމަށް ވިދާޅުވެފައި ވެއެވެ.
ނަތަންޔާހޫގެ އިތުރުން އިޒްރޭލްގެ އާންމު ރައްޔިތުންގެ ގިނަބަޔަކުވެސް ޓްރަމްޕަށް ތާއީދު ކުރާކަމަށް ވެއެވެ.ދާދި ފަހުން ހެދި ޕޯލަކުން ދައްކާ ގޮތުގައި އިޒްރޭލަށް އެންމެ ފައިދާ ބޮޑުވާނީ ޓްރަމްޕް ހޮވިގެން ކަމަށް އިޒްރޭލުގެ 68 އިންސައްތަ މީހުން ބުނެފައި ވެއެވެ. އިޒްރޭލްގެ ޕޮލިސީތަކަށް ތާއީދު ކުރައްވާ ކަމަށާ އަދި އަމިއްލަ ދިފާއުގައި ފިޔަވަޅު އެޅެންޖެހޭނެ ކަމަށް ޓްރަމްޕް އާއި ވާދަ ކުރައްވާ ކަމަލާ ހެރިސް އެތައްފަހަރަކު ވިދާޅުވެފައިވީ ނަމަވެސް ކަމަލާއަށް ތާއީދު ކޮށްފައިވަނީ އިޒްރޭލުގެ އެންމެ 14 އިންސައްތަ ކަމަށް ވެއެވެ.
އަނެއްކޮޅުން ފަލަސްތީން ރައްޔިތުންގެ މެދުގައި ޓްރަމްޕަށް ވެސް އަދި ކަމަލާ ހެރިސް އަށްވެސް މާބޮޑު ތާއީދެއް ނެތް ކަމަށާ ދެކެންޑިޑޭޓުންނަށް ވެސް ފަލަސްތީން ރައްޔިތުން އިތުބާރު ނުކުރާ ކަމަށް ފަލަސްތީންގެ ޕޮލިޓިކަލް ސައިންޓިސްޓެއް ބުނެފައި ވެއެވެ.އަދި ދެމީހުން ކުރެ ކޮންމެ މިހަކު ހޮވުނަސް ފަލަސްތީން ރައްޔިތުންނަށް ހެވެއް ނެތް ކަމަށް އެމީހުން ގަބޫލު ކުރާކަމަށް ވެއެވެ.