ހަމާސްގެ ލީޑަރ ޔަހްޔާ ސިންވާރު ޝަހީދުކޮށްލުމަކުން އެކްސިސް އޮފް ރެޒިސްޓޭންސް ނުހުއްޓުވޭނެކަމަށް އީރާނުގެ ސުޕްރީމް ލީޑަރ އާޔަތު ﷲ އަލީ ޚާމަނާއި ވިދާޅުވެއްޖެކަމަށް މިއަދު ހަރީރު ރޮއިޓާރސް އިން ޚަބަރު ދީފިއެވެ. އާޔަތު ﷲ އަލީ ޚާމަނާއި ވިދާޅުވެފައިވަނީ އެ ހަރަކާތަށް ނިސްބަތް ކުރެވޭ ގިން އިސްބޭފުޅުންތަކެއް ޝަހީދުވެގެން ދިއުމުގެ ފުން ހިތާމަ ހިތުން ނުފިލާނެ ކަމަށެވެ. އެކަމަކު އެކްސިސް އޮފް ރެޒިސްޓޭންސް އާއި ހަމާސްވެސް ދެމިއޮންނާނެއެވެ. ސިންވާރަކީ އަޒުމު ވަރުގަދަ އަދި ދުޝްމިނުންގެ ކުރިމަތީގައި ޖެހިލުން ކުޑަ ބޭފުޅެކެވެ.
އަހަރެމެންގެ ދުޢާއަކީ ޔަހްޔާ ސިންވާރުގެ ފުރާނަފުޅަށް ސުވަރުގޭގައި ޝަހީދުންގެ މަތިވެރި އިއްޒަތާއި ޝަރަފް މާތް ﷲ މިންވަރު ކޮށް ދެއްވުމެވެ. މާތް ﷲ ގެ މިންވަރު ފުޅާއެކު އަހަރެމެން އަބަދުވެސް ދެމި ތިބޭނީ އިސްލާމް ދީނާއި އިސްލާމީ އުންމަތުގެ ދިފާއުގައި އެންމެ ފުރިހަމަ ބައިވެރިއެއްގެ ގޮތުގައެވެ.
މިޚަބަރާއި ދާދި އެކުއެކުގައި ކަހަލަ ގޮތަކަށް އެމެރިކާގެ ނެކްސްޓަރ މީޑިއާ ގުރޫޕުގެ ނިއު ނޭޝަނަށް ހަމާސް އުފެއްދުމުގެ ބާނީ ސައްބާ ހަސަން ޔޫސުފް އަބޫ ސާލިމްގެ ފިރިހެންދަރި މުސްއަބް ހަސަން ޔޫސުފް މިއަދު ހަވީރު ބުނެފައިވަނީ ހަމާސްގެ ލީޑަރ ޔަހްޔާ ސިންވާރު މަރުވުމަކުން މެދު އިރުމަތީގެ ހަނގުރާމަ ނުހުއްޓުވޭނެ ކަމަށެވެ. ( އަޅުގަނޑުމެންގެ ކިއުންތެރިންނަށް މަސްއަބު ހަސަން ޔޫސުފްގެ ވަރަށް ކުރު ޚުލާސާއެއް މިތަނުގައި ގެނެސްދޭނަމެވެ. މުސްއަބް އުފަންވީ ރާމަ ﷲ ގައި 1978 ވަނަ އަހަރު ޖުލައިމަހު 5 ވަނަ ދުވަހުއެވެ. ހަމާސް ޖަމާއަތުގައި ގްރީން ޕްރިންސްގެ ނަމުން ނަންދެވުނު މުސްއަބު ހަމާސް ޖަމާއަތުގައި ހަރަކާތްތެރި ވުމުގައި ދުވަސްތައް ހޭދަކުރުމަށްފަހު 1997 ގައި ޔަހޫދީންނާއި ބައިވެރި ވީއެވެ. އެއަށްފަހު 1999 ގައި އިސްލާމް ދީން ދޫކޮށް ނަސާރާ ދީނަށް ވަނީއެވެ. އަދި އޭގެފަހުން އިސްރާއީލުގެ ދާޚިލީ ސަލާމަތާބެހޭ އިދާރާގައި ޖާސޫސް ކުރުމުގެ އޭޖެންޓެއްގެ ގޮތުގައި މަސައްކަތް ކުރަމުން ގެންދަނީއެވެ. މުސްއަބު ހަމާސްގެ ތެރޭގައި ހަރާކާތްތެރިވަމުން ގެންދިޔަ ދުވަސްތަކުގައިވެސް އޭނާއަކީ ހަމާސްގެ ތެރޭގައި ހުރި އިސްރާއީލުގެ އެންމެ އަގުބޮޑު ޖާސޫސެވެ. އޭނާގެ ސަބަބުން އިސްރާއީލުގެ ޖާސޫސުން ފަލަސްތީނުގެ އެތައް މުޖާހިދުންނަކަށް ކާމިޔާބީއާއެކު ފާރަލައި އެ މުޖާހިދުން ޝަޙީދުކުރުމުގެ ފުރުސަތު ފަހިކޮށްދީފައިވެއެވެ. އޭގެ ތެރޭގައި ހަމާސްގެ ކޮމާންޑަރ މަރްވާން ބަރްޣޯތީއާއި ހަމާސްގެ ވަރަށް އިސް ބޭފުޅަކުކަމުގައިވާ އިބްރާހިމް ހަމީދު ފަދަ ބޭފުޅުން ހިމެނި ވަޑައިގަންނަވައެވެ. ހަމައެއާއެކު ހަމާސް މުޖާހިދުންގެ އަމާޒުތަކުން ޔަހޫދީން ސަލާމަތްކޮށްދިނެވެ. އޭގެ ތެރޭގައި 2001 ވަނަ އަހަރު އިސްރާއީލުގެ ރައީސް އާއި ބޮޑުވަޒީރު ޝިމޯން ޕީރިސް އާއި ޚާރިޖީ ވަޒީރު މަރާލަން ހަމާސްއިން ރޭވި ރޭވުމުގެ ތަފްސީލު އިސްރާއީލަށް ދިނުންވެސް ހިމެނެއެވެ. އޭނާއަކީ މިހާރު ސިޔާސީ ހިމާޔަތުގެ ދަށުން އެމެރިކާގައި ދިރިއުޅޭ އެމެރިކާގެ ރައްވެއްސެކެވެ. އޭނާއަށް ސިޔާސީ ހިމާޔަތް ލިބެންޖެހޭކަމަށް ހެކިވެރިއެއްގެ ގޮތުގައި ސޮއިކޮށްދީފައިވަނީ އިސްރާއީލުގެ ދާޚިލީ ސަލާމަތާ ބެހޭ އިދާރަގެ ފަރާތުން ގޯނެން ބެން އިޒްހަކް އެވެ. ) މީޑިއާތަކަށް ތިލަވެފައިވާ މައުލޫމާތުތަކަށް ބާލާއިރު މިހާރުވެސް އޭނާ ގެންދަނީ އިސްރާއީލަށް ޖާސޫސް ކޮށްދެމުންނެވެ. އަދި އޭނާއެކޭ އެއްފަދައިން ހަމާސް އާއި ފަލަސްތީނުގެ ތޮފި އަޅައިގެން އިސްރާއީލަށް ޖާސޫސްކޮށްދޭ އެތައްބަޔަކު އެބަ ތިބިކަމަށްވެއެވެ. އެހެންވީމާ އިސްމާއީލް ހަނިއްޔާއާއި ޔަހްޔާ ސިންވާރުގެ ފަދަ އިސްރާއީލަށް ބޭނުންވެފައިވާ ހަމާސްގެ އިސް ބޭފުޅުންގެ ދިރިއުޅުއްވުން ހުރިނެތްގޮތް އިސްރާއީލުގެ ޖާސޫސީ އިދާރާއަށް ހާމަވަމުން ދިއުމަކީ ހިނގަ ހިނގާ ހުންނަކަމެކޭ ބުނެވިދާނެއެވެ.
ނިއުނޭޝަންއަށް މުސްއަބް ކިޔާދީފައިވާ ގޮތުގައި އޭނާގެ ލޮލުގެ އަމާޒަކީ އީރާނެވެ. އޭނާދެކޭގޮތުގައި އީރާނަށް ނިމުމެއް ގެންނަން ޖެހޭނެއެވެ. އާޔަތު ﷲ މަރާލަން ޖެހޭނެއެވެ. އީރާން ދެމިއޮތްހާ ހިނދަކު އިސްރާއީލުން ބޭނުންވާ އަމާޒަށް ވާސިލު ނުނެވޭނެއެވެ. ޔަހްޔާ ސިންވާރުގެ ބަދަލުގައި އެހެން ލީޑަރަކު އައްޔަންކުރާނެއެވެ. އޭނާވެސް ޖެހޭނީ މަރުވާށެވެ. ތެހެރާނާއި ބެއިރޫތާއި ގަތަރ އާއި ތުރުކީގައި އެމީހުން ދިރިއުޅުނަސް އެއިންކޮންމެ މީހަކީ ދިރިހުރި މައްޔިތެކެވެ.
އަޅުގަނޑުމެންގެ ކިއުންތެރިންނަށް މި ގެނެސްދީ ގައްޒާއާއި ފަލަސްތީނުގެ މައްސަލާގައި މެދުވެރިވަމުންދާ ހިތާމަތަކުގެ ހަގީގަތުން ވަރަށް ކުޑަކުޑަ މިންވަރެކެވެ. އަމިއްލަ ގޭތެރޭގައި އިދިކޮޅަށް ޖާސޫސު ކޮށްދޭ ބަޔަކު ތިބެއްޖެނަމަ ފަލަސްތީނުގެ މައްސަލައަށް ދާއިމީ ސުލްހައެއް ލިބުން އަދި ވަރަށް ދުރުކަމަށް ބުނެވިދާނެއެވެ.
One Response
މިލިއުމުގެ ފަހަތު ބައިން ބޮޑުމަންޒަރު ވަރަށް ރަނގަޅަށް ސާފު ވެއްޖެއެވެ. ޚަބަރާއި މައުލޫމާތު ގެނެސް ދެއްވާއިރު ހުޅަނގުގެ މީޑިއާތަކުން ފޮރުވަން މަސައްކަތްކުރާ ބައިންވެސް ކޮންމެވެސް ވަރަކަށް މައުލޫމާތު ކޮނެގެން ވިޔަސް ނެގުމަކީ ވަރަށް ބޭނުންތެރި ކަމެއްކަން އެނގިއްޖެއެވެ.