ތުރުކީ އިން ޑިސްކޯޑް މެސެޖިން ޕްލެޓްފޯމް ބްލޮކްކޮށްފިއެވެ. ތުރުކީ އިން ޑިސްކޯޑު ބްލޮކްކޮށްފައި މި ވަނީ ރަޝިޔާއިން ވެސް އެ ޕްލެޓްފޯމް މަނާކުރިތާ އެއް ދުވަސް ފަހުންނެވެ.

ތުރުކީގެ ކަމާބެހޭ ފަރާތްތަކުން ބުނީ ޑިސްކޯޑު މެސެޖިން ޕްލެޓްފޯމުން ބައެއް ކުށްވެރިންގެ މަޢުލޫމާތު ހޯދުމަށް ތުރުކީން އެދުމުން އެ މަޢުލޫމާތު ހަވާލު ކުރުމަށް ޑިސްކޯޑުން ދެކޮޅު ހެދި ކަމަށެވެ.

ބީޓީކޭ ކޮމިއުނިކޭޝަން އޮތޯރިޓީގެ ވެބްސައިޓުގައި ޝާއިއުކޮށްފައިވާ ބަޔާނެއްގައި ބުނީ ތުރުކީ އިން ބުދަ ދުވަހު ސޯޝަލް މީޑިއާ ޕްލެޓްފޯމް ޑިސްކޯޑް ބޮލްކްކޮށްފައިވާ ކަމަށެވެ.

ތުރުކީގެ ޖަސްޓިސް މިނިސްޓަރު ޔިލްމާޒް ޓަންކް ވިދާޅުވީ ތުރުކީން ޑިސްކޯޑަށް ވަނުން ހުއްޓުވަން އަންކާރާގެ ކޯޓަކުން ނިންމީ އެ ޕްލެޓްފޯމް ބޭނުންކޮށްގެން ބައެއް މީހުން ”ކުޑަކުދިންނަށް ޖިންސީ ގޯނާކުރުމާއި ފާޙިޝް އަމަލުތަކުގެ“ ޖަރީމާތައް ހިންގާފައިވާ ކަމުގެ ޝައްކު އެކަށީގެންވާ ވަރަށް ލިބިފައި ވުމުން ކަމަށެވެ.

ޔިލްމާޒް ވިދާޅުވީ ޒުވާނުންނާއި އެ ޤައުމުގެ ޅަ ދަރިން ސޯޝަލް މީޑިއާ އާއި އިންޓަނެޓުން ލިބޭ ގެއްލުންތަކުން ރައްކާތެރި ކުރުމަށް އަޒުމް ކަނޑައަޅާފައިވާ ކަމަށެވެ.

އަންގާރަ ދުވަހު ރަޝިޔާގެ ޓެލެކޮމް ވޮޗްޑޮގުން ވަނީ ޑިސްކޯޑް މަނާކުރާކަން އިއުލާންކޮށް، އެ ފިޔަވަޅު އަޅާފައި ވަނީ ޓެރަރިސްޓް ކުށްތަކަށް އަރައިގަތުމަށް އެ އެޕް ބޭނުންކޮށްގެން މެސެޖު ކުރުން ހުއްޓުވަން ކަމަށް ބުނެފަ އެވެ.

ޑިސްކޯޑު ބްލޮކް ކޮށްފައި ވަނީ ތުރުކީގެ އިސްތަންބޫލްގައި ހުކުރު ދުވަހު އުމުރުން 19 އަހަރުގެ ފިރިހެނަކު ދެ އަންހެނަކު މަރާލި މައްސަލައެއް ފެންމަތިވެފައި ވަނިކޮށެވެ. މީޑިއާ ރިޕޯޓްތައް ބުނާ ގޮތުގައި ޑިސްކޯޑް ބޭނުންކުރާ ބައެއް ފަރާތްތަކުން ވަނީ މަރުގެ އެ ހާދިސާއަށް ތައުރީފުކޮށްފަ އެވެ.

މިދިޔަ އޮގަސްޓް މަހު ތުރުކީން ވަނީ ކުޑަކުދިންނަށް ގެއްލުން ހުރި ކޮންޓެންޓްތަކާ ގުޅިގެން ވީޑިއޯ ގޭމް ޕްލެޓްފޯމް ރޮބްލޮކްސް ވެސް ބްލޮކްކޮށްފަ އެވެ. އަދި އެ ޤައުމުން ވަނީ އިންސްޓަގްރާމް ވެސް އެތައް ދުވަހެއް ވަންދެން ބްލޮކްކޮށްފަ އެވެ.