ނިމުނު ސެޕްޓެމްބަރު މަހަކީ މުޅިދުނިޔެއަށްވެސް ދެވަނަޔަށް އެންމެ ހޫނުވި ސެޕްޓެމްބަރު މަސް ކަމަށް އީޔޫ ކްލައިމެޓް މޮނިޓަރުން އަންގާރަ ދުވަހު ބުނެފި އެވެ. އަދި މުޅި 2024 ވަނަ އަހަރަކީ އެންމެ ހޫނުގަދަ އަހަރަށް ވާނެކަމަށް ގާތްގަނޑަކަށް ޔަގީން ކުރެވޭ ކަމަށްވެސް ބުނެފައި ވެއެވެ.
މޫސުމަށް އަންނަ ބަދަލުގެ ސަބަބުން ފިނިހޫނު މިނަށް ބޮޑެތި ބަދަލުތައް އައިސް ސެޕްޓެމްބަރުމަހު ދުނިޔޭގެ ވަރަށް ގިނަ ގައުމުތަކަށް ވަނީ ވަރަށް ބޯކޮން ވާރޭވެހި ފެން ބޮޑުވުމުގެ ހާދިސާތަކާވެސް ކުރިމަތިލާން ޖެހިފައެވެ. މިގޮތަށް ވާރޭ ވެހެނީ ހޫނު ގަދަ ވުމުގެ ސަބަބުންނެވެ.
މިއަހަރުގެ ސެޕްޓެމްބަރު މަހަށްވުރެ ހޫނުމިން މައްޗަށް ގޮސްފައިވަނީ ހަމައެކަނި 2023 ވަނަ އަހަރުގެ ސެޕްޓެމްބަރުމަހުއެވެ. އީޔޫގެ ކްލައިމެޓް މޮނިޓަރގެފަރާތުން ރެކޯޑްތައް ގާއިމް ކުރުމަށްޓަކާ ސެޓަލައިޓްތަކާއި މަނަވަރުތައް،މަތިންދާބޯޓުތަކާ އަދި ވެދަރ ސްޓޭޝަން ތަކުންނަގާ އެތައް ބިލިއަން ރެކޯޑްތަކަށް ރިއާޔަތް ކުރެއެވެ.
”ގްލޯބަލް ވޯމިންގ“ އަކީ ހަމައެކަނި އުފުލެމުންދާ ޓެމްރޭޗަރެއް ނޫނެވެ. ”އެޓްމޯސްފިއަރ“ ގައި ބަންދު ވާ ހޫނުވައިން ކުރާ އަސަރުވެސް މީގެ ތެރޭގައި ހިމެނެއެވެ.
ކަނޑުތައް ހޫނުވުމުން ޖައްވަށް އަރާ ހޫނުވައިގައި ވޯޓަރވޭޕާ ނުވަތަ ފެން އެކުލެވޭ މިންވަރު އިތުރެވެ.އެހެން ކަމުން ވާރޭވެހޭ މިންވަރު އިތުރު ވެގެން ދެއެވެ.
ސެޕްޓެމްބަރުމަހު ދުނިޔޭގެ ބައެއް ހިސާބުތަކަށް މަހެއްހާ ދުވަހުގެތެރޭ ވެހޭހާ ވާރޭ މަދު ދުވަސް ކޮޅެއްގެ ތެރޭ ވެހިފައިވެއެވެ.
މިއޮކްޓޯބަރު މަހުގެތެރޭވެސް އާދަޔާޚިލާފަށް ގިނައިން ވާރޭވެހި ފެންބޮޑުވުމުގެ ހާދިސާތައް ދަނީ ހިނގަމުންނެވެ.މިގޮތުން ތޫފާން ހެލީން އެމެރިކާގެ ބައެއް ސްޓޭޓް ތަކަށް އަރާ ބޮޑެތި ގެއްލުންތައް ދީފައިވާއިރު،ސެންޓްރަލް ޔޫރަޕްގެ ގައުމުތަކަށް ބޮރިސް ތޫފާން ގެ ސަބަބުން ބޮޑެތި ގެއްލުންތައް ލިބިފައި ވެއެވެ.މީގެ އިތުރުން ތައިވާނަށްވެސް ވަނީ ވަރުގަދަ ތޫފާނެއް އަރާފައެވެ.
އޭޝިޔާ އަދި އެފްރިކާއަށް ބަލާއިރު ”ޔަގީ“ އަދި ”ބެބިންކާ“ ތޫފާނުގެ ސަބަބުން ބޮޑެތި ގެއްލުންތައް ވެފައިވާއިރު،ނޭޕާލް ޖަޕާން އަދި ވެސްޓް އަދި ސެންޓަރލް އެފްރިކާ ގައިވެސް ވަނީ ފެންބޮޑުވެ ބޮޑެތި ގެއްލުން ތަކެއް ލިބިފައެވެ.
ބޯވާރޭގެ އަސަރު ކުރި އެހެން ގައުމުތަކުގެ ތެރޭގައި ރަޝިޔާ، ޗައިނާ، އޮސްޓްރޭލިޔާ ބްރެޒިލްގެ އިތުރުން ޕާކިސްތާންއަށް ވެސް ވަނީ މޫސުމީ ވާރޭގެ ސަބަބުން ވަރަށް ބޮޑަށް ފެންބޮޑުވެ ބޮޑެތި ގެއްލުންތައް ލިބިފައެވެ.
އީޔޫގެ މޫސުމީ އިދާރާއިން ބުނެފައިވާ ގޮތުގައި މިއަހަރުގެ ޖެނުއަރީ އިން ސެޕްޓެމްބަރާ ހަމަޔަށް ނެގުނު ރެކޯޑަތަކަށް ބަލާއިރު 2024ވަނަ އަހަރަކީ މިހާތަނަށް ފެނުނު އެންމެ ހޫނުގަދަ އަހަރު ކަމަށް ވާނެކަން ގާތްގަނޑަކަށް ޔަގީނެވެ.
