ކޮންމެ މީހަކު ދެއްކިއަސް ރަނގަޅު ވާހަކަ އެއްވިއްޔާ ގަބޫލު ކުރުމަކީ މާތްސިފައެކެވެ. މި ސަރުކާރު ވެރިކަމަށް ގެނައުމަށް މަސައްކަތް ކުރި އެއްވެސް ރައްޔިތަކު މި ސަރުކާރު ބަލިވާތަން ދެކެން ބޭނުމެއް ނުވާނެއެވެ. އެހެނަސް ރައީސް މީހާ ރައްޔިތުންނަށް ވެފައިވާ ވަޢުދުތައް ސަރުކާރަށް ލެވިފައި ތިބި ގަމާރު ބައެއްގެ ރައުޔަށް ދޫކޮށްލުމަކީ ރައްޔިތުންގެ ކުރިމަތީގައި ރައީސް މީހާގެ އަގު ކިސަޑުވެ ދެމިގެން ހިނގައިދާނެ ކަމެކެވެ.

 ރައްޔިތުން އުންމީދު ކުރިފަދަ ތެދުވެރި ވަފާތެރި އަމާނާތްތެރި އިޚުލާސްތެރި ވެރިޔަކަށް ވެވޭނީ މޮޔަ ރަޙުމަތްތެރިންގެ ކިބައިން ރައީސް މީހާ ފެއަށްޖެހިގެން ކަން ޔަގީނެވެ.

މި ސަރުކާރު އެ ދަހިވެތި މޮޔަ ރަޙްމަތްތެރިން ރުއްސުމަށްޓަކައި މިހާރު ޚަރަދު ކުރަމުން މިދާ ސުމާރެއްނެތް ސްޕީޑުގައި ސަރުކާރުން ޚަރަދުތައް ކުރަމުން ގޮސްފިނަމަ އެކަމުގެ ނޭދެވޭ އަސަރު ކުރިއަށް އޮތް ދެ އަހަރު ނިމޭއިރު ރާއްޖޭގެ އިގްތިޞާދަށްކޮށް ދައުލަތުގެ މުޅި އިގްތިޞާދު އޮންނާނީ ފުނޑިފައެވެ. މިހާރުވެސް އެ އޮތީ ނޭވާހޮޅިއަށް ކޮށި އަރާފައެވެ

 އެހެން ކަމާއިއެކު ސިޔާސީ ގަމާރު ތަކަށް ދީފައިވާ ވަޒީފާތައް މިހާރު ހުރިވަރަށްވުރެ %30 އިންސައްތަ އަށް ކުޑަކޮށް ވުޒާތަކުގެ ސައިޒާއި އިތުރުކުރަމުންދާ ޔުނިޓްތަކާއި މުޅިސަރުކާރުގެ ސައިޒުވެސް %30 އިންސައްތައަށް ކުޑަކޮށް ގައުމު ސަލާމަތް ކުރަން މިވަނީ ޖެހިފައެވެ. ހަދިޔާ ބަހާގޮތަށް ދީފައިވާ ސިޔާސީ މަގާމުތައް އުނިފިނަމަ ކޮންމެ މަހަކު 50 މިލިއަން ރުފިޔާ ރައްކާ ކުރެވޭނޭ ކަމަށް އިގްތިޞާދީ މާހިރުން ލަފާދެއެވެ. އަނެއްކޮޅުން މި ސަރުކާރުން ސިޔާސީ މަގާމުތައް ބަހަމުން ގެންދަނީ ބަހާ ވަޒީފާތަކުގެ ލަޔާގަތާއި ގާބިލިއްޔަތުކަން ލިބިފައިވާ ނުވާ އަދި ޢިލްމާއި ހުނަރަށް ބެލުމެއްނެތި ރައީސް މީހާ އާއި ޑީލް ހަދައިގެން  ތިބި ބަޔަކު ބުނާހާ ބަޔަކަށެވެ.

 ސަރުކާރެއް ހިންގޭނީ ޢިލްމީ ގާބިލް ހުނަރުވެރި އަދި ތެދުވެރި ވަފާތެރި އަމާނާތްތެރި އިޚުލާތެރި ބަޔަކު މަގާމް ތަކަށް ލައިގެތާއެވެ. ދައުލަތުގެ ހުންގާނުގައި ހުންނަންވާނީ އަމިއްލައަށް އޮޑި ދުއްވަން އެނގޭ ފަދަ  މީހެކެވެ. ކަމުގެ ތަޖުރިބާއެއް ޢިލްމެއް ނެތް ބަޔަކު ބުނާހާގޮތަކަށް ދަތުރުގެ މިސްރާބު ބަދަލު ކުރަމުން ދާނަމަ މެދުކަނޑަށް ނުކުތުމުގެ ކު ރިން އޮޑި ދިޔަހިލިދާނެއެވެ. ދެން އޮޑި ފެތޭނީއެވެ.

ވަގަކާ ތިޖޫރީއެއް ޙަވާލު ކުރާއިރު އޭނާ ވައްކަން ނުކުރާނެ ކަމަށް ހީކުރުމަކީ މޮޔަ ހީއެކެވެ. މިޔަކީ ބުނެދޭން ޖެހޭވަރުގެ ވާހަކައެއްވެސް ނުމެ ނޫނެވެ.

 މި ސަރުކާރުން ސިޔާސީ މަގަމުދެއްވާފައިވާ މީހުންގެ ތެރޭގައި ގިނައީ އެމީހުންގެ ސަބަބުން ސަރުކާރަށްވެސް އަދި ރައްޔިތުންނަށްވެސް ފައިދާއެއް ނުލިބޭ ބޭކާރު މީހުންނެވެ. ސިޔާސީ މަގާމުތަކުގައި ތިބި ގިނަ މީހުން އޮފީހުގައި އިށީންނާނެ ގޮޑިއެއްވެސް ނެތެވެ. އެހެނަސް ކޮންމެ މަހަކު އެމީހާއަށް ދައުލަތުގެ ބައިތުލްމާލުން ތިރީސްހާސް ސާޅީސް ހާސްރުފިޔާ އެބަދެއެވެ.

ވަޒީރުކަމަކީ ވެސް ބައްޕަ ބޭބޭ ނުވަތަ މެޑަމް ބުނީތީ ދެވޭއެއްޗަކަށް ވެގެން ނުވާނެ ނޫންތޯއެވެ. އެއީ ޢިލްމީ ގާބިލް ހުނަރުވެރި ޢިޚުލާސްތެރި އަމާނާތްތެރި އަދި އޭނާގެ ކިބައިއިން ދައުލަތަށާއި ރައްޔިތުންނަށް ފައިދާލިބޭފަދަ ކޭޕަބްލް މީހުނަށް ދޭންޖެހޭ މަގާމުތަކެކެވެ. ރައީސް މީހާގެ އަރިހުގައި ޕާޓީގެ ބޮޑަކު ބުންޏަސް ރައީސްމީހާ ވެސް ސިޔާސީ މަގާމަކަށް އިއްޔެ ގޮނޑު ހޮވަން ހުރި ސަރުދާރުން ލައިގެންނުވާނެއެވެ. މި ކަންކަމުގެ ހިތްދަތިކަމާ ދެރަކަން މީގެ ދެ އަހަރު ފަހުން ރައްޔަތުން ތަޙަންމަލް ކުރާންޖެހޭ މަންޒަރު އިރު ފެންނަ ފަދައިން އެބަ ފެނެއެވެ.

ރައީސް މުޢިއްޒު އެވެ. ވެރިކަން ޙަވާލުކުރެވިފައި ވަނީ މާތްﷲ ގަންދީ ހުވައެއް ކުރުވާފައެވެ. އެ ހުވާ ކުރުވީސް ބިސްމިނުގެ ބަރަކާތުންނެވެ. އެހެން ކަމުން މާތްﷲ ދެކެދެނެ އަޑުއައްސަވާ ވޮޑިގެންވާކަން ގަބޫލުކުރާ ޙާލުގައި އެ ހުވަޔާއި އެއްގޮތަށް ވެރިކަން ނުކޮށްފިނަމަ ހިނދު ކޮޅެއްގެ ތެރޭގައި ތިވެރިކަން ގެންދެވުމަށް ﷲ ކުޅުދުން ވަންތައެވެ. މަނިކުފާނުގެ އަރިހުގައި ތިއްބެވި އެމްއެމްޕީއާރުސީގެ ވަގުންގެ ޢާއިލާތަށް އަކުރެއް ބަކުރެއް ނޭނގުނަސް ވެރިކަމުގެ ބާރުގެ ތެރެއަށް ތިޔަ ގެންދަވަނީ ޙައްދެއް ނެތް މިންވަރަށް ވައްދަމުންނެވެ. ދައުލަތަށް ފައިދާ ހޯދައި ނުދެވޭ އަދި ދައުލަތަށް ގެންލުންވާގޮތަށް ސަރުކާރުގެ ސިޔާސީ މަގާމުތައް އިތުރުކޮށް ނުބައްސަވާށެވެ.

  ރާއްޖެއަށް އެހީވާ އަވަށްޓެރި ގައުމުތަކުގެ ވެރިންނަށް މި ސަރުކާރުގެ ސިޔާސަތުތައް ރަނގަޅެއް ނޫނެވެ. އެހީ ލިބުމަށް ހުރަސް އެޅިގެން އެދަނީ މަނިކުފާނު ތިޔަ ގެންގުޅުއްވާ އަމިއްލަ ބާރެއް ނެތް ސިޔާސަތުގެ ސަބަބުންނެވެ. މަނިކުފާނުގެ އަރިހުގައި ތިޔަ ގެންގުޅުއްވާ ގިނަ އިސް ބޭފުޅުންނަކީ މަނިކުފާނަށްވެސް އަދި ސަރުކާރަށްވެސް އިޚުލާޞްތެރި ބައެއް ނޫނެވެ. އެބޭފުޚުންގެ ޢާއިލާތަކަށް ސަރުކާރުގެ މަގާމުތަކާއި ޕްރޮޖެކްޓްތައް ލިބުމުން ސަރުކާރު އިނދަ ޖެހުނަސް  އެމީހުނަށް ވަރިހަމަ ވާނެއެވެ.

އެހެން ކަމާއެކު ސަރުކާރުގެ ޚަރަދުތައް ކުޑަކޮށްގެން މެނުވީ ދައުލަތުގެ މާލީ ސިޔާސަތަށް ހެޔޮ ބަދަލެއް ފެންނާނެ ގޮތެއް ނުވާނެއެވެ. ވިސްނަވާށެވެ. ގައުމާ ރައްޔިތުންގެ ފައިދާއަށްވުރެ ބޮޑަށް އަމިއްލަ އެދުން ބޮޑު ބަޔަކު މަނިކުފާނަށް ތިޔަ ވަނީ ގާތް ކުރެވިފައެވެ.އެހެން ކަމުން ދައުލަތަށް ލިބޭ އެއްޗަކަށް ވުރެ ހިނގާ ޚަރަދު ބޮޑުވަމުންދާނަމަ ސަރުކާރު ނުހިންގި މަނިކުފާނުގެ ގަދަރާއި ޝަރަފް ރައްޔިތުންގެ ކުރިމަތީގައި ގެއްލި ރައްޔިތުންގެ ނަފުރަތާ ރުޅިވެރިކަން މަނިކުފާނަށް އަމާޒުވެގެން ހިނގައިދާނެއެވެ. އެހެންކަމާއެކު މަނިކުފާނަށް ހެޔޮއެދޭ މީހެއްގެ ހައިސިއްޔަތުން އަޅުގަނޑު ބުނެލަން ބޭނުންވަނީ ތިޔަގޮތަށް ސަރުކާރުން ބޭކާރު ޚަރަދުކުރުން ހުއްޓަވާލެއްވުމަށެވެ.

   ސަރުކާރުގެ މިހާރުގެ ސިޔާސަތު ބަދަލު ނުކޮށް ތިޔަ ގެންދަވާގޮތަށް ކުރިއަށް ގެންގޮސްފިނަމަ ކިތަންމެ ގިނައެހީ ދައުލަތަށް ލިބުނަސް ދެކޮޅުނުޖެހި ކުރިއަށް މިއޮތް ދެއަހަރު ދުވަހުގެ ތެރޭގައި ސަރުކާރު އިނދަޖެހިގެ ދާނޭ ކަމީ ޔަގީންވާ ކަމެކެވެ. އެހެންކަމުން މަނިކުފާނު ރައްޔިތުންނަށް ވެ ވަޑައިގެންފައިވާ ވަޢުދުތައް ނުފުދި މަނިކުފާނުގެ އަގު ވެއްޓި ރައްޔިތުން ސަރުކާރާ ދެކޮޅުވެރި ވެދާނެއެވެ.