މިސެޕްޓެމްބަރު މަހުގެ ފަހުކޮޅުން ފެށިގެން ދުނިޔެއަށް ދެވަނަ ”މިނީ“ ހަނދެއް ފެންނާނެ ކަމަށް ސައިންސްވެރިން ބުނެފިއެވެ. ކުޑަ ހަނދެއްގެ ގޮތުގައި ފެންނާނީ ހަގީގަތުގައި އެސްޓަރރޮއިޑް އެއްކަމަށްވެއެވެ. ސައިންސް ގެ ހޯދުންތަކުން ދައްކާފައިވާ ގޮތުގައި ކުޑަ އެސްޓަރރޮއިޑް އެއް ދުނިޔޭގެ ގްރެވިޓީގެ ބާރުގެ ސަބަބުން ހަނދެއްހެން ދުނިޔެ ވަށާ އެނބުރެން ފަށަނީއެވެ.

އައު ހަނދު މިމަހުގެ 29ން ފެށިގެން ފެންނަން ފަށާނެ ކަމަށާ ނަމަވެސް ހަމަލޮލަށް ނުފެންނާނެ ކަމަށް ޚަބަރު ތަކުގައި ބުނެފައިވެއެވެ. ޕްރޮފެޝަނަލް ޓެލެސްކޯޕް އަކުން އެކަނި ފެންނާނެ ހަނދު ދެމަސްދުވަސް ވަންދެން ދުނިޔެވަށާ އެބުރުމަށްފަހު އަނެއްކާވެސް ގެއްލޭނެ ކަމަށް ވެއެވެ.
މިފަހަރުގެ އެސްޓަރރޮއިޑް ނާސާ ގެ ސިސްޓަމަށް ފުރަތަމަ ފާހަގަ ކުރެވިފައިވަނީ އޮގަސްޓް ހަތްވަނަ ދުވަހުއެވެ.
ސައިންސްގެ ހޯދުންތަކުން ފާހަގަކޮށްފައިވާ ގޮތުގައި ބައެއް އެސްޓަރރޮއިޑް ދުނިޔެއާއި 4.5މިލިއަން ކިލޯމީޓަރު ހާކައިރިން ދަތުރުކޮށްފައިވެއެވެ.ރިސާޗަރުން ބުނެފައިވާ ގޮތުގައި މިފަދަ އެސްޓަރރޮއިޑް އެއް ނިސްބަތުން މަޑު ސްޕީޑެއްގައި ދަތުރު ކުރާނަމަ ދުނިޔޭގެ ގްރެވިޓީގެ ބާރަށް ދަމާ، އަދި ގްރެވިޓޭޝަނަލް ފީލްޑް ގައި ދުވަސްކޮޅަކަށް ހައްޔަރުވާ ގޮތް ވެއެވެ.
އަލަށް ފެންނަންފަށާ ހަނދަށްވެސް ވާނީ މިހެންކަމަށް ރިސާޗަރުން ބުނެއެވެ.އަދި ދެމަސްދުވަސްވަންދެން ދުނިޔެވަށާ އެނބުރޭނެ ކަމަށްވެއެވެ.އެސްޓްރޮނޮމާ ޖެނިފާ މިލާޑް ބީބީސީ ޓުޑޭ ޕްރޮގްރާމްއަށް މައުލޫމާތު ދީފައިވާ ގޮތުގައި އައު ހަނދު ދުނިޔޭގެ ގްރެވިޓީ ފީލްޑުން ނިކުންނާނެ ކަމަށް ބެލެވެނީ 25 ނޮވެމްބަރުގައެވެ.
މި އެސްޓަރރޮއިޑް ގެ ސައިޒަކީ 32 ފޫޓުކަމަށާ މިއީ ދުނިޔޭގެ އަސްލުހަނދާ ނިސްބަތްކުރާއިރު ވަރަށް ކުޑަސައިޒެއް ކަމަށް ފާހަގަ ކުރެވެއެވެ. އަސްލު ހަނދުގެ ޑައެމީޓަރު ކަމަށް ބަލާފައިވަނީ ގާތްގަނޑަކަށް 3،474ކިލޯމީޓަރެވެ.
އައު ހަނދުގެ ސައިޒް ކުޑަކަމާއި އަދި ހަނދުގައި އެކުލެވިގެންވާނީ ކަޅު،ގައު ޒާތުގެ މާއްދާތައް ކަމުން ބައިނޮކިއިލާ ތައް ނުވަތަ ހޯމް ޓެލެސްކޯޕް ތަކަށްވެސް ނުފެންނާނެ ކަމަށް ވެއެވެ.
މީގެ ކުރިންވެސް މިނީ ހަނދުތައް ޕްރޮފެޝަނަލް ޓެލެސްކޯޕްތަކަށް ފެންނަހާ ކައިރިޔަށް އައިސްފައި ވެއެވެ.އަދި ބައެއް ހަނދުތަކުގެ ހަބަރެއް ނުލިބި ގޮސްފައިވެސް ހުންނާނެކަމަށް ބެލެވޭ ކަމަށް ސައިންސްވެރިން ބުނެފައި ވެއެވެ.
ބައެއް މިނީ ހަނދު ދެވަނަ ބުރަކަށް އައިސްފައިވާ ކަމަށްވެސް ވެއެވެ. މިގޮތުން
ނަވާރަސަތޭކަ އަށްޑިހައެއްވަނަ އަހަރު ފެނުނު އެސްޓަރރޮއިޑް އެއް 2022 ގައިވެސް ފެނުނުކަން ސައިނަސްވެރިން ފާހަގަ ކުރެއެވެ.
މިފަހަރު ފެންނަ އެސްޓަރރޮއިޑްވެސް 2055ގައިވެސް ފެންނާނެ ކަމަށް ވެއެވެ.
މައުލޫމާތު: ބީބީސީ