ޒަޔަނިސްޓް އިސްރާއީލުން ލުބުނާނުގައި ހިޒްބު ﷲ ޖަމާއަތާއި ކުރިމަތިލާ ހިންގަމުން އަންނަ ހަމަލާތައް ހުއްޓާލަން ޔޫކޭގެ ބޮޑުވަޒީރު ކިއަރ ސްޓާމަރ ގޮވާލައްވައިފިއެވެ.
ސްޓާމަރ މިގޮތަށް ގޮވާލައްވާފައި ވަނީ އެމެރިކާގެ ނިއުޔޯކުގައި ދުނިޔޭގެ ލީޑަރުންގެ މެދުގައި މިހާރު ކުރިއަށްދާ އދ.ގެ އާންމު މަޖިލީހުގައި ވާހަކަދައްކަވަމުންނެވެ.
ސްޓާމަރ ވަނީ ލުބުނާނުގައި އިސްރާއީލާއި ހިޒްބުالله އާއި ދެމެދު ކުރަމުން އަންނަ ހަނގުރާމަ ހުއްޓާލުމަށް ގޮވާލައްވާފައެވެ.
ހަމައެހެންމެ ޑިޕްލޮމެޓިކް ސެޓްލްމަންޓަކަށް ޖާގަ ހޯދުމަށް ވަގުތުން ހަނގުރާމަ ހުއްޓާލަން ބަލަން ޖެހޭ ކަމަށް ސްޓާމަރ ވަނީ ވިދާޅުވެފައެވެ.
ސްޓާމަރ އިންޒާރު ދެއްވި ގޮތުގައި ހަނގުރާމަ ނުހުއްޓުވިއްޖެނަމަ ހުރިހާ ފަރާތަކުން ކުށެއްނެތް އާންމުންނަށް އިތުރު ގެއްލުމާއި ތަކުލީފު ލިބި ކޮންޓްރޯލް ނުކުރެވޭނެ ވަރުގެ ފުޅާ ހަނގުރާމައެއް ފެށިދާނެއެވެ.
މީގެ އިތުރުން އިސްރާއީލުން ފަލަސްތީނުގެ ޣައްޒާގައި ހިންގަމުން އަންނަ ހަނގުރާމައިގެ ޖަރީމާތައް ހުއްޓާލުމަށާއި ހަމާސްއިން ހިފަހައްޓާފައިވާ ރަހީނުން ދޫކޮށްލުމަށް ވެސް ސްޓާމަރ ވަނީ ގޮވާލައްވާފައެވެ.
ހޯމަ ދުވަހުން ފެށިގެން އިސްރާއީލުން ލުބުނާނަށް ދިން ވައިގެ ހަމަލާތަކުގައި 600 އަށް ވުރެ ގިނަ މީހުން މަރުވެފައި ވާއިރު، އޭގެ ތެރޭގައި ބުރާސްފަތި ދުވަހު 92 މީހުން މަރުވެފައިވާ ކަމަށް ލޯކަލް އޮތޯރިޓީތަކުން ބުނެ އެވެ.
ހިޒްބުالله އިން ވަނީ އެކަމަށް ރައްދުދީ އިސްރާއީލުގެ އުތުރަށް އެތައް ސަތޭކަ ރޮކެޓު ހަމަލާ ފޮނުވާލާފައެވެ.
One Response
ތިޔަ ދެވެނީ ރައްދު ހެއްޔެެވެ؟ އަމިއްލަ 600 މީހުން މަރުވާއިރު ތިޔަ ޢަރުވަނީ ހަވާނޫން ހެއްޔެވެ؟ އިސްރާއިލް މީހެއްގެ ހިޔަންޏަށްވެސް ތިޔައިން މިސައިލެއް ނުފޯރައެވެ. މިހަމާސް މީހުންނާއި ހިޒްބުﷲ މީހުންނާއި އިސްރާއިލް މީހުން އެއްބައި ވެގެން މަރަނީ ފަލަސްތީނު މީހުންހެން އެބަހީވެއެވެ.