ބޭންކް އޮފް މޯލްޑިވްސް(ބީއެމްއެލް)އަށް ދައްކަންޖެހޭ ލޯނެއް ނުދެއްކުމުން މާލޭގެ ދެ ގެއެއް ވިއްކާލަން އެ ބޭންކުން ނިންމައިފިއެވެ.
ބީއެމްއެލް އިން ކުރި އިއުލާނެއްގައި ބުނީ ނީލަމުގައި އެންމެ ބޮޑު އަގެެއް ހުށަހަޅާ ފަރާތަކަށް ސަންފްރަންޓް ލައިޓްޝޮޕްގެ ގޯޅިތެރޭގައި ހުންނަ މ. ނާއިންފަރުއާގެ އާއި ބިސްބުރު ކައިރީގައި ހުންނަ މ. ބީޗްކޯނާ ވިއްކާލަން ނިންމާފައިވާ ކަމަށެވެ.
ނާއިންފަރުއާގެ އަކީ 792 އަކަފުޓޫގެ ގެއެއް ކަމަށާއި ނާއިންފާރުއާގެ ގަތުމަށް އަންނަ މަހުގެ 10ގެ މެންދުރު 12:00ގެ ކުރިން ނީލަން ހުށަހެޅޭނެ ކަމަށް ބީއެމްއެލްއިން ހާމަކުރެއެވެ. އަދި މިގެ ގަތުމަށް ނީލަން ހުށަހެޅޭނެ އެންމެ ދަށް އަގަކީ 13 މިލިއަން ރުފިޔާކަމަށް ބީއެމްއެލް އިން ހާމަކުރެއެވެ.
ހަމައެހެންމެ ބީޗްކޯނާއަކީ 927.33 އަކަފޫޓުގެ ބިމެއް ކަމަށާއި ބީޗްކޯނާއަށް ނީލަން ހުށަހެޅޭ އެންމެ ދަށް އަގަކީ 23.8 މިލިއަން ރުފިޔާކަމަށް އެ ބޭންކުން ހާމަކުރެއެވެ. މީގެ އިތުރުން ބީޗްކޯނާ ގަތުމަށް ނީލަން ހުށަހެޅުމުގެ ސުންގަޑިއަކީ އަންނަ މަހުގެ 15 ވަނަ ދުވަހުގެ މެންދުރު 12:00ކަމަށް ބީއެމްއެލްއިން ހާމަކުރެއެވެ.
މީގެ އިތުރުން ބީއެމްއެލް އިން ބުނީ މި ދެ ގެ ގަތުމަށް ހުށަހަޅާ ނީލަން ނިންމާލާނީ އެންމެ މަތީ އަގު ކަމުގައި އިއުލާނުކުރެވޭ އަގަށް ބަދަލެއް ނައިސް ފަސް ދުވަސް ވަންދެން އޮތުމުން ކަމަށެވެ.
