އިންޑިއާ-ޗއިނާއިން ދެބަސްވުން އުފެދިފައިވާ ބޯޑަރު ސަރަހައްދުން ދެ ޤައުމުގެ އެތައް ހާސް ސިފައިން ދުރަށް ގެންދިޔުމަށް އެއްބަސްވުމަކަށް އާދެވިދާނެ ކަމަށް އުންމީދުކުރެވޭ ކަމަށް އެސޯސިއޭޓެޑް ޕްރެސް ނިއު ދިއްލީން ރިޕޯޓުކޮށްފިއެވެ.
އެގޮތުން އެ ނޫހުގައި ރިޕޯޓުކޮށްފައިވާ ގޮތުން އޮސްގައި މިހާރު ހިނގަމުންދާ އާސިއާންގެ ބައްދަލުކުރުމުގެ ހަވާސާގައި އިންޑިއާގެ ޚާރިޖީ ވަޒީރު ސުބްރަމާނިއަމް ޖައިޝަންކަރއާއި ޗައިނާގެ ޚާރިޖީ ވަޒީރު ވާންގް ޔީ ބައްދަލުކުރައްވައި އޭޝިޔާގެ މި ބިޔަ ދެ ބާރުގެ މެދުގައި މިހާރު ދެބަސްވުން އުފެދިފައިވާ ހިމާލިޔާ ސަރަހައްދުގެ 3488 ކިލޯމީޓަރުގެ ދިގު ލައިން އޮފް އެކްޗުއަލް ކޮންޓްރޯލްގެ މައްސަލައަށް ވިހާ އަވަހަކަށް ސުލްހަވެރި ނިމުމެއް ގެންނަން ބޭނުންވާކަން ފާހަގަކުރައްވާފައި ވެއެވެ.
ލައިން އޮފް އެކްޗުއަލް ކޮންޓްރޯލުގައި ހިމެނޭ އިންޑިއާގެ ބާރުގެ ދަށަށް ގެނެވިފައި އޮތް ހުޅަނގު ބިތުން ލަޑާކް އާއި އަދި އިރުމަތީ ބިތުން އިންޑިއާގެ އަރުނާޗަލް ޕްރަދޭޝް އަކީ ޗައިނާގެ ތަންތަން ކަމުގައި އެގައުމުން ދައުވާކުރެއެވެ. 2020 ވަނައަހަރު ދެ ގައުމުގެ ސިފައިންގެ މެދުގައި ހިނގާދިޔަ ކުރިމަތިލުން ތަކުގައި އިންޑިއާގެ 20 ސިފައިންނާއި ޗައިނާގެ ހަތަރު ސިފައިން މަރުވުމާ ގުޅިގެން 2 ގައުމުގެ ފުރޫއެރުންތައް އޮތީ ބޮޑުވެފައެވެ. އަދި އޭގެ ފަހުން ދެ ގައުމުންވެސް އިތުރު އެތައް ހާސް ސިފައިންނާއި ހަތިޔާރު ވަނީ އެ ސަރަހައްދަށް ޖަމާކޮށްފަ އެވެ.
އިންޑިއާ އާއި ޗައިނާއިން ޕަންގޯންގް ޓިސޯގެ އައްސޭރިންނާއި އާއި ގޮގްރާ އަދި ގަލްވާން ވާދީގައި ތިބި ބައެއް ސިފައިން މިހާރު ވަނީ އަނބުރާ ގައުމަށް ގެނެސްފައެވެ. ދެންހުރި ސަރަހައްދުތަކުގައި ތިބި އެތައް ހާސް ސިފައިންނަކާއި ހުރިހާ ވައްތަރެއްގެ ހަތިޔާރު އަދިވެސް ހުރީ ބަހައްޓާފައެވެ.
އިންޑިއާއިން ނެރެފައިވާ ބަޔާނެއްގައި ބުނެފައިވަނީ ދެ ގައުމުގެ ގުޅުން ރަނގަޅުގޮތުގައި ދެމެހެއްޓުމަށްޓަކައި ވީހާއަވަށް މި މައްސަލަ ސުލްހަވެރިގޮތެއްގައި ނިންމަން ޖެހިފައިވާ ކަމަށް 2 ޚާރިޖީ ވަޒީރުންވެސް އެއްބަސްވެ ވަޑައިގެންފައިވާ ކަމަށެވެ. އިންޑިއާއާއި ޗައިނާގެ މިލިޓްރީ އިސްބޭފުޅުން މި މައްސަލަ ހައްލުކުރުމާމެދު އެތައްފަހަރު ބައްދަލު ކޮށްފައިވާނަމަވެސް ޖައިޝަންކަރ ވިދާޅުވެފައިވަނީ އިންޑިއާއާއި ޗައިނާގެ ގުޅުމަށް މި ބޯރޑަރުގެ ހިޔަނި އަދިވެސް އެޅިފައިވާ ކަމަށެވެ.
ޗައިނާގެ ޒިން ހުވާ ނިއުސް އޭޖެންސީން ބުނެފައިވަނީ ދެ ގައުމުގެ ސުލްހަވެރި ގުޅުމެއް ގާއިމް ކުރުމަށްޓަކައި ލައިން އޮފް އެކްޗުއަލް ކޮންޓްރޯލްގެ މައްސަލަ ވީހާ އަވަހަށް ސުލްހަވެރި ގޮތެއްގައި ނިންމަން ވެއްޖެކަމަށް ޗައިނާގެ ޚާރިޖީ ވަޒީ ވިދާޅުވެފައިވާ ކަމަށެވެ.
އިންޑިއާއި ޗައިނާއިން 1962 ގައި މި ބޯރޑަރުގެ މައްސަލާގައި ވަނީ ހަނގުރާ ކޮށްފައެވެ.
