ރައްޔިތުންގެ އަސާސީ ޙައްގުތައް ހަމަހަމަ ކަމާއެކު ފޯރުކޮށްދިނުމަކީ ކޮންމެ ސަރުކާރަކުންވެސް ކުރަންޖެހޭނެ ގައުމީ މަސައްކަތެކެވެ. ރައްޔިތުންގެ އަސާސީ ޙައްގުތަށް އެއްވެސް ރައްޔިތަކު އިސްތިސްނާ ކުރުމެއްނެތި ހަމަހަމަ ކަމާއެކު ފޯރުކޮށްދިނުމަކީ ސަރުކާރުކާރުގެ މައްޗަށް އޮތް ގާނޫނީ ފަރުޟެކެވެ.
މިގޮތުން ރައްޔިތުންނަށް ދޭންޖެހޭ އަސާސީ ޚިދުމަތްތައް ފުރިހަމަ ކޮށްދެވޭފަދަ މާލީ ތަނަވަސްކަން ދައުލަތުގެ މާލިއްޔަތުގައި ނެތްނަމަ ލޯނު ނަގައިގެން ވިޔަސްވެސް އެޚިދުމަތްތައް ރައްޔިތުންނަށް ފުރިހަމަކޮށް ދޭންޖެހޭނެއެވެ. ރައްޔިތުން ސަރުކާރެއް އުފައްދަނީ މިދެންނެވި ބޭނުންތައް ފުއްދުމުގެ ބޭނުމުގައެވެ.
ރައްޔިތުން ވޯޓުދީގެން ވެރިޔަކު އިޚުތިޔާރު ކުރުމަށްފަހު އެ ވެރިމީހާ ސަރުކާރު އެކުލަވާލަން ވާނީ ދައުލަތުގެ ޚަޒާނާގައި ހުރި މާލީ ތަނަވަސްކަމުގެ މައްޗަށް ބެއްލެވުމަށްފަހުގައެވެ. އެހެންކަމުން ރައްޔިތުން އިޚުތިޔާރު ކުރާ ރައީސް މީހާ ދައުލަތުގެ ޚަޒާނާގެ ޙާލަތަށް ރިޢާޔަތް ކޮށް ރައީސް މީހާ ސަރުކާރު އެކުލަވާލަން ވާނީ ވެ ވަޑައިގެންނެވި ރިޔާސީ ވަޢުދުތައް ފުއްދުމަށް ހޭދަވާނޭ ޚަރަދު ތަކަށް ބައްލަވައިގެންނެވެ.
އެގޮތުން ދައުލަތުގެ ޚަޒާނާގައި ހުރި ރުފިޔާގެ ނިސްބަތަށް ނުބައްލަވާ އެ ރުފިޔާއިން ފަރުނުޖެހޭވަރުގެ ބިޔަ ބޮޑު ސަރުކާރެއް ރައީސް މީހާ އެކުލަވާލެއްވުމުގެ ސަބަބުން ޚަޒާނާގައި ހުރި އެއްޗަކުން ސަރުކާރު ހިންގުމަށް ޚަރަދު ކުރުމަށްފަހު ރައްޔިތުންގެ ބޭނުންތައް ފުރިހަމަކޮށްދޭނޭ ރުފިޔާ ދައުލަތުގެ ޚަޒާނާއިން ނެރެވޭނެ ގޮތެއް ނޯވެއެވެ.
އެހެންކަމާއެކު ދައުލަތުގެ ޚަޒާނާގައި ހުރި މާލީ ތަނަވަސްކަމުގެ މައްޗަށް ބެއްލެވުމަށްފަހު އިސްވެ ދެންނެވި ރިޔާސީ ވަޢުދުތައް ފުއްދޭނޭ މިންވަރާއި ސަރުކާރު ހިންގުމަށް ހޭދަވާނޭ މިންވަރު ބެެއްލެވުމަށްފަހު ޚަޒާނާގައި ހުރި އެއްޗަކުން ދެކޮޅުޖެއްސޭނެ ގޮތަކަށް މެނުވީ ސަރުކާރެއް އެކުލަވާލައްވައިގެން ނުވާނެއެވެ. މި ދެންނެވި ހިސާބުތައް ނުޖައްސަވާ ޚަޒާނާގައި ނެތް ފެންވަރުގެ ބިޔަ ސަރުކާރެއް އެކުލަވާލައިފިނަމަ ސަރުކާރު ހިންގަން ޚަރަދު ކޮށްފައި ވެވަޑައިގެންނެވި ވަޢުދުތައް ފުއްދާނޭ ހަމަ އެއްގޮތެއްވެސް ނުއޮންނާނެތާއެވެ.
ރައްޔިތުން ހޮވާ ކޮންމެ ރައީސަކަށް ވެސް ކުރިމަތި ވަނީ މިގޮތެވެ. އެހެންކަމުން ސަރުކާރު ހިންގަން ޚަރަދުކޮށްފައި ރައްޔިތުންގެ އަސާސީ ޚިދުމަތް ފޯރުކޮށްދެވޭ މިންވަރު ދައުލަތުގެ ޚަޒާނާއިން ނެރެވޭނެ ގޮތެއްނެތެވެ. ކަންމިހެން ހުރުމާއެކު ކޮންމެ ސަރުކާރަކަށް ވެސް މަޖުބޫރުވަނީ ލޯނު ނަގައިގެން ރައްޔިތުންގެ އަސާސީ ޚިދުމަތް ފުރިހަމަ ކޮށްދިނުމަށެވެ. މިހެން ދިމާވުމުން ހުރިހާ ގެއްލުމެއް ބޮލުގައި އަޅަން މި ޖެހެނީ ރައްޔިތުންނަށެވެ.
މިހެންވިޔަސް ރައްޔިތުންގެ އަސާސީ ޙައްގުތަކަކީ ރައްޔުތުންނަށް ކަށަވަރުކޮށް ދޭންޖެހޭނެ ޙައްގުތަކެކެވެ. ނިމިދިޔަ ސަރުކާރުން ލޯނު ނެގީ ރައްޔިތުންނަށް ބޭނުންވާ ޒަރޫރީ ކަންކަންކޮށް ދިނުމަށް ކަން ނިމިދިޔަ ފަސްއަހަރުގެ ތަޖްރިބާއިން ކަށަވަރު ވެގެން ދެއެވެ. އޭގެ ކުރިން އައި ސަރުކާރުތަކުން ރާއްޖެތެރެއަށް އަޅާލާފައި އޮތްނަމަ ނިމިދިޔަ ސަރުކާރުން ލޯންތައް ނަގަން ނުޖެހުނީސްތާއެވެ.
ނިމިދިޔަ ސަރުކާރުގެ ކުރިން އޮތް ސަރުކާރުން މާލޭގެ ރައްޔިތުން ދަތުރުކުރުމަށް އަޅާފައިވާ ބުރިޖާއި އަޅާފައިހުރި 25 ބުރީގެ ހަސްފަތާލާއި ހުޅުމާލެ ފޭސް ދޭއްގައި އަޅާދިން ފުލެޓްތައް ފެންނަނީ މާލޭގައި ދިރިއުޅޭ ފަރާތްތަކަށެވެ. އެހެނަސް ރާއްޖެތެރެ އޮތީ ރޯޙާލާއެވެ. ސަރުކާރުން އަސާސީ ޙައްގުތަށް ފުރިހަމަ ކޮށްދޭން ޖެހޭނީ ހަމައެކަނި މާލޭގައި ދިރިއުޅޭ ރައްޔިތުންނަށް އެކަނިހެއްޔެވެ. ނޫނެކެވެ. ރާއްޖެތެރޭގެ ރަށްރަށުގައި ދިރިއުޅެނީ ވެސް ދިވެހި ލޭ ހިނގާ ދިވެހި ރައްޔިތުން ކަމަށް ވީހިނދު ރާއްޖެތެރެ ތަރައްގީ ކުރުމަކީ އެންމެހާ ރައްޔިތުން ހަމަ ހަމަ ކުރުމަށް ކުރަންޖެހޭނެ ކަންތައް ތަކެކެވެ.
އެހެންކަމުން ނިމިދިޔަ ސަރުކާރުން ލޯން ނަގައިގެން ކުރިމަސައްކަތް އެހެރީ ރާއްޖޭގެ ކޮންމެ ރަށަކަށް އަރާބެލިއަސް ފެންނާށެވެ. ނިމިދިޔަ ސަރުކާރުން އެ ސަރުކާރުގެ ސައިޒް އޭގެ ކުރީ ސަރުކާރަށް ވުރެ ބޮޑުކޮށްފައެއް ނެތެވެ. އަދި މުޅިދުނިޔެ އަށް ކުރިމަތިވި ކޯވިޑުގެ އަނދިކަން ރާއްޖެވެސް ތަޙަންމަލު ކުރަން ޖެހުނުކަން އެންމެހައި ރައްޔިތުންވެސް ގަބޫލު ކުރާނެއެވެ. އެހެނަސް ރައްޔިތުންނަށް އޭގެ ސަބަބުން ސަރުކާރަށް ކުރިމަތިވި އިގްތިޞާދީ ދަތިކަން ނިމިދިޔަ ސަރުކާރުން ރައްޔިތުންނަށް މާބޮޑު ބުރައަކަށް ޖައްސާފައެއް ނުވެއެވެ.
އެހެންކަމަށް ވިޔަސް ރާއްޖެތެރޭގައި ސަރުކާރުން ފެއްޓެވި އެއްވެސް މަޝްރޫޢެއް ކޮވިޑަކީ ސަބަބެއްކަމުގައި ދައްކަވާ ހުއްޓާލައްވާފައި ނުވާކަން ރާއްޖެތެރޭގައި ދިރިއުޅޭ އެންމެހާ ރައްޔިތުން ހެކިވާނެއެވެ. ނިމިދިޔަ ސަރުކާރަކީ މަތިބަރު ސަރުކާރަކަށް ވި ނަމަ މިދެންނެވި ތަރައްގީ ރާއްޖެތެރެއަށް ނުގެނެވުނީހެވެ. އެހެން ކަމުން ރައްޔިތުން އެގޮވަނީ ދައުލަތަށް ލިބޭ އިގްތިޞާދި ނަފާއިން ދެކޮޅު ޖެއްސޭނެ ވަރުގެ ސައިޒު ކުޑަ ސަރުކާރެއް އޮތުން މުހިންމު ކަމުގައެވެ.
އަނެއްކޮޅުން ސަރުކާރުގެ ބައެއް ބާރުތަކަށާއި ބައެއްވަޒީރުންގެ ތެރެއަށް ތަޢުލީމާއީ ހުނަރުނެތް ނާގާބިލް ފަރާތްތައް ޝާމިލްކުރުމުގެ ސަބަބުން ސަރުކާރަކާމެދު ރައްޔިތުން ކުރި އިތުބާރު ގެއްލިފައިވާކަން ހިތާމަޔާއެކު ފާހަގަ ކުރަމެވެ. އެހެންކަމުން ކެޔޮޅު ކިތަންމެ މޮޅަސް އަދި ފަލަކީ ހިސާބު ދަތަސް ޙިލްމު ނެތް ނަމަ ރައްޔިތުންގެ ދަށުނުވެ ސަލާމަތެއް ނުވެވޭނެކަން ދަންނާށެވެ.
ރާއްޖެ އަދިވެސް އޮތީ ދަރަމުން ދަރަމުން އަންނަ ދެރުން ކުރިއަށެވެ. މިކަން ހުއްޓުމަކަށް ގެނޭވޭނީ ޢިލްމާއި ޙިލްމުގެ އަހުލުވެރީން ސަރުކާރުގެ ބާރުތަކަށާއި ސިޔާސީ މުހިންމު މަގާމުތަކަށް ގެނެވިގެންކަމަށް ގަބޫލު ކުރަން ޖެހެއެވެ.
ލިބޭ އެއްޗަކުން ދެކޮޅު ނުޖެހޭ ގޮތަށް ނުފޯރާފޮތިން ފޫގަޅާން ވެއްޖެ ނަމަ ފެންނާނީ އޮރިޔާމެވެ.
One Response
Migaumu,awadhiaruvaalee,saolisararukaarun,raajethereah,genaykontharahgeeehmihireefennahaadhe,raajethereah,kosnugovaa,fennaane,dhelolahmirusneylheynaamivarunthibayfulhaaah,vahumvaanekamahheekuran,ehehliyanvaaneebalaafaenmennakeeandhirimeehunnehnoo😭😭😭😭😭😭😭😭😭😭😭😭😭👍👍👍👍👍👍👍👍👍👍👍👍👍👍😬🧐🧐🧐🧐🧐🧐🧐🧐🧐