ޔަހޫދީ އިޒްރޭލުން ފަލަސްތީނުގެ ޣައްޒާގައި ހިންގަމުންދާ ގަތުލު އާންމުގައި ރޭ ފަތިހު އަލް ތާބިން ސްކޫލަށް ހަމަލާދީ 100 އަށްވުރެ ގިނަ މީހުން ޝަހީދުކޮށްލުމުން ރާއްޖެއިން އެކަން ކުށްވެރިކޮށްފި އެވެ.
ރޭ ފަތިހު އެ ސްކޫލަށް ހަމަލާ ދީފައި ވަނީ ފަތިސް ނަމާދު ކުރަމުންދިޔަ ވަގުތުއެވެ.
މިކަމަށް އިޝާރާތްކޮށް ފޮރިން މިނިސްޓްރީން މިރޭ ނެރުނު ނޫސް ބަޔާނެއްގައި ބުނީ އެތައް ހާސް ރެފިއުޖީންނެއް ވަގުތީ ހިޔާވެހިކަން ހޯދައިގެން ތިބި އަލް ތާބިން ސްކޫލަށް ހަމަލާދީ ގިނަ ބަޔަކު ޝަހީދުކޮށްލުމަކީ ބައިނަލްއަގުވާމީ ގާނޫނުތަކާ ހިލާފަށް ހިންގި އަމަލެއް ކަމަށެވެ.
މިގޮތުން މިއީ ފަލަސްޠީނު ރައްޔިތުންގެ ނަސްލު ނައްތާލުމަށް ހިންގާފައިވާ ޖަރީމާއެއްކަން ފާހަގަކޮށް ރާއްޖެއިން ވަނީ މި ހަމަލާތައް ހުއްޓުވާ ފަލަސްތީނުގައި ސުލްހަ ގާއިމުކުރަން ގޮވާލާފައެވެ.
މީގެ އިތުރުން ފަލަސްތީނަށް ހައްގުތައް ހޯދައިދީ، ދޭން ޖެހޭ އެއްބާރުލުން ދިނުމުގައި ރާއްޖެ އަބަދުވެސް ދެމި އޮންނާނެ ކަމަށް ވެސް ރާއްޖޭގެ ފޮރިން މިނިސްޓްރީން ނެރުނު ބަޔާނުގައި ބުނެފައި ވެއެވެ.
