އީރާނުން އިސްރާއީލަށް ހަމަލާދިނުމުގައި ކެތްތެރިކަން އިސްކުރެއްވުމަށާއި އަދި ހަމަލާ ދިނުމުގައިވެސް ވީހާވެސް ބޮޑަށް އާންމު ރައްޔިތުންނަށް ގެއްލުން ނުލިބޭނެގޮތްތަކަށް ބައްލަވާފައި ހަމަލާތައް އަމާޒު ކުރުމަށް ރައީސް ޕޫޓިން އީރާނުގެ ސުޕްރީމް ލީޑަރ އާޔަތު  ﷲ އަލީ ޚާމަނާއިގެ ކިބައިން އެދިވަޑައިގެންފިއެވެ.                 

ރަޝިޔާގެ ރައީސް ފޮނުއްވި މެސެޖް އީރާނުގެ ސުޕްރީމް ލީޑރަށް ރައްދުކޮށްދެއްވީ ރަޝިޔާގެ ސެކިއުރިޓީ ކައުންސިލްގެ ސެކްރެޓަރީ ޖެނެރަލް ސާރޖީ ޝޮއިގޫ އެވެ. އިސްރާއީލުން ހަމާސްގެ ލީޑަރ އިސްމާއީލް ހަނިއްޔާއާއި ހިޒްބު ﷲ ގެ ކޮމާންޑަރ ފުއާދު ޝުކުރު ޝަހީދު ކޮށްލުމާ ގުޅިގެން މެދު އިރުމަތީ އޮތީ ބޮޑު ހަނގުރާމައެއްގެ މިޔަމަތީގައިކަމަށް އީރާނުގެ އޮފިޝަލުން ސާރގީ ޝޮއިގޫ އަށް ދެންނެވިކަމަށްވެއެވެ.

ސަރަހައްދުގެ މަސްރަހް ނުރައްކާވެދާނެފަދަ އަމަލެއް ހިންގަން އީރާނުން ބޭނުން ނުވާ ކަމަށާއި އެހެންނަމަވެސް އިސްރާއީލުން ހިންގި ޖަރީމާތަކަށް އަދަބު ދިނުމުގެ ވިސްނުން ބަދަލު ނުވާ ކަމަށާއި އަދި އެއީ އީރާނަށް ލިބިގެންވާ ހައްގެއްކަމުގައި ވެސް ޝޮއިގޫއަށް ދެންނެވި ކަމަށް ވެއެވެ. ރަޝިޔާގެ މީޑިއާތަކުންވެސް އީރާނުގެ އޮފިޝަލުންނާއެކު ސެކްރެޓަރީ ޖެނެރަލް ޝޮއިގޫ ބައްދަލުކުރައްވައި މަޝްވަރާކުރެއްވިކަން ވަނީ ހާމަކޮށްފައެވެ. ކްރެމްލިނުންވަނީ ފަހަކަށް އައިސް އިސްރާއީލުން ހަމަލާދީ ހިޒްބު ﷲ އާއި ހަމާސްގެ ބައެއް އިސްބޭފުޅުން ޝަހީދު ކޮށްލުން ވަރަށް ހަރުކަށި އިބާރާތުން ކުށްވެރިކޮށްފައެވެ. ވަކިން ޚާއްސަކޮށް އިސްމާއީލު ހަނިއްޔާ ޝަހީދު ކޮށްލުމަކީ އިންތިހާއަށް ނުރައްކާތެރިކަމެއް ކަމުގައި ސިފަކޮށްފައެވެ.                            

ރަޝިޔާގެ ސެކިއުރިޓީ ކައުންސިލްގެ ޖެނެރަލް ސެކްރެޓެރީގެ ދަތުރުފުޅުގައި އީރާނުގެ ރައީސް މަސްއޫދު ޕެޒެޝްކިއާނާއި އަދި އިސްރާއީލަށް ހަމަލާދިނުމުގައި އެންމެ އިސްކޮށް އުޅުއްވާ އީރާން އާރމްޑް ފޯސަސްގެ ކޮމާންޑަރ މުޙަންމަދު ބާޣެރީއާ ވެސް ބައްދަލު ކުރެއްވިއެވެ. އެ ބައްދަލު ކުރެއްވުމުގައި ރަޝިޔާގެ ސުކޯއި އެސް ޔޫ-35 ގެ ފައިޓަރ-ޖެޓާއި އަދި ރަޝިޔާގެ އެއަރ ޑިފެންސް ސިސްޓަމް އަށް އީރާނުން އެދިވަޑައިގެންނެވި ކަމަށް  ނިއު ޔޯރކް ޓައިމްސް އިން ރިޕޯރޓް ކޮށްފައި ވެއެވެ.                                       

ރައީސް ޕެޒެޝްކިއަންއާއި އެކު ބޭއްވެވި ބައްދަލު ކުރެއްވުމުގައި މިހާތަނަށް އީރާނުށް ކުރިމަތިލާން ޖެހުނު ކޮންމެ އުދނގޫ ދަނޑިވަޅެއްގައި ރަޝިޔާއިން އިޚްލާސްތެރި ރަޙްމަތްތެރިއެއްގެ ގޮތުން އީރާނަށް އެހީތެރިކަން ފޯރުކޮށްދީފައިވާ ހަނދާން ނުނެތޭކަމަށް ޝޮއިގޫ އަށް ދެންނެވި ކަމަށް ވެއެވެ.                       

މި ޚަބަރު ލިއެވެމުންދާއިރު ރަޝިޔާގެ އެންމެ ފަހުގެ އެއަރ ޑިފެންސް ސިސްޓަމާއި ރާޑަރ މިހާރު އޮތީ އީރާނަށް އަންނަ މަގުމަތީގައި ކަމަށް އެމެރިކާގެ ޚަބަރު ފަތުރާ ވަސީލަތްތަކުން ވަނީ ބުނެފައެވެ.                 

ރަޝިޔާ-ޔޫކްރެއިން ހަނގުރާމަ ފެށުމާއެކު އީރާނާއި ރަޝިޔާގެ ގުޅުންތައް އަންނަނީ ކުރިއަށްވުރެންވެސް ބަދަހި ވަމުންނެވެ. އަދި ދެ ގައުމުން ތަފާތު ދާއިރާތަކުގައި އެއްބާރުލުން ދިނުމުގެ އެއްބަސްވުންތައްވެސް ވަނީ ގާއިމް ކުރެވިފައެވެ.                                                               

ޔޫކްރެއިން ހަނގުރާމައިގާ ރަޝިޔާއަށް ބޭނުންވާ ގިނަ އަދަދެއްގެ ޑްރޯން އީރާނުންވަނީ ފޯރުކޮށްދީފައެވެ. ނޭޓޯއިން މިކަމާ ގުޅޭގޮތުން އީރާނަށް ވަނީ އިންޒާރުވެސް ދީފައެވެ. ހުޅަނގުގެ ލީޑަރުން ތުހުމަތު ކުރަމުން ގެންދާ ގޮތުގައި ރަޝިޔާއިން ގެންދަނީ މެދުއިރުމަތީގައި ހަމަނުޖެހުން އުފައްދަމުން އަދި އެކަމުގެ ނާޖާއިޒު ފައިދާ ނަގަމުންނެވެ. ޝޮއިގޫ އީރާނަށް ވަޑައިގަތުމުގެ ބޭނުމަކީވެސް އެ ކަމަށް އިތުރަށް މަގުފަހިކުރުން ކަމުގައި ހުޅަނގުގެ ލީޑަރުން ތުހުމަތު ކުރެއެވެ.                                                          

އީރާނުން މިހާރު އޮތީ އިސްރާއީލަށް ހަމަލާދޭނެކަން ރަސްމީގޮތުން އަންގާފައެވެ. ހަމަލާ ދޭނެ ދުވަހަކާއި ވަގުތެއް އަންގާފައެއް ނުވެއެވެ. އީރާނުގެ މި އިންޒާރާ ގުޅިގެން ރައީސް ބައިޑްން ވަނީ ޖޯރޑްންގެ ރަސްގެފާނު އަބްދު ﷲ އާއި މަޝްވަރާ ކުރައްވާފައެވެ. އަދި އެމެރިކާގެ ޚާރިޖީ ވަޒީރު އެންތަނީ ބްލިންކަންވަނީ މިސްރުގެ ޚާރިޖާ ވަޒީރު އަރިހުގައި އިސްރާއީލް- ގައްޒާ ހަނގުރާމަ ހުއްޓުވުމަކީ އެމެރިކާއިން އެންމެ އިސްކަންދީފައިވާ މައްސަލަކަމަށް ވިދާޅުވެފައެވެ.                                                   

ޔޫރަޕިއަން ޔުނިއަންގެ ޚާރިޖީ ސިޔާސަތާބެހޭ ސަފީރު ވިދާޅުވެފައިވަނީ މެދުއިރުމަތީގެ ހަނގުރާމަ ފެށޭނެ އިރަކާއި އަދި އެ ހަނގުރާމައިގައި ކަންތައް ވެގެންދާނެގޮތަ ހިތަށް ގެންނަންވެސް ނޭންގޭ ކަމަށެވެ.                

 އެމެރިކާގެ ޖާސޫސި އިދާރާއިން ރައީސް ބައިޑްންއަށް ދަންނަވާފައިވަނީ ދެ ދިމާލަކުން އިސްރާއީލަށް ހަމަލާތައް އަންނާނެ ކަމަށާއި އެކަމަކު ފުރަތަމަ ހަމަލާތައް އަންނާނީ ހިޒްބު ﷲ އިން ނުވަތަ އީރާނުންކަން މިހާތަނަށް ސާފުކުރެވިފައި ނުވާކަމަށެވެ.