މިއަދު ހެނދުނު 5:35 ގައި ޔުނައިޓެޑް ނޭޝަންސް އާއި އަދި ދުބާއި އިން ރޮއިޓާރސް ދީފައިވާ ޚަބަރުތަކުގައި އެންމެ ފަލައަކުރުން ފާހަގަކޮށްފައިވަނީ ހަނގުރާމަ ހުއްޓާލުމުގެ ވާހަކަތައް ކުރިއަށްދާ ގޮތުން ރައީސް ބައިޑްންގެ ގަރާރަށް އަމަލު ކުރެވިދާނެ ކަމުގެ އެއްވެސް ޔަގީންކަމެއް ނުލިބޭތީ ކުރިއްސުރެން ވިސްނާފައިވާގޮތަށް އިސްމާއީލް ހަނިއްޔާ އާއި ފުއާދު ޝުކުރު ޝަޙީދުކޮށްލުމުގެ ބަދަލު އިސްރާއީލުގެ ކިބައިން ހިފުންނޫން އެހެން ގޮތެއް ނެތް ކަމުގައި އީރާނުގެ ރިވޮލިއުޝަނަރީ ގާރޑުންގެ ޑެޕިއުޓީ ކޮމާންޑަރ އީރާނުގެ މީޑިއާތަކަށް އިއްޔެ ދެއްވި ޚަބަރެވެ. އޭނާ ވިދާޅުވެފައި ވަނީ އެކަންތައް ރޭވިފައިވާގޮތުގެ މަތިން ކުރިއަށްދާނެކަމަށެވެ.
ޑެޕިއުޓީ ކޮމާންޑަރ އަލީ ފަދާވީ ވިދާޅުވެފައިވަނީ އިސްމާއީލް ހަނިއްޔާއާއި ފުއާދު ޝުކުރު ޝަހީދު ކޮށްލުމުގެ ބަދަލު ހިފަން އީރާނުގެ ސުޕްރީމް ލީޑަރ ކުރައްވާފައިވާ އަމުރު ވަރަށް ސާފުކޮށް އެނގިވަޑައިގަންނަވާ ކަމަށާއި އެކަމާމެދު އެހެން ވިސްނުމަކަށް ދިއުމުގެ އެއްވެސް އަމުރެއް މިހާތަނަށް ލިބިފައި ނުވާ ކަމަށެވެ.
އަލީ ފަދާވީ ދެއްވި ބަސްދީ ގަތުމާ ގުޅޭގޮތުން ނޫސްވެރިން ކުރި ސުވާލުތަކަށް ވައިޓްހައުސްގެ ނޭޝަނަލް ސެކިއުރިޓީ ތަރުޖަމާނު ޖޯން ކާރބީ ބުނެފައިވަނީ އީރާނުގެ ބަސްމަގު ހުރިގޮތުން އަހަރެމެން އެކަންތައް ލުއިގޮތަކަށް ނުވިސްނާނެ ކަމަށާއި މިހާރުވެސް އީރާނާ ކުރިމަތި ލުމަށް ބޭނުންވާނެ ވަރަށް ގިނަ ހަނގުރާމައިގެ ވަސީލަތްތައް މެދު އިރުމައްޗަށް ޖަމާކޮށްފައި ވާނެއެވެ. އަދި އިސްރާއީލުގެ ސަލާމަތާއި ރައްކާތެރިކަން އަހަރެމެން ކަށަވަރު ކުރާނަމެވެ.
މި ޚަބަރުތަކާ ގުޅިގެން ޔޫ. އެން. ގައި ހުންނަ އީރާނުގެ ދާއިމީ މިޝަނުން ބުނެފައިވަނީ ހަނގުރާމަ ހުއްޓާލުމަށް ކުރަމުންގެންދާ މަސައްކަތާއި އިސްރާއީލުން ހިންގަމުންގެންދާ ބޮޑެތި ޖަރީމާތަކަށް އަދަބު ދިނުމަކީ އެއްމޭޒެއްގެ ކައިރީގައި ދެކެވޭނެ ވާހަތަކެއް ނޫންކަމަށެވެ. އިސްމާއީލް ހަނިއްޔާ ޝަހީދުކޮށްލުން އިސްރާއީލް-ހަމާސްގެ ހަނގުރާމަ ހުއްޓާލުމުގެ މަޝްވަރާތަކުގެ ތެރެއަށް ނުވެއްދޭނެއެވެ. އިސްރާއީލުގެ ޓެރަރިސްޓް ދައުލަތުން އީރާނުގެ ސިޔާދަތާއި އިސްތިގްލާލަށް އަރައިގަތުން ފަލަސްތީނުގެ މައްސަލައާއި މުޅިން ތަފާތެވެ. އީރާނުގެ ސަލާމަތާއި ސިޔާދަތާއި އަދި އިސްތިގްލާލް ރައްކާތެރި ކުރުމަށްޓަކައި އަޅަންޖެހޭ އެއްވެސް ފިޔަވަޅެއް ފަހަތަކަށް ނާޅާނެއެވެ.
އީރާނުގެ ބަދަލުހިފުން މިއަންނަ ހަފުތާއަށް ތާވަލުކުރެވިފައިވާ ސުލްހައިގެ ވާހަކަތަކުގެ ފަހަށް ލަސްކުރެވިދާނެތޯ ދެންނެވުމުން އީރާނުގެ މިޝަނުން ޖަވާބު ދެއްވާފައިވަނީ ސުލްހައިގެ ވާހަކަތަކަށް ހިޔަނި ނޭޅޭނެފަދަ ގޮތަކަށް އީރާނުން ބަދަލު ހިފުން ކުރިއަށް ގެންދާނެ ކަމަށް އުންމީދުކުރެވޭ ކަމަށެވެ. އަހަރެމެން އެންމެ ބޮޑު އިސްކަމެއް ދޭނީ ފަލަސްތީނުގެ މައްސަލައަށް ދާއިމީ ހައްލެއް ހޯދުމަށެވެ. ހަމާސްއިން ގަބޫލުކުރާ ކޮންމެ އެއްބަސްވުމެއް އީރާނުން ގަބޫލު ކުރާނެއެވެ.
މިމަހު 15 ވަނަ ދުވަހަށް ތާވަލު ކުރެވިފައިވާ ސުލްހައިގެ ވާހަކަތަކުގެ އެންމެ ފަހު ބުރަށް ގަތަރަށް ނުވަތަ ގާހިރާއަށް ހާޒިރުވުމަށް އިސްރާއީލަށާއި ހަމާސްއަށް އަންގާފައިވާނެކަމަށް އެމެރިކާއާއި މިސްރާއި އަދި ގަތަރުން މީޑިއާތަކަށް ވަނީ މައުލޫމާތު ދީފައެވެ. އިސްރާއީލުން ހާޒިރުވާނެކަން މިހާރު ވަނީ އަންގާފައެވެ. ހަމާސްގެ ޖަވާބުގައި ބުނެފައިވަނީ އަލަށް މޭޒުމައްޗަށް ގެނެވޭނެ ބަދަލުތަކާބެހޭގޮތުން މިގެންދަނީ ދިރާސާ ކުރަމުންނެވެ.
