ބަލްގޭރިއާގެ ސްކޫލްތަކުގައި ޖިންސު ބަދަލުކުރުމާއި، އެހެންވެސް އާންމު ގޮތެއްގައި ގަބޫލުނުކުރާ ޖިންސީ ފިކުރުތަކާއި ބެހޭ ޕްރޮޕެގެންޑާ ފެތުރުން އެ ގައުމުގެ މަޖިލީހުން މަނާކޮށްފިއެވެ.
އެ ބިލް މަޖިލީހަށް ހުށައަޅާފައިވަނީ ރަޝިއާއަށް ތާއީދުކުރާ ރިވައިވަލް ޕާޓީިއިން ކަމުގައި ވީނަމަވެސް، ޚިޔާލު ހުށައެޅުމަށް ދިން ފުރަތަމަ އަދި ދެވަނަ ފުރުސަތުގައި ހުޅަނގަށް ތާއީދުކުރާ ފެކްޝަންތަކުގެ ސަޕޯޓުވެސް އެ ބިލަށް ވަނީ ލިބިފައެވެ.
މިގޮތުން، ޕްރީސްކޫލް އަދި މަދަރުސީ ތައުލީމާއި ބެހޭ ޤާނޫނަށް އިތުރުކުރި އިސްލާހުން “އާންމުގޮތެއްގައި ގަބޫލުކުރާ ޖިންސީ މައުލޫމާތާއި ޚިލާފު ނުވަތަ އުފަންވާއިރު ހުންނަ ޖިންސުނޫން އެހެން ޖިންސަކަށް ބަދަލުވުމުގެ ވާހަކަތަކާއި، އާންމުކޮށް ގަބޫލުކުރާ ‘ސެކްޝުއަލް އޮރިއެންޓޭޝަން’އާއި ޚިލާފު ފިކުރުތަކާއި ބެހޭ ޕްރޮޕެގެންޑާ ފެތުރުމާއި، އެކަމަށް ހިތްވަރުދިނުމާއި، ކުރިއެރުވުމަށް ސީދާ ގޮތުންނާއި ނުސީދާގޮތުން މަސައްކަތްކުރުން” ވަނީ މަނާކޮށްފައެވެ.
