މެލޭޝިއާ ރިންގިޓްގެ އަގު ބާޒާރުގައި މައްޗަށް ދިޔުމާއެކު ގިނަ އިންވެސްޓްރުންތަކެއްގެ ސަމާލުކަން ވަނީ ހޯދާފައެވެ. މިގޮތުން، މެލޭޝިއާގެ ބޮންޑުތަކުގެ މަގުބޫލުކަން އިތުރުވެއްޖެއެވެ.
ބްލޫމްބާރގުން ބުނެފައިވަނީ ޖުލައި މަހުގައި ބޭރުގެ އިންވެސްޓަރުންގެ ފަރާތުން 5.5 ބިލިއަން ރިންގިޓް މެލެޝިއާގެ ބާޒާރަށް ވައްދައިދިނެވެ. މިއީ އަހަރެއްގެ ތެރޭގައި މިގޮތައް ލިބުނު އެންމެ ބޮޑު އަދަދު ލިބުނު މަހެވެ.
މިގޮތުން، އޭޝިއާ މިޑްލް އީސްޓް ސެންޓަރގެ ތިންކް ޓޭންކްގެ ފޮރިން އިންވެސްޓްމަންޓް އިންޓެލިޖެންސް ޔުނިޓުގެ މެންބަރެއް އަދި، އެސެންޓަރުގެ ސީނިއަރ ފެލޯއެއް ކަމުގައިވާ މުޢާދް ޒަކީ ގަބޫލުކުރައްވާ ގޮތުގައި، މެލޭޝިއާގެ ބޮޑުވަޒީރު އަންވަރް އިބްރާހީމް ވަނީ ކޮރަޕްޝަން ނައްތާލުމަށްޓަކައި، އަމިއްލަ ކެބިނެޓާއިވެސް ދެކޮޅު ހައްދަވާފައެވެ.
“މަގާމުގެ ހުވާ ކުރެއްވިއްސުރެ ފެންނަމުން މިދަނީ އަމިއްލަ މަސްލަހަތުގެ ކުރިއަށް ގައުމީ މަސްލަހަތު ނެރުއްވާ މަންޒަރު. އަންވަރް ގެންގުޅުއްވާ ދެފުށްފެންނަ، ހެޔޮ ވެރިކަމުގެ ސިޔާސަތުގެ ސަބަބުން އިންވެސްޓަރުން މެލޭޝިއާއަށް ކުރާ އިތުބާރު ބޮޑު. އޭގެ ސަބަބުން މެދުއިރުމައްޗާއި ޔޫރަޕުގެ އިންވެސްޓަރުންނަށްވެސް އެނގޭ މެލޭޝިއާއަށް އިންވެސްޓުކުރުމަކީ މާލީގޮތުން އެންމެ ރައްކާތެރި ގޮތްކަން.” މުޢާދް ވިދާޅުވިއެވެ.
އެމެރިކާއިން ފަންޑިންގް ކަނޑާލާނެ ކަމަށް ބުނެ ދެމުންދާ އިންޒާރުތަކަށް ގުޑުމެއްނެތި ފަލަސްތީނުގެ ފަހަތުގައި ގާއިމުވެ ތިބި މަދު ގައުމުތަކުގެ ތެރޭގައި މެލޭޝިއާ ހިމެނޭއިރު، އިންވެސްޓްމަންޓްތައް ކަށަވަރު ކުރުމަށް އޮތް ހަމައެކަނި މަގަކީ ޒަޔަނިސްޓުންނަށް އެއްބާރުލުން ދިނުން ނޫންކަން މިއޮތީ އެނގިފައެވެ. ސަރުކާރަކުން ކޮރަޕްޝަނާއި ހަނގުރާމަކުރާކަން އަމަލުން ދައްކައިދެވިއްޖެނަމަ ފައިސާ އިންވެސްޓްކުރާނެ މީހުން ތިބިކަން މިވަނީ ހާމަވެފައެވެ.
