ބަންގްލަދޭޝްގެ ކިޔަވާކުދިން ކުރަން ފެށި މުޒާހަރާއެއް ބޮޑުވެ، މުޅި ގައުމުގެ އެތައް ބަޔަކު ނުކުމެ މެދުކެނޑުމެއްނެތި ކުރަމުންދިޔަ މުޒާހަރާތަކުގެ ނަތީޖާއެއްގެ ގޮތުން، އެގައުމުގެ ބޮޑުވަޒީރު ޝެއިޚް ޙަސީނާ ވާޒެދް އިސްތިއުފާ ދެއްވައި، ގައުމު ދޫކުރައްވާ ފިއްލަވައި ވަޑައިގެންފިއެވެ. މިގޮތުން، ހަސީނާ ފިއްލަވައި ވަޑައިގެންފައިވަނީ އިންޑިއާއަށެވެ. އެތަނުގެ ސަރުކާރުން އޭނާއަށް ވަނީ ހިމާޔަތްދީފައެވެ. 

2009 ވަނަ އަހަރުއްސުރެ ވެރިކަމުގައި ހުންނެވި ޚުދުމުޚުތާރު ވެރިޔާ، ޝެއިޚް ހަސީނާ ވެރިކަން ކުރައްވަމުން ގެންދެވީ، ސަރުކާރުގެ ބޮޑުންނާއި، އަރިސް އާއިލާތައް ތަނަވަސްވެ، ކޮރަޕްޝަނުގެ ފައިސާއިން މުއްސަނދިވާއިރު، އާންމު ރައްޔިތުން ނިކަމެތިވެ ފަގީރުވާ ގޮތަށެވެ. 

 ޝެއިޚް ހަސީނާގެ ވެރިކަމުގައި، ބަންގްލަދޭޝްގެ ކިޔަވައިގެންތިބި، ޤާބިލް ފަރާތްތަކަށް ވަޒީފާ ދިނުމުގެ ބަދަލުގައި، ސަރުކަރުގެ އަރިސް ބޭފުޅުންނަށް  ވަޒީފާތައް ދެމުންގެންދާތީ، ކިޔަވައިގެން ތިބި ފަރާތްތަކުން ވަޒީފާއެއް ނުލިބި ތިބެންޖެހޭކަމަށް ބުނެ، ސުލްހަވެރިކަމާއެކު މުޒާހަކުރަމުން ގެންދިޔަ ގިނަ ބަޔަކާއި ދެކޮޅަށް ބޭނުންކުރަން ނުޖެހޭ ބާރުގެ ބޭނުން ކޮށް ހަމަލާދީފައިވެއެވެ. 

މިގޮތުން، މިހާރު މިވަގުތަށް އެކަމަނާގެ ޒައާމަތަށް ނިމުމެއް އަތުވެފައިވީނަމަވެސް، ބަންގްލަދޭޝްގެ ޒަމާންވީ ކޮރަޕްޓް އުސޫލުތަކާއި ފަލްސަފާތަކުން އެގައުމުގެ ރައްޔިތުނއ ސަލާމަތް ވީކީއެއް ނަުނެވެ. ހަސީނާގެ ވެރިކަމަށް ތާއީދުކޮށް، އޭނާގެ ފަރާތުން ލާބައާއި މަންފާ ހޯދި ފަރާތްތަކުން ދެން ވަޑައިގަންނަވާ ބޮޑުވަޒީރަކަށްވެސް އަދި ވަޒީރުންކަމަށް އައްޔަނުކުރާ ފަރާތްތަކަށް ވެސް ނުފޫޒު ފޯރުވުމަށް މަސައްކަތްްކުރާނެއެވެ.    

ބަންގްލަދޭޝްއަކީ މުސްލިމް ގައުމުތަކަށް ރަނގަޅު ހެޔޮ ނަމޫނާ ދައްކާ ގައުމަކަށް ވުމުގެ ފުރުސަތު  އެގައުމަށް އެބައޮތެވެ. އެކަން ވާން އޮތީ ކޮރަޕްޝަން ނައްތާލައި، ފަރުދާގެ ފަހަތުގައި ތިބެ ސަރުކާރުގެ ޙިދުމަތްތަކާއި ވަސީލަތްތައް ނަހަމަގޮތުގައި ބޭނުންކުރާ މީހުންގެ ކިބައިން ސަލާމަތްވެގެންނެވެ.