އިރާގުގެ ހުޅަނގުސަރަހައްދެއް ކަމުގައިވާ އައިނަލް އަސަދުގައި ހުންނަ އެމެރިކާގެ މިލިޓްރީ ބޭސްއަށް ދިން ރޮކެޓް ހަމަލާގައި އެތަނުގައި ތިބޭ އެމެރިކާގެ 2500 ސިފައިންގެ ތެރެއިން ގިނަ އަދަދެއްގެ ބަޔަކު ޒަޚަމް ކޮށްލައިފިކަމަށް އެސޯޝިއޭޓެޑް ޕްރެސް އިން މިއަދު ހެނދުނުގެ ޚަބަރުގައި ބުނެފައި ވެއެވެ. އެމެރިކާގެ ދިފާއީ ވުޒާރާގެ ތަރުޖަމާނު ބުނެފައިވަނީ ގިނަ އަދަދެއްގެ ސިފައިން ޒަޚަމްވެގެންދިޔަ ހޯމަ ދުވަހުގެ މި ރޮކެޓް ހަމަލާ ތުހުމަތު ކުރެވޭގޮތުގައި އަމާޒުކޮށްފައި ވަނީވެސް އަސަދު މިލިޓްރީ ބޭސް އަށެވެ. ހަމަލާގައި ލިބުނު ގެއްލުންތައް މިލިޓްރީ ބޭސްގެ އޮފިޝަލުން ބަލަމުން ގެންދާ ކަމަށާއި ތަފްސީލުތައް ލިބުމުން ހާމަކުރާނެކަމަށްވެސް އޭނާ ބުނެފައިވެއެވެ.
މިހާދިސާގެ މައުލޫމާތު ރައީސް ބައިޑްންއާއި ނައިބު ރައީސާ ކަމަލާ ހަރިސްއަށް މިހާރު ވަނީ ދަންނަވާފައެވެ. އަދި އެމެރިކާގެ ސިފައިންނަށް ދެވޭ ހަމަލާ ތަކުގެ ބަދަލު ހިފުމާއި އެމީހުންގެ ރައްކާތެރިކަމާބެހޭ ގޮތުން ދެން އަޅަންޖެހޭ ފިޔަވަޅުތަކާ ބެހޭގޮތުންވެސް އެ ދެބޭފުޅުންނާއެކު މަޝްވަރާ ކުރެވުނު ކަމަށް ވެއެވެ.
އެމެރިކާގެ މިލިޓްރީ ބޭސްގެ އެތެރެ އަށާއި އަދި ބޭރުގެ އަވަށްތަކަށްވެސް ރޮކެޓް ހަމަލާތަކެއް އަމާޒުވެފައިވާ ކަމަށް އިރާގުގެ ސިފައިންވެސްވަނީ ކަށަވަރުކޮށްދީފައެވެ. އެހެންނަމަވެސް މިލިޓްރީ ބޭސްގެ ބޭރު އަވަށްތަކަށް އަމާޒު ވެގެންދިޔަ ހަމަލާތަކުގައި އެއްވެސް މީހަކަށް ނުވަތަ ތަނަކަށް ގެއްލުމެއްވީ ކަން އެނގިފައި ނުވާކަމަށް އިރާގު ސިފައިން ބުނެފައިވެއެވެ.
އެމެރިކާގެ މިލިޓްރީބޭސް އަށް މަދުވެގެން 2 ރޮކެޓް އަމާޒުވިކަމަށް އިރާގުގެ ޖިހާދީ ގުރޫޕުގެ ކޮމާންޑަރަކު އެސޯޝިއޭޓެޑް ޕްރެސްއަށް މައުލޫމާތު ދީފައިވެއެވެ. އެހެންނަމަވެސް ހަމަލާދިނީ ކޮން ދިމާލަކުންކަން ހާމަކޮށްފައެއް ނުވެއެވެ.
ރޮކެޓް ހަމަލާތައް އިތުރުވެފައި މިވަނީ ހަމާސްގެ ލީޑަރ އިސްމާއީލް ހަނިއްޔާއާއި ހިޒްބު ﷲ ގެ ކޮމާންޑަރ ޝުކުރު ޝަހީދުކޮށްލުމާ ގުޅިގެން ހިތި ގޮތަކަށް އިސްރާއީލުގެ ކިބައިން ބަދަލު ހިފާނެކަމަށް އީރާނުގެ ސުޕްރީމް ލީޑަރ ވައުދުވެ ވަޑައިގެންފައި ވަނިކޮށެވެ.
އީރާނަށް ތާއީދުކުރާ މުޖާހިދުންގެ އެކްސިސް އޮފް ރެޒިސްޓެންސް ގައި ހިމެނޭ އިރާގާއި ސިރިޔާގެ މުޖާހިދުންނާއި ހިޒްބު ﷲ އަދި ޔަމަނުގެ ހޫތީ މުޖާހިދުން ގެންދަނީ މިހާރު އިސްރާއީލުން ހަމާސްއާ ދެކޮޅަށް ހިންގަމުންގެންދާ ގަތުލު ޢާންމާއި ދެކޮޅަށް ހަމާސްއާއިއެކު ހަރަކާތްތެރި ވަމުންނެވެ.
އިސްރާއީލް-ހަމާސްގެ ހަނގުރާމައިގެ ކުރިން އިރާގުގައި ތިބޭ އެމެރިކާގެ މިލިޓްރީންނަށް ދެމުންގެންދިޔަ ހަމަލާތަކަށް ކޮންމެވެސް ވަރެއްގެ ދުރުމިނެއް ލިބިގެންދިޔައެވެ. އެހެންނަމަވެސް ހަނގުރާމައިގެ ފުރަތަމަ ދުވަސްކޮޅުގައި އެކަނިވެސް 175 ހަމަލާ އެމެރިކާގެ މިލިޓްރީބޭސްއަށް އަމާޒުވެފައިވާކަމަށް ބުނެފައިވެއެވެ.
އިރާގުގެ މުޖާހިދުންގެ ހަމަލާތައް ހުއްޓުވޭތޯ އިރާގު ސަރުކާރުން ގެންދަނީ މަސައްކަތްކުރަމުންނެވެ. އަދި ހަމައެއާއެކު އެމެރިކާ ސިފައިން މިހާރު އިރާގުގައި ތިބުން އިރާގުގެ ގާނޫނުން ހުއްދަ ނުކުރާތީ އެމެރިކާ ސިފައިން އެގައުމުން ފޭބުމަށްވެސް ގެންދަނީ ބާރު އަޅަމުންނެވެ. އެމެރިކާއިން ބުނަމުން ގެންދަނީ “ މި ފައިބަނީ މި ފައިބަނީ “ ކަމަށެވެ. އެކަމަކު މިހާރުވެސް އިރާގުގައި އެމެރިކާގެ 2500 ސިފައިން އަދި ސީރިޔާ 800 ސިފައިން އެބަ ތިއްބެވެ.
