ޚުދުމުޚުތާރު ނިޒާމުތައް ދެމިއޮންނަނީ ބާރުގެ ޒަރީއާއަކުންނޫން ކަމަށް އެމްޑީޕީގެ ފުރަތަމަ ރައީސް އިބްރާހިމް އިސްމާޢީލް (އިބްރާ) ވިދާޅުވެއްޖެއެވެ.

އިބްރާ ވަނީ އެތައްހާސް، އެތައް މިލިއަން ރައްޔިތުންތަކެއް ބާރުގެ ބޭނުންކޮށްގެން މައިތިރިކުރާނީ ކިހިނެއްތޯ ސުވާލުކުރައްވައިފައެވެ.

އޭނާ ވިދާޅުވީ އެކަން ކުރާ ގޮތަކީ ދޮގު ހެދުން ޢާންމުކޮށްގެން ކަަމަށާއި އެކަހަލަ ނިޒާމުތަކުގައި، ސިޔާސީ ވާދަވެރިކަމުގެ ހުރިހައި ފަރާތެއްގައި ތިބޭ މީހުން ވެސް ތަކުރާރުކޮށް ދޮގުހަދައި، ދޮގުފަތުރާނެ ކަމަށެވެ.

އެވަރަށް ދޮގުހަދަނީ ކޮންމެހެން ކަމެއް އޮޅުވާލާކަށްވެސް ނޫން ކަމަށާއި ވާހަކައެއް ގަބޫލު ކުރުވާކަށް ވެސް ނޫން ކަމަށާއި ދޮގު ހަދާއިރު ވެސް އާންމުން އެ ވާހަކަ ގަބޫލުނުކުރާނެކަން ވެސް އެނގޭނެ ކަމަށް ވެސް އިބްރާ ވިދާޅުވިއެވެ.

ދެން އެހެންވިއްޔާ އެވަރަށް ދޮގު ހަދަނީ ކީއްވެތޯ ސުވާލު ކުރައްވައި އިބްރާ ވަނީ އޭގެ ޖަވާބު ދެއްވައިފައެވެ.

“އޭގެ ބޭނުމަކީ، އެވަރަށް، ހުރިހައިކޮޅަކުން ދޮގުފަތުރައިގެން، މީސްތަކުންނަށް ދޮގާ ތެދު ވަކިނުވާވަރު ކުރުން. ދޮގާ ތެދު ވަކިނުވާނަމަ، ކަމަކާ ވިސްނާކަށް ނޭނގޭނެ. އެ ހިސާބުން މީސްތަކުން ކަންކަމާ ވިސްނުން ހުއްޓާލާނެ. ހަގީގަތަކީ ކޮބައިކަން ހޯދޭނޭ ގޮތެއްދެން ނޯންނާނެ. އެއްވެސް މީހަކު އެއްވެސް ވާހަކައެއް ގަބޫލެއް ނުކުރާނެ.“

“އަދި ސިކުނޑިތައް ލައްޕައި، ރޫޙާނިއްޔަތު އެއްކައިރިކޮށް، މާއްދިއްޔަތަށް ލެނބޭނެ. ދިރިއުޅުމުގެ އަމާޒަކީ މުސާރައާއި، ފްލެޓަކާ، އައިފޯނަކާ ސައިކަލަކަށް ބަދަލުވެދޭ.“ އިބްރާ ވިދާޅުވިއެވެ.

އެހެންކަމުން މުޖުތަމައުގައި ހިނގާ ފަސާދަތަކަށް ލޮލާއި ކަންފަތް ބަންދުވެ، އެމީހަކާ އެމީހެއްގެ އުސޫލު ފައްކާވާ ކަމަށާއި އިންޞާފާ ޢަދުލުގެ ބޭނުން ކެނޑޭ ކަމަށް ވެސް އިބްރާ ވިދާޅުވިއެވެ.

“މިކަހަލަ ބަޔަކު މައިތިރިކުރާކަށް ބާރެއް ބޭނުމެއްނުވާނެ. އެހެނީ، އެކަހަލަ ބައެއްގެ ތެރޭގައި ކަންހިނގާ ގޮތާމެދު ސުވާލު އުފައްދާނޭ މާގިނަ ބަޔަކު ނުތިބޭނެ. ހައްގާއި އަދުލަށް ތެދުވާނޭ ބަޔަކު ނުތިބޭނެ.“

އިބްރާ ވިދާޅުވީ މިކަހަލަ މުޖުތަމައުއަކީ މުސްތަބިއްދުންގެ ސުވަރުގެ ކަމަށާއި އެވަރަށް ދޮގު ހަދަނީ އެހެންވެގެން ކަމަށެވެ.