ދިވެހިރާއްޖޭގެ ގާނޫނުތަކާއި ގަވާއިދުތަކަށް ބޯ ނުލަނބައި, ގާނޫނުތަކާއި ގަވާއިދުތައް މުގުރައިލާނަމަ ބިދޭސީންނަށް ދޫކޮށްފައިވާ ހުއްދަ ބާތިލުކޮށް, ރާއްޖެއިން ޑީޕޯޓްކޮށްލާނެ ކަަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްއާން ވަޙީދު މިއަދު ވިދާޅުވެއްޖެއެވެ.
ޝަމްއާން މިހެން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
ޝަމްއާން ވިދާޅުވީ ރާއްޖޭގައި ހެދިފައިވާ ގާނޫނުތަކާއި ގަވާއިދުތަކަށް ބޯ ނުލަނބައި, ގާނޫނު ތަކާއި ގަވާއިދުތައް މުގުރަމުން، އާއްމު މަސްލަހަތު ގެއްލޭ ގޮތަށް އަމަލު ކުރަމުންދާ ބިދޭސީންނަށް ދޫކޮށްފައިވާ ހުއްދަ ބާތިލުކޮށް، އެފަދަ މީހުން ރާއްޖެއިން ފުރުވައިލެވޭނެ ކަމަށެވެ. އަދި ހަމައެއާއެކު ދޫކޮށްފައިވާ ވިސާއަށް ހަމައަށް ފައިސާ ދެއްކުމަކީ އަދި އެ މީހާ ގަވާއިދުން އުޅޭ ފަރާތެއް ކަމަށް ބަލައި ނިންމާލެވޭނެ ކަމެއް ނޫން ކަމަށް ވެސް އޭނާގެ ޕޯސްޓުގައި ވިދާޅުވިއެވެ.
އޭނާ އިތުރަށް ވިދާޅުވީ ރައީސް ޑރ. މުޙައްމަދު މުޢިއްޒުގެ ސަރުކާރުގެ ގާނޫނު ތަންފީޒީ އިދާރާތަކުން އެ ފަރާތްތަކުގެ ގާނޫނީ ޒިންމާ އަދާ ކުރާނެ ކަމަށެވެ.
އޭނާ މިހެން ވިދާޅުވިއިރު މިދިޔަ ބުދަ ދުވަހުގެރޭ މާލޭގައި ހިންގި މާރާމާރީއަކާ ގުޅިގެން 06 ބިދޭސީއަކު ޑީޕޯޓް ކުރަން ވެސް ވަނީ ނިންމާފައެވެ.
މީގެއިތުރުން 2023 ޑިސެންބަރު 20 ވަނަ ދުވަހު ރާއްޖެ އެތެރެވެފައިވާ ނޯވޭގެ ފަތުރުވެރިއެއް، ވިސާގެ މުއްދަތު ހަމަވުމުން ވެސް އަނބުރާ ގައުމަށް ނުގޮސް، ރާއްޖޭގެ ބޯޓެއްގައި މަސްވެރިކަމުގެ މަސައްކަތްކޮށް، ދިރިއުޅެމުންދާކަމަށް ލިބުނު މައުލޫމާތާއި ގުޅިގެން ޖުލައި 25 ވަނަ ދުވަހު ފުލުހުންގެ އެހީތެރިކަމާއެކު އޭނާ ވަނީ އިމިގްރޭޝަން ބެލުމުގެ ދަށަށް ގެންގޮސް, އިމިގްރޭޝަންގެ ގާނޫނާއި ޚިލާފުވެފައިވާތީ ޑީޕޯޓުކޮށްލައިފައެވެ.
