ވެނެޒުއޭލާގެ ދަށުފަންތީގެ ރައްޔިތުންނާއި އާންމުންގެ މެޖޯރިޓީ ތާއިދު ލިބި ރިޔާސީ އިންތިހާބުގައި ރައީސް މަޑޫރޯ ވަނީ ކުރިހޯއްދަވާފައެވެ.
ކުރީގެ ރައީސް ހޫގޯ ޗާބޭޒް ފަދައިން މަޑޫރޯވެސް ގަބޫލުކުރައްވަނީ އިޒްރޭލަކީ ޓެރަރިސްޓް ސްޓޭޓެއް ކަމަށެވެ. އަދި މެދު އިތުމަތީގެ އާންމު އެތައް ރައްޔިތެއްގެ މަރުގެ ޒިންމާ އެމެރިކާއިން ނަގަންޖެހޭނެކަމަށްވެސް އޭނާ ގަބޫލުކުރައްވައެވެ.
އެހެންކަމުން، އެންމެ ފަހުން ވެނެޒުއޭލާގައި ކުރިއަށް ގެންދިޔަ ރިޔާސީ އިންތިހާބު މަޑޫރޯ ކާމިޔާބުކުރެއްވުމަކީ އެމެރިކާއަށް އުފާވެރި ހަބަރަކަށް ނުވިއެވެ. މީގެ އިތުރުން، އީލޮން މަސްކް ފަދަ މަހުޖަނުންވެސް އެކަމުގެ ނުރުހުން ސޯޝަލްމީޑިއާގައި ވަނީ ފާޅުކޮށްފައެވެ. މިގޮތުން، ސަރުކާރުގެ ސަޕޯޓަރުން ވޯޓު ފޮށި ވަގަށް ނަގާކަމަށް ބުނެ އެއްވެސް ހަގީގަތެއް ނެތް ވީޑިއޯތަށް ރިޓްވީޓްކޮށްފައިވާއިރު، އެ ވީޑިއޯއަކީ އޭސީތަކެއް ވަގަށްނަގާ މަންޒަރު ދައްކުވައިދޭ ވީޑިއޯއެއްކަން ކުރީގެ ޓްވިޓަރ، އެކްސްގެ ކޮމިއުނިޓީއިން ވަނީ ސާބިތުކޮށްދީފައެވެ.
ވެނެޒުއޭލާގެ ސިޔާސީ އިދިކޮޅު ކެނޑިޑޭޓް، މަރީއާ ކޮރީނާއަށް އެމެރިކާއިން ތާއީދުކޮށްފައިވާއިރު، ވެރިކަން ލިބިއްޖެނަމަ ޖާރުއްސަލާމަކީ އިޒްރޭލްގެ ވެރިކަން ކުރާ ރަށް ކަމުގައި ބަލައިގަތުމަށް އޭނާ ވަނީ އެއްބަސްވެފައެވެ. އަދި އިންތިހާބުން ނުކުތް ނަތީޖާ ގަބޫލު ނުކުރާކަމަށްބުނެ، ކޮރީނާ އަންނަނީ އޭނާގެ ސަޕޯޓަރުން މަގުމައްޗަށްނެރެ، މުޒާހަރާކޮށް ހަމަނުޖެހުން ހިންގުމަށް ހިތްވަރު ލައިދެމުންނެވެ. އޭނާ ގޮވަމުން ގެންދަނީ ސަރުކާރުގެ އިސްތިއުފާއަށެވެ.
މިގޮތުން، މުޒާހަރާތަކާއި ގުޅިގެން އީލޮން މަސްކް ބުނެފައިވަނީ، މަޑޫރޯ އާއި ދެކޮޅަށް ރައްޔިތުން ނުކުތުމުން އެނގޭ ކަމަކީ އޭނާ އިންތިހާބު ނާކާމިޔާބުވެއްޖެ ކަމެވެ. އިންތިހާބުގެ ނަތީޖާ އޭނާވަނީ ދޮގުކޮށްފައެވެ. ގިނަ ފަރާތްތަކުން ގަބޫލުކުރާގޮތުގައި، ވެނެޒުއޭލާގެ އިދިކޮޅު ސިޔާސީ ކެނޑިޑޭޓް ހޮވުމަށް އީލޮން ވަނީ އެތައް މިލިއަން ޑޮލަރެއް ހަރަދުކޮށްފައެވެ. އަދި އޭނާގެ ނުރުހުމުގެ ފަހަތުގައިވަނީ މިސަބަބެވެ.
ރައީސް މަޑޫރޯގެ ޒަޔާމަތުގައި އެގައުމުން ލިބެން ހުންނަ ތެލުގެ ބޮޑެތި ރިޒާވްތަކަކީ ރައްޔިތުންގެ މަންފާއަށް ބޭނުންކުރާ އެއްޗެކެވެ. ވެނެޒުއޭލާއަކީ ސައުދީ އަރަބިއާއަށްވުރެ ތެޔޮ ތިޔާގި ގައުމެކެވެ. އެހެންނަމަވެސް، އެމެރިކާ ފަދަ ގައުމަކަށް އެތެލުގެ މައްޗަށް އެއްވެސް ބާރެއް ނުފޯރުވެއެވެ.
