ގައުމީ ހަޔާތެއް އާރާސްތުކުރުމަށްޓަކައި ކޮންމެހެން ބޭނުންވާ އެކައްޗަކީ ނިޒާމެކެވެ. ދެވަނަ އެއްޗަކީ، އެ ނިޒާމު ހިންގުމަށްޓަކައި، ބޭނުންވާނެ ފަރާތްތަކެކެވެ.

ދުނިޔަވީ ހަޔާތުގައި އިންސާނުންނަށް ފުރިހަމަ ނިޒާމެއްގެ ބޭނުން ބޮޑުއިރު, ގައުމެއްގެ ކުރިމަގު އުޖާލާކުރުމަށްޓަކައި، އެ ނިޒާމެއް އެކަށީގެންވާ ގޮތަށް ހިނގުން ލާޒިމެވެ.

ކަންތައްތައް ބޮއްސުންލައިގެން ދަނީ ރަނގަޅު ނިޒާމެއް އެކަށައެޅިފައިނުވާތީއެވެ.

ދުނިޔެ ވެސް ހިނގަނީ ފުރިހަމަ ނިޒާމެއްގެ ތެރެއިންނެވެ. ނަމަވެސް ގުދުރަތުގެ ނިޒާާމު ފުރިހަމައަށް ނުހިނގާނަމަ ބޯމައްޗަށް އުޑުވެއްޓިގެން ނުދާނެތޯއެވެ!

ނަމަވެސް ގުދުރަތުގެ ކޮންމެ އެއްޗެއް ވެސް، އިލާހުގެ ކުޅަދުންވަންތަކަމާއެކު އޭގެ މަގާމުގައި، އެންމެ ފުރިހަމައަށް މަސްއޫލިއްޔަތު އަދާކުރުންމަތީ ދެމިހުރެއެވެ. އެއިން ވެސް އަންގައިދެނީ، ރޭވުންތެރި ފުރިހަމަ ނިޒާމެއް އޮތްނަމަ ކަންކަން ހިނގާނީ ފުރިހަމަކަމާއެކު ކަމެވެ.

ކުރިން ވެސް ދެންނެވި ފަދައިން، ގައުމެއް އާރާސްތުކުރުމަށް އެކަށީގެންވާ ނިޒާމެއް ބޭނުންވެއެވެ. އެ ނިޒާމު ހިންގާނެ ގާބިލު ބަޔަކު ބޭނުންވެއެވެ.

އެ ނިޒާމު ރަނގަޅަށް ހިނގާނަމަ، އެ ގައުމެއް ކުރިއަށްދާނީ އެހައިމެ ސާދާ ސީދާކޮށެވެ.

ތަރައްގީގެ ހަރުފަތްތަކަށް އަރަމުން ގޮަސް އޭގެ ކުރިބޯށްޓަށް ވާސިލުވާނީ ނުހަނު ހަލުވިކަމާއެކުގައެވެ.

ނަމަވެސް، މިއަދު މި ކުޑަކުޑަ ރާއްޖެ މި ހިނގަނީ ރަނގަޅު ނިޒާމެއްގެތެރެއިންތޯ ސުވާލު އުފެދެއެވެ. ޖުމްހޫރީ ސަރުކާރު ހިނގަމުންދަނީ އެންމެ އެދެވޭ ގޮތެއްގައިތޯ ސުވާލު އުފެދޭކަމެކެވެ.

މިއީ ނުފޫޒުތަކުން އެއްކިބާވެފައިވާ މިނިވަން ސަރުކާރެއްތޯ ސުވާލުކުރަން ވެސް ޖެހެއެވެ. މިއީ މި ވަގުތަށް އެންމެ ރަނގަޅު ސަރުކާރުތޯ ވެސް ސުވާލުކުރަން ޖެހެއެވެ. ޖުމްހޫރިއްޔަތުގެ ފޮނިމީރުކަން، ރައްޔިތުންނަށް ލިބެމުންދޭތޯ މި ހުރީ ހައްތާވެސް ޖަވާބު ހޯދަންޖެހޭ ސުވާލުތަކެވެ.

ޖުމްހޫރިއްޔަތަކީ ކޮބާ!

ޖުމްހޫރީ ވެރިކަން ފެށިގެން އަންނަނީ، ރައްޔިތުންނާއި ހިސާބުންނެވެ. އެ ވެރިކަމުގެ ހައްގުވެރިންނަކީ ރައްޔިތުންނެެވެ. ޖުމްހޫރީވެރިކަމަކީ، ރައްޔިތުންގެ ވެރިކަމަކަށްވާހިނދު، އެ އިރެއްގައި އޮންނަ ސަރުކާރަކުން ރައްޔިތުންގެ ބޭނުންތައް ފުއްދައިދީ، ރައްޔިތުން ބޭނުންވާ ގޮތަށް، ގައުމު ހަމަމަގަށް އަޅުވަންޖެހެއެވެ. ސަރުކާރުގެ މަސްއޫލިއްޔަތު އޭގެ އެންމެ ފުރިހަމަގޮތުގައި އަދާކުރަންޖެހެއެވެ. ކަންކަން ކުރާނީ “އަމާބުނިތީ ފަރަށްދާ އުސޫލަކުން“ ނޫނެވެ.

ޖުމްހޫރީ ވެރިކަމެއްގެ ލާބަޔާއި، މަންފާއާއި، ހިއްސާ ރައްޔިތުންނަށް ލިބެންޖެހޭކަމަށް ސިޔާސީ ބޮޑުން ވިދާޅުވަމުން ގެންދަވާއިރު، ރައްޔިތުނަށް، އެ ކަން އެބަ ހާސިލުވޭތޯއެވެ. ޖުމްހޫރިއްޔަތެއްގެ އަސާސަކީ، ރައްޔިތުންގެ ވެރިކަމެއްކުރުން ކަމަށްވާއިރު މި ހިނގަނީ، ރައީސް މުޙައްމަދު މުޢިއްޒާއި ޢަބްދުއްރަޙީމާއި އެބޭފުޅުންގެ އާއިލީ ނުވަތަ ޕާޓީ ކުދިންކޮޅެއްގެ ވެރިކަމެއްތޯ, ރައްޔިތުންގެ ވެރިކަމެއްތޯ ސުވާލު އުފެދެއެވެ. ޒަމާނުއްސުރެ ދެމިގެން މިއަންނަ ދިވެހި ވެރިކަން، ރައްޔިތުންގެ ފަރާތުންކުރާ ވެރިކަމަކަށް ކިރިޔާވެސްވީ ގިނަ ޕާޓީ އެކުލެވޭ ސިޔާސީ ނިޒާމާއެކު ކަމާއި ނިޒާމު ދަމަހައްޓަންޖެހޭކަމަށް ސިޔާސީ ބޮޑުން ވިދާޅުވާއިރު، އެ ނިޒާމު އެބަ ދެމެހެއްޓޭތޯއެވެ.

ކަންމިހެން ހުރިއިރު، ގައުމު ހިނގަނީ ފުރިހަމަ ނިޒާމެއްގެތެރެއިންތޯ، ނުވަތަ މިއަދުގެ ކަންކަން ހިނގާގޮތުން މާދަމާ ދިމާވާނީ ކޮންކަމެއްތޯ ވިސްނައިލަންޖެހެއެވެ.

ވީގޮތެއް ވާން ދޫކޮށްލައިގެން ގައުމު އޮޔާ ގޮސް ގާދޫކޮލުން ބޭރުވެދާނެއެވެ. ވެރިން ބޭނުންފުޅުވާ ގޮތަކަށް ގާނޫނުތައް ބައްޓަންކުރަންވެއްޖެނަމަ، މިއަދު ފެންނަ ދިވެހިރާއްޖެ މާދަމާ ނުފެނިދާނެއެވެ. ވީމާ ހުންގާނުގައި ތިއްބެވި ބައެއް ބޭފުޅުންނާމެދު ވަރަށް ޚާއްސަ ނަޒަރަކުން ވިސްނަން އެބަ ޖެހެއެވެ.

އިބުރަތްތެރި ފިލާވަޅެއް:

ކަމަށް ލާއިގުނުވާ އަނިޔާވެރިން ފާވީމާ ކަންކަންވާ ގޮތް ދުނިޔޭގެ އެކި ކަންކޮޅުތަކުން އެކި ޒަމާންތަކުން ވަނީ ފެނިގެން ގޮސްފައެވެ

1923 އޮކްޓޫބަރު 29 ވަނަ ދުވަަހަކީ 623 އަހަރުވަންދެން ދެމިއޮތް އުޘްމާނީ ޚިލާފަތު ނެތިގޮސް ޖުމްހޫރިއްޔަތަކަށް ތުރުކީ ލޯހުޅުވައިލި ދުވަހެވެ.

ތުރުކީގައި އުފެދުނު މި ޖުމްހޫރިއްޔަތުގެ ފުރަތަމަ ރައީސަކީ، އުޘްމާނީ ޚިލާފަތު އުވައިލުމުގެ މޭސްތިރިޔާ މުޞްޠަފާ ކަމާލް ބާޝާ ނުވަތަ އަތާތުރުކު އެވެ.

ސެކިއުލަރިޒަމްއަށް އިސްކަންދިން މުޞްޠަފާ ކަމާލް ބާޝާ ނުވަތަ އަތާތުރުކު ވެރިކަމަށްއައިސް، އިސްލާމްދީނުގެ ހިދާޔަތް ލިބިފައި އޮތް ތުރުކީ، ސެކިއުލަރ ތުރުކީއަކަށް ބަދަލުކޮށްލުމަށްޓަކައި ތަފާތު ގާނޫނުތައް ވުޖޫދުކޮށް، އޭނާގެ އެދުމާ އެއްގޮތަށް ރައްޔިތުންގެ މަޖިލިސް ކުރިއަށް ގެންގޮސް އިސްލާމްދީނުގެ ނޫރު ތުރުކީން ފޮހެލުމަށް ކެނޑިނޭޅި މަސައްކަތްތައް ފެށިއެވެ.

އެގޮތުން، ތުރުކީގައި ކުރިން ހުރި ގާނޫނުތައް މުގުރާލައި، އިޓަލީ ވިލާތުގެ ޖިނާއީ ގާނޫނާއި، ސްވިޒަރލޭންޑްގެ މަދަނީ ގާނޫނާއި، ޖަރުމަނުވިލާތުގެ އިގުތިސާދީ ގާނޫނުތަކާއި ވިޔަފާރިއާއި ބެހޭ ގާނޫނުތައް، ތުރުކީ ވިލާތުގައި ހިންގަން ފެށިއެވެ.

މީގެއިތުރުން ތުރުކީގައި، އިސްލާމްދީން މަނާކޮށް، މިސްކިތްތައް ބަންދުކޮށް, ކީރިތި ޤުރުއާނާއި، ހަދީސާއި، އިސްލާމީ ފިޤުހުގެ ފޮތްތައް ޗާޕުކުރުމާއި، ޝާއިއުކުރުން މަނާކުރިއެވެ. ތުރުކީ ބަސް، ޢަރަބި އަކުރުން ލިތުން ހުއްޓުވައި ލެޓިން އަކުރު އާންމުކުރިއެވެ.

މީގެއިތުރުން:

އިސްލާދީނުގެ ޢިލްމު އުންގަންނައިދިނުން މަނާކުރި

އިސްލާމީ މަދަރުސާތައް ހުޅުވުން މަނާކުރި.

ދެ ޖިންސު މަސްހުނިކޮށްގެން ތަޢުލީމުދޭން އަމުރުކުރި.

ބުރުގާ އެޅުމަކީ މަނާކަމެއް ކަމަށް ހަމަޖެއްސި

ބަރ ތަކާއި ޖުވާކުޅޭތަންތަން ހުޅުވައި، ހަށިވިއްކުމުގެ ހުއްދަ ދޫކުރި.

ރާބުއިމުގެ ޚިދުމަތް ނުދެވޭ ގޮތަށް ހޮޓާ، ރެސްޓޯރެންޓް ފަދަ ތަންތަން ހުޅުވުން މަނާކުރި.

އެގޮތުން މި ކަންތައްތަކުގެ ސަބަބުން، މުޅި ތުރުކީ ބޮއްސުންލައިގެންދިޔައެވެ.

ަކަންމހެން ހުރިއިރު ރަނގަޅު ނިޒާމެއްނެތް ނަމަ ތުރުކީއަށް ވީގޮތް ރާއްޖެއަށް ދުރުކަމެއްނޫނެވެ. މި ރާއްޖެއަށް މަލްޓި ޕަާޓީ ޑިމޮކްރަސީ އައިފަހުން އިސްވެ މި ފާހަގަކުރި ކަންކަމަށް މަގުފަހިވާ އެތައް ގާނޫނުތަކެއް އުފަންކުރުވަން ގާނޫނު ހަދާ މަޖިލީހުން މަސައްކަތް ކޮށްފައިވެެއެވެ.