ޓެލްއަވީވަށް ޑްރޯން ހަމަލާއެއް ދީފައިވާކަމަށް ޔަމަނުގެ ހޫތީ މުޖާހިދުން ބުނެފިއެވެ.
ހުކުރު ދުވަހުގެ ހެނދުނުގެ ވަގުތެއްގައި ޓެލްއަވީވުގެ އެންމެ ބާރުބޮޑު ސަރހައްދަށް އިރާނުން އުފައްދާފައިވާ ލޯންގް-ރޭންޖް ޑްރޯނެއް ވައްޓާލާފައިވާއިރު، މި ހަމަލާގައި އެކަކު މަރުވެ، ހަތަރު މީހަކު ޒަހަމްވެފައިވާކަން އިޒްރޭލުގެ އަސްކަރިއްޔާއިން ވަނީ ހާމަކޮށްފައެވެ.
މިގޮތުން، ސޯޝަލް މީޑިއާގައި ދައުރުވި ހަމަލާގެ ފުޓެޖުން ފެންނަގޮތުގައި، ހަމަލާ އައިސްފައިވަނީ ކަނޑުން ކަމުން، އެއަރ ރެއިޑް ސިސްޓަމްތަކަށް ޑްރޯން ފާހަގަކުރެވިފައެއް ނުވެއެވެ. ހަމަލާ ދީފައިވަނީ، އިޒްރޭލުން ލުބުނާނުގެ ހަޒްބުﷲ މުޖާހިދުންގެ އިސް ކޮމާންޑަރެއް ޝަހީދުކޮށްލާފައިވާކަން އިޒްރޭލު ސިފައިން ހާމަކުރިތާ ކުޑަ ވަގުތުކޮޅެއްގެ ތެރޭގައެވެ.
އިޒްރޭލު އަސްކަރިއްޔާގެ ފަރާތުން ވާހަކަދެއްކި ތަރުޖަމާނު، ރިއަރ އެޑްމިރަލް ޑޭނިއަލް ހަގާރީ ބުނެފައިވަނީ، ޓެލް އަވީވްގެ ބީޗްފްރަންޓްގައި ހުންނަ އެމެރިކާ އެމްބަސީ ކައިރީގައި ހުންނަ އިމާރާތަކަށް ހަމަލާދީ ފޮނުވާލި ޑްރޯން އަސްކަރީ ބާރުން ދިރާސާ ކޮށްފައިވާ ކަމަށާއި، އެއީ އަޕްގްރޭޑްކޮށްފައިވާ އިރާނުގެ ސަމަދް-3 މޮޑެލްގެ ޑްރޯނެއްކަމަށެވެ.
”ބެލެވޭ ގޮތުގައި އެޑްރޯން އައިސްފައިވަނީ ޔަމަނުން ޓެލްއަވީވަށް.“ ނޫސްވެރިންނާއި ވާހަކަދައްކަމުން ހަގާރީ ބުނެފައިވެއެވެ.
ހޫތީންގެ ފަރާތުން ވާހަކަދެއްކި ތަރުޖަމާނު އެކަން ކަށަވަރުކޮށްދީފައިވާއިރު، ބުނީ ޣައްޒާ ހަނގުރާމައިގައި ފަލަސްތީނު ރައްޔިތުންނަށް އެއްބާރުލުން ދިނުމުގެ ގޮތުން، މެދުކެނޑުމެއް ނެތި އިޒްރޭލަށް ހަމަލާތައް ދެމުން ގެންދާނެކަމަށެވެ.
