ބަންގްލަދޭޝްގެ ދަރިވަރުން ކުރަމުންގެންދާ މުޒާހަރާތައް ހޫނުވެ އެގައުމުގެ މަގުތައް ހަލަބޮލިވެއްޖެއެވެ.
މިގޮތުން، ބަންގްލަދޭޝްގެ ދަރިވަރުން މުޒާހަރާކުރަމުންދަނީ އަންހެނުންނާއި، ފުދުންތެރިކަން ކުޑަ އާއިލާތަކުގެ މީހުންނާއި، މިނިވަންކަން ހޯދުމަށް ހަނގުރާމަކުރި ސިފައިންގެ އާއިލާތަކަށް އިސްކަންދީގެން ”ރެފަރެންސް-ބޭސްޑް“ އުސޫލަކުން ސިވިލް ސަރވިސް ވަޒީފާ ދޫކުރާ ދޫކުރުން ހުއްޓާލުމަށް ގޮވާލައެވެ.
1971 ވަނަ އަހަރު، ބަންގްލަދޭޝްގެ އަބްޠާލެއް ކަމުގައިވާ ޝެއިޚް މުޖީބުއްރަހްމާން ހެއްދެވި މި އުސޫލުގެ ދަށުން އެ ގައުމުގައި މިއަދު އޮތް 2 މިލިއަން ސިވިލް ސާރވިސް ވަޒީފާގެ ދެބައިކުޅަ އެއްބައި ވަޒީފާ ދެވޭނީ ތައުލީމާއި ތަޖުރިބާއަށް ބެލުމެއްނެތިއެވެ. މީގެ އިތުރުން، ބަންގްލަދޭޝްގެ ސިވިލް ސަރވިސްގެ 30 އިންސައްތަ ވަޒީފާއަކީ އެ ގައުމުގެ މިނިވަން ކަމަށްޓަކައި 1971 ވަނަ އަހަރު ހަނގުރާމަކުރި މީހުންގެ ދަރީންނާއި ދަރީންގެ ދަރީންނަށް ހާއްސަ ކުރެވިފައި ހުންނަ ވަޒީފާތަކެކެވެ.
ޑާކާ ޔުނިވަރސިޓީގެ ދަރިވަރުން ގޮވާލަމުންދަނީ، އަންހެނުންނާއި ފުދުންތެރިކަން ނެތް އާއިލާތަކާއި، ނުކުޅެދުންތެރިކަން ހުންނަ ފަރާތްތަކާއި، އެފަދަ މައިނޯރިޓީތަކަށް ވަޒީފާގެ ކޯޓާއެއް ކަނޑައެޅި ނަމަވެސް، 94 އިންސައްތަ ވަޒީފާއަކީ މެރިޓް އުސޫލުންދޭ ވަޒީފާތަކެއް ގޮތައް ބަދަލުކޮށްދިނުމަށެވެ. އަދި ދަރިވަރުންގެ މުޒާހަރާތައް ހަލަބޮލިވެފައިވާ ކަމަށް ރިޕޯޓުކޮށްފައި ވަނީ ބަންގްލަދޭޝްގެ އަވާމީ ލީގް ސަޕޯޓަރުން ކޮލެޖަށްވަދެ ދަރިވަރުންނަށް ހަމަލާދޭން ފެށުމުންނެވެ.
ޑާކާގެ އެހެން ޔުނިވަރސިޓީތަކާއި ކޮލެޖްތަކުންވެސް މުޒާހަރައިގައި ބައިވެރިވެ ކިޔަވައިދިނުން ހުއްޓާލާފައިވެއެވެ. މީގެ އިތުރުން، މަތީ ސާނަވީ ދަރިވަރުންވެސް މިހާރު މުޒާހަރާތަކުގައި ބައިވެރި ވަމުންގެންދާއިރު، ބަންގްލަދޭޝްގެ މަގުތައް އަންނަނީ އިތުރަށް ހަމަބޮލިވަމުންނެވެ. މިގޮތުން، ދައުލަތުގެ އިމާރާތްތަކުގައި ހުޅުޖަހައި، ގެއްލުންދެމުން ދިޔުމާއެކު، މުޅި ގައުމުން އިންޓަރނެޓްގެ ޚިދުމަތްވަނީ ކަނޑާލާފައެވެ.
ބަންގްލަދޭޝްގައި ކުރިއަށްދާ މުޒާހަރާތަކުގައި މިހާތަނަށް 39 މީހަކު މަރުވެފައިވާކަމަށް ރިޕޯޓުކޮށްފައިވާއިރު، 100 އަށްވުރެ ގިނަ މީހުން ޒަޚަމް ވެފައިވެއެވެ.
