2024 ވަނަ އަހަރުގެ ތިންވަނަ ކުއާޓަރުގައި، ދެކުނު އޭޝިއާގެ އެންމެ ބާރަށް ކުރިއަރަމުން އަންނަ އެއް ޑޭޓާ ސެންޓަރ މާރކެޓް ކަމުގައިވާ މެލޭޝިއާ، ޖަޕާނާއި އިންޑިއާ އަށްފަހު، އޭޝިއާ ބައްރުގެ ތިންވަނަށް އެންމެ ބޮޑު ޑޭޓާ ސެންޓަރ މާރކެޓަށްވެގެންދާނެކަމަށް މަޝްހޫރު ބައިނަލްއަޤްވާމީ ޓެކްނޮލޮޖީ ގްރޫޕް ޖުވައި އައިކިއުއައި ހޯލްޑިންގްސްއިން ބުނެފިއެވެ.
ޖުވައި އައިކިއުއައި އިން އަންގާރަދުވަހު ނެރުނު ބަޔާނެއްގައި، އެކުންފުނީގެ ކޯ-ފައުންޑަރ އަދި ޗީފް އެގްޒެކެޓިވް އޮފިސަރ ކާޝިފް އަންޞާރީ ވިދާޅުވީ، ދުނިޔޭގެ ޑޭޓާ ސެންޓަރ އިންޑަސްޓްރީ އަވަސް ބާރުމިނެއްގައި މިއަހަރު ކުރިއަރަމުންދާކަމަށާއި، އެއީ އޭއައި ސިސްޓަމްތަކާއި، މަސްނުއީ ދަސްކުރުމުގެ ނިޒާމާއި، އޮންލައިން ވިޔަފާރިތަކާއި، ކްލައުޑް ކޮމްޕިއުޓިންގް އިން އެކަމަށް އޮތް ޑިމާންޑު ބޮޑު ކަމުން ކަމަށެވެ.
”މެލޭޝިއާއިން މިހާ ކުއްލި ގޮތެއްގައި، މިހާ އަވަހަށް ދޭޓާ ސެންޓަރުތަކުގެ އެންމެ ކުރީ ސަފުގައި ވާދަކުރަން ފެށުމުން، މެލޭޝިއާއަކީ ”ޑޭޓާ ސެންޓަރ ޕަވަރހައުސް އެއް“ ކަމަށް ގިނަ ބަޔަކު ގަބޫލުކުރޭ.“ އަންޞާރީ ވިދާޅުވިއެވެ.
މެލޭޝިއާގެ ކުރިއެރުމުގެ ފަހަތުގައިވަނީ އެގައުމު އޮންނަ ސަރަހައްދާއި، ސަރުކާރުން ގެންގުޅޭ ފަންނީ އަދި ޓެކްނޮލޮޖިކަލް ކުރިއެރުންތަކަށް ބާރުދޭ ސިޔާސަތުތަކާއި، ސިންގަޕޫރާއި ގާތުގައި އޮތުމުގެ އިތުރުން، ބިމުގެ މުއްސަނދިކަމާއި، ކަރަންޓާއި ފެނުގެ ތިޔާގިކަން ކަމުގައި ފާހަގަކުރައްވައި، އަންޞާރީ ވިދާޅުވީ ގުދުރަތީ ގޮތުން ލިބެންހުންނަ ތަކެތި ބޭރުކޮށްގެން ލިބޭ އާމްދަނީ އަށް ބަރޯސާ ނުވާ، ޑައިވަރސިފައިޑް އިގްތިޞާދަކަށް އެގައުމުގެ އިޤްތިޞާދު ބަދަލުވެއްޖެ ކަމަށެވެ.
”މެލޭޝިއާގެ ޖީޑީޕީގެ ދެބައިކުޅަ އެއްބައި ހިއްސާކުރަނީ އެގައުމުން ދޭ ޚިދުމަތްތަކުން. ސަރުކާރުގެ ސިޔާސަތުތަކަށް ބަލާނަމަ، މެލޭޝިއާ ސަރުކާރުން ޓެކްސް އިންސްންޓިވެތަކާއި، ހިލޭ އެހީއާއި، ޑޭޓާ ސެންޓަރ އިންވެސްޓްމަންޓް ކަށަވަރުކުރުމަށް ރެގިއުލޭޓަރީ ސަޕޯޓުވެސް ވިޔަފާރިވެރިންނަށްދޭ.“ އަންޞާރީ ވިދާޅުވިއެވެ.
